【懸疑】《連登連環殺人事件》

「唔係咁多人都諗住落手下話。」阿宜怯怯的道。

「我地繼續行先，我有辦法。」

他們再度起行，直至去到天橋尾端，子熹忽然停下來，幾人也馬上勒住腳步。

再次回頭一看，只見一個年紀老邁的伯伯佇在天橋中央。他身穿米黃色襯衣，白髮稀疏，身子微微捲縮。那伯伯本想找個位置躲藏，卻因在橋中心，無法隱藏自己。

子熹馬上伸開左手，以戒備姿態掩護阿宜。

「阿宜？」伯伯以沙啞的嗓音叫她。

「王伯？」阿宜驚喜：「點解你會喺度嘅？呢個時間你通常捉緊棋架喎。」

「果然係你呀阿宜！」王伯瞪大眼睛，額上一層層的坑紋盡現：「點解呢班人會捉住你嘅？」

「佢地唔係捉住我啊，而係......」

「你上次講話有壞人想害你，係咪就係佢地？」

「唉呀王伯，你搞錯哂喇。」阿宜步離芊芊等人，快步的走向王伯，準備跟他解釋來龍去脈。

其他人著緊的跟上去。

「喂唔好自己走開啊！」胡文軒緊張的抓住阿宜胳膊。

「啊，好痛呀。」阿宜厭惡的叫了一聲。

「你做咩呀！居然蝦阿宜。」王伯大呼：「大家，有人欺負我地寶貝既阿宜啊！」

不消數秒，行人天橋的兩邊出口也聚來一群人，每邊約十餘人，全是年過半百的公公婆婆。

他們凶神惡煞，擋住子熹等人的去路。從他們簡便的衣裝，估計應該是禾輋邨的街坊鄰里。

「佢地吹雞喎。」康仔說。

「保護阿宜。」

胡文軒一聲下令，子熹他們馬上亮出手槍，指向兩邊路口的長者們。

「唔好開槍啊，佢地係我既屋企人嚟架。」阿宜緊張得頻頻搖頭，雙下巴晃動著。

公公婆婆看到手槍後，不但沒有退縮，更頓時起哄起來。

「嘩，用槍指住我地，佢地一定係黑社會嚟啦。」

「槍咋嘛，我一把年紀有咩未見過？想當年我......」

「射我囉！反正我條命都活唔得幾耐！」

「阿宜係我地禾輋邨既寶貝嚟架，我地要保護佢！」

胡文軒見他們情緒漸漸失控，馬上把槍頭指向王伯：「我地係警察，你地再唔讓路，我就唯有開槍。」

阿宜聽到他的話後，亳不猶豫的擋在胡文軒的槍前，雙手張開。

「我都話唔好開槍啊，大家搞錯哂所有野喇。」

長者們看到阿宜的行為後，變得極度激動，一步步的迫近胡文軒他們。

「危險啊阿宜。」

「會死架阿宜，快啲走開啦。」

看到他們激烈的反應，子熹終於明白了發生甚麼的一回事。

「收起槍啦大家。」他把槍放回槍袋裡。

「下，點解啊？」康仔問。

「一場誤會啊。」

「一場誤會？」

「我地呢度所有人都係以保護阿宜作為目標，咁又有咩需要發生無謂既衝突呢？」

「佢地雖然話保護阿宜啫，但兇手隨時有機會混喺入面。」胡文軒說道。

「胡Sir，我唔認同。」子熹向王伯走去，跟他對視幾秒，再環視一圈後說：「呢度所有人都係長者，連殺一個人既能力都未必有，又點會可能係連環殺人兇手呢？」

阿宜箭步上去，把王伯擁在懷裡，神色倉皇的說：「係啊，所以大家唔好拳頭相向先啦，我地係朋友嚟架。」

擾攘一番以後，眾人開始冷靜下來。胡文軒等人討論過後，認為那些長者沒有可疑。阿宜花點時間向公公婆婆們解釋這次的保護行動，他們初時不相信，其後子熹他們展視警章，才一個個的信服下來。

「唉阿，阿宜你早啲講嘛，咁我地就唔會搞出呢個大頭佛，咁失禮啦。」

阿宜不滿的說：「係你地未問清楚發生咩事就冤枉好人咋。」

「你平時都唔會同陌生人出出入入，我地誤會都好正常啫......」

「仲抵賴？」她逐一指著老人家們：「我禾輋邨公主既說話你地係咪聽唔入耳喇？」

「唔係唔係啊，唔好嬲啦阿宜。」那些公公婆婆連忙抱歉，齊齊上前安撫阿宜。

「一時就叫肥媽公主，一時又叫禾輋邨公主，嘻嘻。」康仔不禁失笑。

有位婆婆聽到他的話，插嘴道：「阿宜佢好好人架，你唔好笑佢啊。佢屋企人好早就過左身，留低佢孤伶伶一個。阿宜用屋企既錢捐左好多比我地邨，仲對我地啲老人家好好架。」

另一位伯伯也來補充說：「係呀，佢細細個就好中意公主，好想要比人寵愛既感覺。我地因為想幫佢完成心願，所以好多時都會嗌佢公主。」

康仔驚訝的張張嘴巴，想不到她肥膩的外殼下原來有段感人的故事。

「嘩，睇唔出佢係個好人喎。」胡文軒擺出不相信的臉，諷刺的說。

「胡Sir，咁又唔一定既，每個人都會有兩面架嘛。」康仔說。

「我唔理一面定兩面啦，總之而家進行緊保護任務，無咩事既就拿拿聲繼續行啦。」胡文軒拉高嗓音，雖然望著康仔，但仿佛跟所有人說著。

阿宜捉住王伯的手：「我要走喇，隨時會有壞人出現，警察要帶我返警局保護我啊。」

「你要走幾耐架，我地好擔心架。」

「一日咋，放心啦。」

「一定要安全返嚟呀。」

「知道喇王伯。」

「阿宜真係好乖呀......」

王伯抱了抱阿直，阿宜也深深的抱著他，眼眶泛起紅光。子熹第一次從她的眼中，看到她煽情的樣子。

芊芊也擁著她，說：「我地一定會好好咁保護你架！」

「嗯！」

本來緊張的氣氛，就似冰淇淋般溶化掉，換成溫馨的場景。

看著他們傻乎乎的抱在一起，康仔會心的一笑。

天橋下的行人路，商場玻璃門前，還有橋的入口也開始聚集了「食花生」的人群。胡文軒見人漸多，再次叮嚀他們要快點離開。

終於阿宜跟王伯等人道別，王伯還說明天要禾輋邨的大排檔弄個盛宴，為她過走衰氣，好好慶祝一番。

幾人繼續原先的步伐，回到防彈車停泊的位置。

胡文軒拉起恤衫手肘，瞄看勞力士手錶的銀針：中午十二時。

幾人比原定時間晚了半小時，連忙上車。而兩部車坐位的分配依舊：子熹、胡文軒、MK晴和阿宜一輛車，康仔、影姨和芊芊則上另一輛車。

MK晴和阿宜坐在後排，窗旁的黑簾拉上。阿宜甫上車，便有種作為囚犯的感覺，她嘖了一聲。

「我睇TVB既劇集，佢地保護目標既時候，啲車靚啲同豪華啲架喎。」她說。

MK晴聽到她的不滿，只是反了個白眼，沒有理會她。

確認所有人上車後，便由胡文軒的車先行，影姨他們緊隨其後。兩車以急遽的時速駕駛著，從前窗的畫面，芊芊隱約可見前車兩人坐在後排的背影。

「做咩咁遲既你地？」負責駕車的影姨好奇的問。

「出左小小意外。」康仔揚起嘴角：「本身見到可疑既人，不過只係啲公公婆婆。已經解決左，可以放心。」

「真係無留意到其他可疑既人？」影姨重申的問。

康仔把視線徘徊於空中，思索後答：「真係無啊。」

「奇怪喇......」

芊芊狐疑：「點解咁講呢？」

剛好前方的紅綠燈由綠光轉成黃光，影姨慢慢煞停了車，然後拿起放在左旁的定位追蹤儀器。

「由頭先開始，我就一直發現羅明亮喺禾輋邨附近，唔知係巧合定係點。」

「咁就奇怪喇，佢明明住土瓜灣架喎，而且佢平時足不出戶，應該唔會晨咁早過嚟架啵。」康仔接過定位追蹤儀器，開始研究起來。

「會唔會係搞亂左阿田同羅明亮既位置啊？」芊芊問。

「唔會啦。」影姨拾回軚盤，堅決的說：「我好肯定橙色圓點係阿田既位置，紅色圓點係羅明亮既位置。」

說到這裡，兩人陷入了沉思。

紅綠燈再一次亮起了綠燈，影姨踏下油門，車子發出低沉的發動聲。

「各位...」康仔忽然說。

「做咩事？」

康仔目瞪口呆的望著兩人，緩緩開腔。

「個紅色圓點...跟住我地方向移動緊。」

睇到我好緊張啊
快d繼續啊

感謝你支持 但今日要抖抖了

Sor巴打但羅明亮同阿田係邊個，我唔記得咗

羅明亮係開殺人post，但唔承認係兇手既人

阿田係連埋住既員工，但有嫌疑殺人

唔該大佬，屌爛我個腦，啲人名好難記

我下次都係改翻啲人做傻強，阿B算

唔好呀，用真名個故好睇好多 加油巴打

會努力的

正！好多文！

嘔心瀝血

好正

康仔把定位追蹤儀器展示給他看，並指著紅色圓點，跟他說明狀況，胡文軒粗獷的眉毛瞬間皺成八字。

「你意思係羅明亮一直跟蹤緊我地？」

「係啊。」康仔答：「佢就係喺連登開Post話要殺人果個樓主，本身我地排除左佢係兇手既可能性，點知佢原來一直跟緊我地。我怕佢如果真係兇手既話，有機會一陣闖入嚟總部，對阿宜不利。」

「下！咁點算啊...」阿宜聽到他們的對話，慌里慌張的吐一句。

胡文軒斷言道：「總之快快帶阿宜去Safe House先，其他野遲啲再講，只要佢喺房入面，我諗呢個兇手再神通廣大都做唔到啲乜。」

「同意。」子熹說：「而家既情況，我地根本無足夠證據捉羅明亮。如果我地分派人手跟蹤佢，真正既兇手亦有可能乘機傷害阿宜。咁就不如喺總部守候，等佢自投羅網。」

「咁唔好喺度久留啦，拿拿聲上去啦。」阿宜率先大步走向總部大樓入口。

「喂，唔好自己行啊。」胡文軒追上。

其餘幾人馬上跟過去。

MK晴緊接眾人走在最後，進入大樓前，她驀然回頭眺望遠處。

晴天背後，黑濕濕的雲霧果然躲於天邊一隅，慢吞吞的移動過來。

她輕輕撥弄金絲髮，推門進大樓。

Safe House設於大樓三樓。

無論在走廊上，等待電梯時，還是乘搭電梯時，路過的警員也注視著他們。

「消息幾靈通喎。」子熹說。

「你知啦，總部一向無秘密。」影姨笑說：「上次蘋果陳嚟同我地嘈，我諗佢應該將保護目標既事周圍唱啦。」

「呢個蘋果陳，永遠都咁黑人憎架啦。」胡文軒望著前路說。

走過了會議室後左轉，盡頭是一道不起眼的銀灰色鐵門。

門是上鎖的，門上方安裝了閉路監視器。

咔嚓，一聲開鎖聲。

「嘩！」胡文軒開門帶阿宜進去一刻，她驚喜的喊。

華麗的裝潢，淺藍色作主調的設計，雲白的地板上鋪上茶色絨毛地毯，還有真皮製的沙發，乍看感覺好像渡假時訂住的特色飯店房間。

獨立洗手間，掛牆電視機，盛放零食小吃的冰箱，滿滿書本的書櫃，還有舒適的大床等等。阿宜興奮得在房間裏奔跑，笑得合不攏嘴，差點忘了自己正面臨生命危機。

「我地呢度最長試過有證人住足一個月，所以你住一日既話，唔駛擔心會悶。」胡文軒略感自豪的說。

阿宜一把坐在沙發，拿起旁邊茶几上的遙控器打開電視。

「你地呢度有冇myTVsuper架？」

「myTVsuper？」站在門外的MK晴怔一怔道。

「係啊，無聊就要追劇架嘛，我仲有十集「愛回家」未睇啊。」

「果然識揀......」康仔聽後按耐不住，躲在一旁竊笑起來。

胡文軒從她手中拿過了遙控器，轉換了介面頻道。

「我地呢度只有Netflix啫。」

「我唔要Netflix啊！」

「無得你揀，你睇就睇，唔睇就罷。」他說過話後回頭而去。

阿宜連忙叫止了他：「等等先，咁晏晝飯呢？晚飯呢？宵夜呢？」

「雪櫃入面有乾糧比你攞嚟食，我地定時會添野食。」

「果啲野點食得落人架......」

「咁你當減肥啦。」

阿宜彆扭的別過臉，攤在沙發上瀏覽電視頻道。

其餘的人徐徐離開房間。

「咁你地唔阻你喇。」芊芊溫柔的跟她揮揮手。

「嗯...」她以鼻音回應，心早已跑進電視螢幕裡。

關上了門，胡文軒再次確定牢牢鎖上後，便與眾人一起前去保安室。

保安室是監視所有閉路監視器畫面的地方。由於Safe House裡也設有閉路監視器，保安室的多重屏幕能夠即時了解Safe House裡的情況，就是房間外的畫面也能看到。

「芊芊、康仔。」胡文軒在保安室門前停下說。

兩人答：「係？」