！！！我ig有有聲食評片！
-雞白湯拉麵$138
味道：講講個湯底先，因為坐吧枱嘅關系，睇到佢地少少做法，個湯係用左啲類似固體雞油嘅野用攪拌機打混左，個面有堆白泡，顏色好奶白，幾鮮甜同埋幾杰，雞油味好重，唔錯！
到啲麵，失敗！有鹼水味！！！
個湯已經咁濃味但都仲食到鹼水味，唔掂喎！而且唔多掛湯，質地就正常彈牙。再講講啲肉，碗野有2塊叉燒同埋2塊雞肉，2款都應該係慢煮同埋冇燒過，叉燒係類似火腿咁嘅薄片，偏瘦冇咩特別；塊雞肉就幾滑多汁同埋好甜，唔錯。
仲有個堆炸牛蒡幾靚嘅，不過味道冇咩特別。。
價錢：份量正常夠飽但偏貴，雞湯係比較少見，但味道未至於貴過出面啲拉麵。
-A4和牛牛湯拉麵$198
味道：依碗野唔知咩料！！！除左個幾塊牛肉好食(其實都唔關佢地事,佢地切完冇煮過放上去)，個湯普通牛清湯左啲蔥頭，似史雲生個盒牛湯味，由於個湯係清湯，啲麵食起上黎仲多鹼水味，垃圾！！！
價錢：碗野我諗得幾塊牛係值錢，同埋個湯冇咩油，飲埋湯都唔夠飽！！好唔抵！！！
-溏心蛋1隻$15
味道：整得幾好食，應該都係慢煮，好少有個蛋白咁軟身，個黃岩岩好膏狀，中間仲有啲流沙咁嘅口感。
價錢：正常拉麵鋪溏心蛋嘅價錢。
間野幾得意，啲人服務態度極好，會主動問你勁多野同埋推介埋，仲要笑笑口咁！
不過坐吧枱唔知點解個師傅係咁望住，唔知係咪我太靚仔？！
同埋啲碗同杯幾靚，仲有餐巾同埋濕紙巾比你，服務就唔錯啦但可惜食物唔掂！！！
不過有樣野真係要讚讚佢，就係個女廁好屈機！！！首先有部獨立冷氣，入面有Handcream,漱口水,髮夾,化妝綿,牙刷牙膏，連m巾都有！！！仲有一堆唔知咩黎，幾貼心嘅。。。
評分：5/10
評語：得個廁所值得去
溝女指數：7/10
帶囡囡去跑馬地依啲高級地方食野加分！仲要個廁所咁屈！
Ig：https://instagram.com/hkfoodghost/
