原來連登先係最好嘅傾訴對象....

我曾經認為連登所有野都好負面..
成日上連登 個人都會變得憤世嫉俗 好消極
但認真了解過之後
呢個匿名平台其實係好多人心靈嘅避難所..包括我
我都冇諗過我會有日要藉住開post去抒壓

由細到大 人人都讚我樂觀開朗 永遠都笑住面對一切
人緣幾好 又有另一半 邊讀書邊打工
堅強樂觀到身邊好多人都話要學我 如果好似我咁諗就好
生活又好似多姿多彩 因為樂觀 做人又好似冇乜煩惱
連自己都催眠自己 「有咩事挨唔過去？」
萬大事 都最起碼有朋友 男友 父母 關心你在乎你..

但其實一切都好虛無飄渺。

當你內心最脆弱嘅時候 可以搵邊個傾訴安慰？
朋友？佢哋都有自己嘅生活 安慰得你幾多次
另一伴？你越傷心佢越難過 亦會自責自己幫唔到你
父母？佢哋其實都係人 亦會自私 自己都顧唔掂點顧你 反正佢哋從來冇在乎過我感受
所以 我好少同人訴苦 我亦唔想負面情緒影響到人
結果 原來我得呢個匿名平台 可以暢所欲言

每次有人讚我性格好 其實我都好想有人知道
我嘅樂觀開朗 只係假象 只係自欺欺人 只係自我安慰
成日又天真又傻咁 只係唔想面對殘酷現實
我唔係未成熟 只係唔想面上失去笑容
堅強係被迫 邊個唔想好好享受青春 而由高中開始邊讀書邊打工
屋企問題又多又複雜 甚至有家歸不得 我都只係笑笑口當笑話就算..
一直呃自己有咩大不了 大把人仲慘 係咪？

我一直覺得 要盡力對身邊人好 咁對方都會對你好
未感受過被愛 所以先對其他人咁好 希望有回報
而戀愛令我感到有一絲溫暖 所以我盡力做最好嘅女友
係另一半身邊 你先會放鬆 先可以做自己
我以為咁就夠 即使失去一切 都有彼此
但當要面對現實嘅時候 連另一伴都成日同我講
「愛唔可以當飯食」如果大家冇能力 可能最後都會散
以前 我相信世界有「永恆不變嘅愛」
依家 我知道人嘅感情真係可以好脆弱

即使有好多心事好多煩惱 其實冇人會在意
咩感情都靠唔住 無論擁有幾多朋友 有愛人有親人
人都係注定孤獨寂寞嘅。

第一次打咁多字..
如果你睇到呢到 好感激你浪費咗人生幾分鐘落我度

我有打錯字 「另一半」

好心你睇晒佢啦

永恆不變嘅愛係好痛苦嘅事黎

當你知道咩叫永恆嘅時候

幾分鐘的樹窿

你都試下講出黎 內心真係好過啲

睇黎你應該有好沉重嘅故事

已經好感激

too long didn't read

感覺其實係你自己諗太多, 閂晒所有門, 迫到自己咁抑鬱

你既朋友, 家人或者另一半, 可能比你想像中更有承受能力, 而你扮得太好, 佢地根本sense唔到你有問題需要開解

不如你試下搵人講左先, 或者佢地都會接受咁樣既你?

好有同感
永遠對住人哋一個樣
對住自己係另一個樣
好想諗清楚究竟心入面係想做乜 覺得好迷茫

我有試過..
結果 父母唔理 朋友安慰唔到幾多次
另一半佢話 我都幫唔到你..
然後就覺得自責 或者同我一齊悲觀

所以我先唔想再揾人講..我都唔想影響佢地..

我都好迷茫 好想改變現狀

佢本身都極度悲觀 現實
我又有咩理由要佢安慰我..

樓主一定經歷左好多野

其實又係既..自己啲氣場唔開心, 又唔想搞到人地都唔開心埋
好似不如開開心心過埋佢
點知返去屋企自己一個既時侯就爆

不過同人講左至少抒發到出黎呀
諗唔諗到方法又其次

但樓主近排係咪有啲咩事發生左呀?
我諗你都係頂唔順先上黎連登傾訴下

所以上網有樣野好就係講乜都得
太多野係現實生活開唔到口

搵個能夠互相扶持

有一半都係因為我on9

不過真係永恆了