(Post76.hk)
幾個月前金像獎，我開咗楚原叔個post之後：
【香港電影考古】楚原叔70年代以後電影年表整理 + 嘗試搵出佢口中嗰幾部仆街片
https://lihkg.com/thread/631714
其實我一直都想講一啲關於粵語片、香港文化嘅嘢，奈何一直都冇乜時間。
上年于素秋過身之後，我都出過一個post講粵語片，楚原叔嗰期之後重開過，大家可以睇睇：
【本土文化】有無人傾下粵語片 / 粵語長片？
https://lihkg.com/thread/632764
拖咗一排，其實我成日都掛住楚原叔個post入面有位叫「Blackcurrant」嘅巴打提議：「不如考慮下跟鄭君綿明星之歌嚟介紹下」
呢句真係戚起咗我條筋，想講下以前香港，從而畀各位認識交流一下更多關於香港電影嘅嘢，因為〈明星之歌〉真係一首我非常非常鍾意嘅廣東歌
，試過一日不停loop。 所以喺呢度特別多謝呢位巴打。以下嘗試整合網上所見同我個人所學，請多多指教同包涵。
希望各位多多支持香港文化、香港電影。
首先一定要講下綿叔呢首經典名曲〈明星之歌〉。我鍾意聽，一嚟因為係綿叔唱，好順口，二嚟的確可以透過呢首歌認識到好多關於舊時香港嘅嘢。我第一次聽呢首歌，其實係因為聽過達明一派1990年首改編版〈排名不分先後左右忠奸〉，之後重有好多版，總之就係一開波就「鄧小平」嗰首。
https://www.youtube.com/watch?v=3EUMvPSjBbQ
（達明一派：〈排名不分先後左右忠奸（有潮有唔潮）〉；2005年）
跟住一問老豆，先知原來係改編自綿叔呢首經典名曲〈明星之歌〉，就係咁就更加鍾意咗呢首歌。呢首歌係1968年出，而家流傳嘅起碼有兩個版本，初版係綿叔喺1968年12月公映嘅粵語片《大家歡樂在今宵》（陳齊頌、杜平、沈殿霞、森森、鄭君綿、羅蘭主演）入面唱嘅插曲版本。呢個版本都有收錄喺《大家歡樂在今宵》原聲大碟入面）
https://www.youtube.com/watch?v=arsdNmDZMXg
（鄭君綿：〈明星之歌〉；1968年）
另一版就係YouTube所見比較流行嗰個，收錄喺1974年文志唱片出嘅陳和美同綿叔合錄嘅《傷心淚‧明星之歌》大碟入面。陳和美係1970年代頭一個臺日混血兒女歌手，當年成日上《歡樂今宵》唱歌，有個朵叫「電眼美人」。
https://www.youtube.com/watch?v=pRveZPYWVHg
（鄭君綿：〈明星之歌〉；1974年）
(YouTube)
呢兩個版本歌詞有啲唔同。〈明星之歌〉大家都知就係唱一堆明星名出嚟。呢首歌既然係1968年作品，啲明星當然都主要係來自五六十年代甚至更早時期。
根據資深樂評人黃志華先生，〈明星之歌〉首曲本身係三首廣東音樂剪拼集合而成，至於詞就相信都係綿叔填。
（https://www.facebook.com/notes/wong-chi-wah/鄭君綿明星之歌如何剪拼曲調/10152181736444405/）
以下係歌詞，同時整合咗1968、1974兩版。為咗標啲明星名出嚟，我加埋數字落去：
[調寄何大傻撰曲〈花間蝶〉部分]
(1) 鄭君綿，(2) 林鳳，(3) 蕭芳芳，(4) 紫羅蓮。
(5) 凌波，(6) 金峰，(7) 李綺年。
(8) 李菁，(9) 李敏，(10) 謝賢。
(11) 狄龍（1968年版作「(12) 呂奇」），(13) 任燕，(14) 寶珠（即陳寶珠）、(15) 江雪 同 (16) 白燕，夠香艷。
嘩，(17) 白雪仙、(18) 阿任（即任劍輝）兩纏綿。
(19) 胡楓，(20) 薛家燕。
[調寄邵鐵鴻撰曲〈錦城春〉部分]
(21) 張揚，(22) 丁紅，(23) 胡蝶，(24) 朱丹，(25) 依達（1968年版作「(26) 高亮」），(27) 林艷。
(28) 沈殿霞，(29) 杜平，(30) 樂蒂，(31) 雷煥璇。
(32) 夏萍，(33) 鄧寄塵，(34) 尤敏。
(35) 歐嘉慧，(36) 高魯泉。
呢，(37) 矮冬瓜，(38) 張燕，(39) 穆虹，(40) 杜鵑。
(41) 上宮玉，(42) 王羽，(43) 邢慧。
(44) 高遠，(45) 丁亮，(46) 金漢，(47) 朱麗。
(48) 關山，(49) 李我，(50) 鄭佩佩，(51) 周璇。
呢，(52) 林家聲，(53) 劉克宣，(54) 上官靈鳳 和 (55) 石堅。
(56) 新馬師曾，(57) 李錦坤（1968年版作「(58) 李香君」），(59) 駱恭，(60) 李香琴。
[調寄何柳堂撰曲〈賽龍奪錦〉部分 (端午節爬龍舟嗰首背景音樂入面其中一節) ]
呢，(61) 于洋（1968年版綿叔唱多咗次丁紅，1974年版改做于洋），(62) 康威，(63) 汪玲，(64) 江青，
(65) 張瑛，(66) 寶寶（即馮寶寶），(67) 森森，(68) 金川。
呢，嫁咗嘅(69) 于倩（1968年版作「脫清嘅于倩」），佢重妙美曲線。
呢，(70) 馬師曾，(71) 薛兄覺先。
(72) 杜蝶，(73) 林黛，我內心懷念。
呢，呢啲相我也曾同見面。
==
呢堆人名，而家已經起碼有八成唔喺度。不過曾幾何時，佢哋的確係香港當紅明星。
呢堆明星入面，主要都係當年拍粵語片同埋無綫嘅本地影視演員，例如綿叔、芳芳姐、寶珠姐、肥姐、白燕(扁姐)、張瑛(十四叔)、鄧寄塵、修哥、家燕姐、寶寶姐、石堅叔；
有粵劇名伶，例如任姐、仙姐、琴姐、新馬師曾(祥哥)、林家聲(聲哥)；
另外亦都有啲主要拍國語片嘅兩岸演員，例如林黛、汪玲、江青 (呢個江青唔係毛澤東老婆，唔係四人幫嗰個，而係一個中國國語片演員)、鄭佩佩、于洋 (呢個于洋唔係無綫嗰位綠葉，而係一個中國國語片演員)、康威 (胡燕妮老公、尹子維老豆)
（白燕） (蘋果日報)
呢堆明星名氣其實有大有細，好似林黛、芳芳姐、寶珠姐、扁姐咁當年已經好紅，
至於矮冬瓜、高魯泉等嘅諧星，李綺年等嘅艷星，亦都有收入首歌入面。邁克都寫過一篇文講：
嚴格來說，鄭君綿的《明星之歌》歌詞填得污里馬叉，只求啱音啱韻啱字數，南北大小伶星一仆一碌接踵而至，幾乎沒有邏輯沒有道理可言。但它就是好聽，陣陣喜感教人過耳不忘，唱作人天不怕地不怕，以自己的姓名打頭陣都敢死，那種無心插柳柳成陰的福至心靈，後輩無論如何學不來。極一時之盛的亂點明星譜，真正做到排名不分先後，創作意圖除了貪得意大概沒有其他，在電影《大家歡樂在今宵》唱出的初版，騎呢到一個唔覺意「丁紅」出現兩次，後來錄唱片才將「丁紅康威汪玲江青」換成「于洋康威汪玲江青」。當中最大纜扯唔埋的，我認為是「關山李我鄭佩佩與周璇」，如果約他們四位同檯打麻將，恐怕未到西風尾便話不投機不歡而散。
一如微博高人所講，這兩個版本最令人感動的是把「脫清嘅于倩」改作「嫁咗嘅于倩」──當然真相可能是接到當事人投訴，不得不刪掉重口味。「呂奇任燕寶珠江雪同白燕」的「呂奇」變「狄龍」百思不得其解，莫名其妙的程度和「新馬師曾李香君」變「新馬師曾李錦坤」不相伯仲。歌裏的小花和甘草不勝枚舉，和達明改編的不紅不錄大異其趣，譬如林艷、矮冬瓜、高魯泉、朱麗和李綺蓮，從來都不是掛頭牌的一哥一姐，詞人不顧紅黑一視同仁的胸襟，或者才是真正亮點。事實證明，只不過半世紀，朱丹和胡蝶，丁亮和高遠，地位已經沒有什麼分別了。假如我堅持，全首歌最永恆的只有寧寧舍舍佔了整行的這一對：「夠香艷，嘩！白雪仙阿任兩纏綿」，反對的聲音應該不會有吧？
（https://hk.lifestyle.appledaily.com/lifestyle/columnist/4924617/daily/article/20120323/16181174）
