米蘭打吡大戰,國際米蘭憑住伊卡迪喺補時階段入球,鎖定一比零勝局,擊敗AC米蘭。國米隊長伊卡迪接受訪問時表示,球隊一直都好想贏呢場比賽,而目前最重要係維持穩定性。
伊卡迪喺九十二分鐘走位入禁區,接應隊友域仙奴傳中一頂破網。佢喺賽後接受訪問時表示:
「絕殺入波真係好爽,同舊年一樣。我依加連聲都沙埋。當時我見到個波飛緊入嚟,而對手中堅扯住我件衫,但最終我擺脫咗。但其實我地應該更早解決呢場比賽。」
「『要贏打吡』呢句說話,我地講咗成個星期,我地要贏!呢場比賽中,我地製造咗唔少機會,有一球越位入波,亦有中柱彈出。我地配得上今場勝利,而喺最後一刻鎖定,成件事更加正!」
「呢三分令球隊意識到,我地一定要繼續咁打落去。國際賽周之前,我同自己講『國米要贏』,我地要為所有人,包括入場嘅球迷,以及球隊。我地要繼續贏波,增加穩定性,咁未來一定會更加成功。」
「我地嘅目標係維持穩定性,然後到季尾,睇吓能夠達到咩成就。不過我地依加都係要繼續踢好波、爭取佳績。球隊亦知道自己具備潛力,我地係一支強隊,可以同任何人競爭。所以要繼續好似今日咁!」