童年處於2000年代頭幾年嘅小朋友，真係香港最幸運嘅一群

Gadylala 2018-11-14 06:04:46

幸運在於，可以親身見證同經歷到，外購動畫喺香港最鼎盛嘅年代。

內文有啲長，但希望大家搭車嗰陣又好、瞓唔著嗰陣又好，都可以睇睇佢，我相信喺連登一定可以搵到共鳴。

——————————

最能夠勾起一個香港人嘅童年回憶嘅，一定係粵語版嘅動畫主題曲，因為就算你冇睇過嗰套卡通片，都總會聽過下佢嗰首改編主題曲，而且係一種共鳴、一種返學小息會一齊唱嘅集體回憶。

而2000年代初嘅主題曲，就係最具代表性嘅一個年代，無論係製作水平定重視程度，廿一世紀初都稱得上係高峰。

「遇怪魔」、「魔法變變變」、「朋友最多」、「我要與你硬碰」、「賣弄球技」、「天黑黑」...呢啲先係真正嘅經典，男女都識唱，亦將會係一直被傳頌落去嘅集體回憶。

請劉德華唱數碼暴龍、搵郭富城唱爆旋陀螺，呢啲情境冇可能再發生。大台而家十套有九套都唔會改做粵語，就算求其改咗份爛詞，都係俾陳國峰、鄭世豪、上位前嘅吳業坤呢啲星夢奀星唱。就算唱咗，都冇人聽。

——————————

佢地重視改編歌嘅程度，大到唔係淨係改完詞就算，而係仲會有後續嘅頒獎禮。

每年嘅兒歌金曲頒獎典禮都係盛事嚟，沈澱霞會做主持，好多巨星亦都會返嚟大台，唱返呢啲看似有失身分嘅歌。陳奕迅同鄭伊健，都試過喺舞台上同啲公仔一齊唱兒歌。

而家當然都會睇下叱咤、睇下十大，但嗰種感覺，同以前睇兒歌金曲真係好唔同，以前會覺得自己都係一份子，自己都有份玩呢個party。

——————————

以前上網邊有咁多資源，唔似而家隨時上網睇返，甚至全套下載。如果放完暑假之後仲追緊一套動畫，真係要用盡方法，唔可以俾自己miss任何一集。

如果你返上晝嘅，晏覺唔可以瞓過龍；如果你返全日嘅，放學就要九秒九狗衝返屋企；如果你返下晝嘅，就唯有靠工人姐姐幫你用錄影帶錄定，等你放學食住晚飯睇。

再唔係就只好求阿爸買DVD俾自己，一集一集買仲要鬼咁貴，仲要啲配音真係完全聽唔慣......

但就係呢個原因，令我地更加珍惜每一幕、珍惜每一次成功睇到嘅每一集，令每一集都睇得更加有味道、更加投入。

——————————

除咗5:00呢個時段之外，兒童節目中間嗰半個鐘嘅卡通片，其實一樣高質。

我自己係睇住張美妮李天翔嗰代嘅《至Net小人類》長大，最記得2003年沙士，停咗好耐課，每日喺屋企都係《小天使糖糖》陪住我，亦都陪住全港嘅小朋友。(Sugar Baby Love嗰套)

而家變咗Think Big，無論主持質素、環節內容，都同「閃至放」冇得比，當然連動畫環節都取消埋。

——————————

喺二千年左右，科技同玩意都開始成熟，週邊產品越出越新穎同多元化，唔再好似上一代嘅小朋友咁，只係玩Barbie、Lego。

有通街都有人拎住搖嘅暴龍機、有要苦練幾萬招招式嘅超速搖搖、有改裝改到天花龍鳳嘅爆旋陀螺、有車頭件武器可以撞花屋企嘢嘅激鬥戰車等等。

比起Lego年代，我地嗰代嘅科技，真係進步得好快，甚至快到我地之後嗰代嘅小朋友都已經唔會理週邊玩具出得有幾好玩，個個捽住部智能手機，咁就過咗個童年。

我地可以好自豪咁講，我地15年前喺地鐵同人連暴龍機識咗A君、喺公園同人挑陀螺識咗B君。但喺2033年，當佢地俾人問到15年前有咩玩嘅時候，佢地又可以講啲咩？

——————————

當然，最根本嘅原因，一定係動畫質素非常高。男嘅離不開鍾意數碼暴龍、Pkm、高達，女嘅離不開鍾意百變小櫻、DRM、哈姆太郎。

每套嘅傳唱度都極高、角色好出名、劇情出色，正如你一定知道小智、愛德華、太一係邊套嘅主角，即使你只係個睇小魔女嘅女孩子。

我地睇數碼暴龍，會因為天使獸死而為阿猛傷心；睇寵物小精靈，會同小智一齊唔捨得巴他蝶噴火龍，呢啲就係劇情寫得好嘅效果。

而家除咗圓堂守之外，真係冇乜家傳户曉嘅角色。如果買而家啲小朋友，妖怪手錶主角叫咩名，我諗佢地真係未必答到你。

——————————

如果爸爸媽媽有裝有線兒童台俾你嘅，你應該更加感恩，自己有個更加精彩嘅童年。

Cable當年真係好有心機做好個台，除咗Bean哥哥同Amen哥哥陪咗大家幾年之外，佢地對啲外購動畫都好重視、好俾心機宣傳。

Keroro軍曹，係佢地快無綫N步，第一次喺香港帶起軍曹熱；
東京Mew Mew，喺亞視hit唔到，佢地買嚟做重頭劇，令套片喺香港真正多人識；
魔法小米路，香港小朋友唔知咩嚟，佢地係唯一喺香港播嘅平台
細個睇有線，佢地最重視嘅印象中就係呢三套，而我地亦都睇得好開心。

仲有華納動畫天地。有幾多人第一次睇嘅飛天小女警，就係三個矮妹嘅美國版；有幾多人第一次睇嘅X-Men，就係華納動畫天地嘅卡通版。

——————————

2000年代初嘅動畫，製作一定唔係最成熟，但無論係動畫水平、改編歌質素、玩具科技，甚至成個香港細路界嘅氣氛，所有野喺嗰幾年都咁啱處於一個適中水平：玩具冇過火，電視台冇hea做，細路冇忽視，造就咗外購動畫喺香港短暫嘅盛世。

而自己同好多連登仔一樣，都好慶幸出生喺啱嘅時間，做到嗰個年代嘅細路。被選中嘅細路，可能就係咁嘅意思。

Jellycat 2018-11-14 06:33:54

最鍾意係睇寵物小精靈