「Free Hug完啦？」
仔細看一下，似淡非淡的妝容，重點是她換了一條白色的連身裙晚裝加一對高跟鞋，雪白的小腿和剛才的妙齡OL不相伯仲。
「嗯，應該真係完啦。」
「唉，正話餐飯都唔知食得幾辛苦。」
這個時候我記起基神說過兩種令女生懊惱萬分的飯局，看來飯局的結果都不太重要，畢竟她還是記得回來找我吐苦水。
「有幾辛苦呀？」
「個氣氛好怪，而且有啲尷尬。」
話音未落，她打量了周遭的環境，
「硬係覺得喺度講好怪，好似有好多人望住我地？」
「咁.....等我一陣，可能係因為Free Hug個牌。」
因為Free Hug的燈牌招來行人的目光......才怪，這些目光大多數全是剛才的一場鬧劇而招來 － 藍帽子截停並查問偷拍狂疑犯。
「唔係呀，正話我行過嚟嘅時候聽啲人講話呢邊有警察截查偷拍狂，又唔知好似話有個智力有問題嘅人報警求助，你見唔見到係咩事？」
我再說一次，我沒有做過，而且我的智力絕對正常！
明天上班恐怕要戴口罩吧？
「我無......留意到呀，行啦！我地去維園嗰邊坐下。」
然後，我們率先到了便利店買了一些飲料，不過今晚的飲料不含酒精，接著我們到維園找了一個位置坐下，發現今晚維園的行人較上次多，不過依然無礙她把心事娓娓道來。
「其實今晚......我係同之前個男朋友食飯，佢嚟咗香港話當散心，我Daddy叫埋佢一齊食飯。」
原來是英國的前任來訪，難怪......
基神說的話有時候真的准得要命。
她的眼神略微憂愁，
「食完飯之後，我行去撘車嘅時候，同佢傾咗兩句，佢話人做錯至會發現，錯過嘅至係最好，求我不如一齊返，話保證可以變返以前咁。」
「難道你無心動咩？」
