日本事務所食水深都唔係咩新鮮事,耐唔耐都有藝人同公司因為錢銀問題而反目,東洋偶像組合NMB48成員須藤凜凜花亮相深夜節目《AKBINGO!》就不吐不快,狂呻公司待遇大細超,比起AKB48成員,同門其他團體如NMB48、SKE48、HKT48、NGT48嘅成員人工都係零舍低。
現年20歲嘅須藤凜凜花,於13年參加AKB家族選秀大賽脫穎而出,年半年更獲重用,為NMB單曲《榴槤少年》擔任Center。不過須藤凜凜花上位後未見獲公司厚待,佢於節目上自爆不及同屆在賽事中勝出嘅AKB成員川本紗矢,凜凜花喺鏡頭前坦言後悔及不滿,更透露自己要節衣縮食,一個月內靠買椰菜切絲撈納豆作正餐,慳住過1萬日圓(約670港元)使費嘅貧苦生活。