痴撚線 餅舖員工 都可以專才移民香港
----
陳敏之投資開設嘅曲奇餅店，開業未夠4年，已經開咗8間分店，根據佢官網嘅介紹，即將會有4間店開張，其中一間就喺廣州。
有網民就發現，準備開張嘅廣州店，已經開始招兵買馬，而招聘廣告，就當然搵番靚老闆做生招牌啦，大大張敏之騷長腿靚相擺喺度，真係唔做都想睇吓啦，仲吸引到唔少香港網民留意㖭！
新開張就當然乜嘢職位都要請啦，當中包括正副店長、領班、售貨員同兼職，不過網民留意嘅，並唔係究竟敏之老闆要請咩人，亦都唔係齋睇敏之條長腿，而係招聘廣告最下方兩行用簡體字寫嘅字「表現傑出卓越員工 有機會獲公司推薦 香港專才移民」，有網民睇完，仲誤會咗廣告係畀香港人睇，留言問「香港專才移民廣州計劃？」當然，即刻有網民糾正話「大陸專才移民香港……」，但就唔明點解要用移民香港嚟做賣點。
敏之接受傳媒訪問就話：「我係負責香港嘅marketing，呢部份係大陸嗰邊同事搞，我都唔係太清楚，都要問下，但相信寫得出都應該係嘅！」
至於，另一個重點，係網民對於敏之曲奇餅店嘅工資議論紛紛，有人覺得8000蚊人仔太低，喺廣州都生活唔到，如果攞番同一個人工，嚟香港點生活，敏之就話薪金都係大陸嗰邊同事定，但相信價錢都合理。
