由我建立呢到既第一件事，我經常提醒自己，出發點一直都係為左方便大家，更特別係為左方便係外國因為時差問題而睇唔到直播既。
係呢件事上，我的確係無向達哥攞過一個正式既授權去進行備份呢個行為，而我亦到誤會左佢係呢一件事上既立場。當初我建立呢到，我無諗過會產生「妹仔大過主人婆」既情況，我只係想令到大家可以方便咁睇到佢既直播重溫。係訂閱數不停上升既時候，我了解到我自己好可能係一啲唔認識達哥既人既第一個接觸到既地方，我當時亦到提醒自己，我要盡力做好佢。
係14年既時候，我希望頻道可以給人一個好印象，而衍生左不同既版本予大家選擇。從頭到尾，我只係希望可以比到一個更好既視聽體驗各位。經歷過消音，block片，到限制我既上傳既時間，我亦到係達哥收台之後不斷諗方法希望係第二朝就比大家睇到。
至於我發帖問題，我從來都無擺達哥上枱既意思，我只係希望大家可以盡快搞清楚事件，而我亦到即時停片。我希望達哥佢可以比一個指示我，並無其他既意思。係我出左帖後，我並無諗過會造成咁大既影響，更加無諗過要指責達哥啲乜嘢。
至於另一方面既版權問題，我記得係2013年8月既時候，dvd透過YouTube聯絡我，希望利用我既備份去發出一份版權聲明。因為當時有一個人名為「監督與李燦森」既人偷達哥片，更甚者加上佢自家既水印，最後大家都成功檢舉到呢個人既頻道。
我只係一個學生。事到如今我已經十分後悔，特別係見到達哥因為開台而令佢自己身體變差，呢兩三日我不斷反思自己係呢件事上有邊樣係做到岩，講到尾我自己無一樣野做得岩。無攞授權，係我唔岩。私下開營利，係我唔岩。將件事放上公海討論，係我唔岩。係呢到我想向達哥作出一個最真心，最衷心既道歉。正如佢自己所講，日日開台直播令佢放棄左好多，而我就利用呢樣野去搵錢。而家既我已經十分後悔，亦都十分之自責，我亦都對達哥十分愧疚。
最後，我希望達哥或者其他有授權既兄弟可以聯絡我，好讓我能夠將我手上有既直播備份能夠轉交到達哥既手中。我亦都希望呢件事可以告一段落，令到達哥可以繼續開台。
利申：撐達哥
好撚假囉
