2019年先祝大家Happy New Year,希望大家新一年飛得多D遠D!
是咁的,2017年尾因為卡塔爾航空做特價,香港來回倫敦賣4,400蚊左右,於是我就買左2018年尾11月22號出發,12月8號回程既機票。
係買左機票之後,就開始準備編排行程;去大英祖國有幾個目的,第一係要睇飛機,第二係要睇波,第三係要睇火車。當中睇波係最難遷就,因為17日行程入面有機會撞到國際賽期,亦有機會撞到愛隊作客出戰,最後係6月中出賽程時終於鬆一口氣,因為小弟捧既垃圾利係12月頭會主場迎戰利市一哥愛華頓。
當所有事都準備好,包括Book酒店、買波飛、買Pass、買火車飛等等之後,去到11月21日收工後,終於都可以出發!