我喺沙漠度墜咗機，之後就遇到佢......

1

我六歲嗰陣，有一次，見到幅好壯觀嘅畫，幅畫係喺本講原始森林嘅書入面，本書叫做《真實故事》。幅畫入面有條大蟒蛇想吞咗隻動物佢。幅畫係噉嘅。



本書上面話：「蟒蛇會就咁將佢地嘅獵物成隻吞落肚，之後就郁都郁唔到，要瞓六個月去消化隻獵物。」我諗咗森林歷險嘅嘢好耐，我就成功用枝顏色筆畫咗我第一幅畫。我嘅一號畫，佢係咁嘅：



我拎住我幅傑作畀啲大人睇，再問佢地有冇畀幅畫嚇親。佢地答我：「吓？我點解要畀頂帽嚇親？」
我幅畫唔係一頂帽，係條蛇消化緊隻大笨象。我之後就畫埋條蛇裏面，等啲大人明我畫緊乜。佢地成日都想要人解釋嘅。我嘅二號畫係咁嘅：



但係啲大人叫我唔好理畫條蛇嘅入面定出面住，理下啲地理、歷史、代數同文法先。就係咁，喺我得六歲嗰陣，就放棄咗做一個偉大嘅畫家。我因為嗰兩幅畫衰咗而心淡。啲大人成日乜都唔明，要啲細路係咁解釋，係咁解釋，咁係一件好攰嘅事。

小王子？

我唯有揀過第二個職業，我揀咗做飛機師。我去咗呢個世界嘅一部份。不過講真，地理喺呢個時候都幾有用。我一眼就分到中國同亞利桑那。由其是喺夜晚認唔到路嗰陣，啲地理就更加有用。

喺我嘅人生入面，遇過一堆人，遇過一堆事，仲喺啲大人入面經歷過好多，試過同佢地好熟，但係我都冇乜改過對佢地嘅睇法。

每當我遇到一個睇落幾清醒嘅大人，就會用我幅仲 keep 住喺度嘅一號畫試下佢，咁我就可以知道佢明唔明白我嘅意思。不過佢地永遠都係答我：「幅畫係頂帽。」

之後我都廢事提嗰啲咩野蟒蛇呀，咩野森林呀，咩野星星咁。我就會就返佢地嘅認知範圍，講下啲橋牌呀，哥爾夫球，政治，同埋領呔咁。佢就會好開心遇到個咁明白事理嘅人。

小王子？

自己譯ga

2

噉我就自己一個人生活，冇乜邊個係真正傾得埋，直到六年前墜機跌咗落撒哈拉沙漠。副偈入面有啲野壞咗。身邊又冇技工，又冇搭客同我一齊，我就的起心肝自己一個人修理晒啲咁難搞嘅野佢，仲要對我黎講係生死由關。我有嘅水都係啱啱好夠我飲八日咋。

第一晚我就喺沙地上面瞓教，方圓千里都冇人住噉。仲慘過撐艇仔出到海中心返唔到轉頭。之後你可以想像下，我畀人嚇咗一跳，因為晨曦初現嘅時候，無啦啦有人細細聲咁嘈醒咗我。佢話：
「唔該……畫隻綿羊畀我啦！」
「吓？」
「畫隻綿羊畀我……」

我好似畀雷劈咁彈咗起身。我捽咗幾下眼，望真啲，原來係個豆釘，佢仲好認真咁望住我。呢度就係佢張肖像，已經我畫得最好嗰幅黎。



咁當然啦，幅畫就梗係樣衰過佢真人好多，不過都唔係我錯，因為我六歲嗰陣，我嘅畫家生涯已經完咗，最衰都係啲大人。搞到我嗰陣除咗條蛇嘅入面同出面之外，就乜都冇畫過。

我碌大隻眼睇下自己係咪撞鬼。唔好唔記得，我係喺方圓千里都冇人住嘅地方架喎。個豆釘望落又唔似係盪失路，又唔驚，又唔似攰到想死咁，又唔似好肚餓，又唔似好口渴咁。即係話，佢完全唔似係一個喺方圓千里都冇人住嘅沙漠度盪失路嘅細路。

當我醒勻之後，就問佢：
「咁其實……你喺度搞緊乜？」
不過佢講多咗次同樣嘅野，仲要慢慢咁講，好似好重要咁。
「唔該……畫隻綿羊畀我啦……」

當啲咁奇怪嘅事發生咗嘅時候，你唔會唔失去反抗嘅能力。喺方圓千里都冇人住嘅地方，就黎會死咁嘅環境之下，我好似好戇居咁，喺個袋度拎左張紙同枝筆出黎。之後我就諗返起自己一直喺度學緊地理、歷史、代數同文法。我就（寸寸地咁）同個豆釘講我唔鬼識畫畫。但係佢話：
「唔緊要，總之畫隻綿羊畀我。」

因為我未畫過羊，我畫返之前畫過嗰兩幅畫入面嘅其中一幅畀佢。就係喺出面望條蛇嗰幅。不過我畀佢嘅答覆嚇到我呆咗：
「唔係呀！唔係呀！我唔係要條個肚入面有隻大笨象嘅蛇呀。蛇好危險之餘，大笨象又太嘥位喎。我住嗰度好細架咋。我係要一隻綿羊呀，畫隻綿羊畀我啦。」

之後我就畫咗幅。



佢睇得好仔細，然後話：
「唔掂喎！隻綿羊冇神冇氣咁嘅？畫過幅啦。」

之後我又畫咗幅。



佢好寬容咁笑咗一下，
「你睇真啲，呢隻係山羊，唔係綿羊，有角嘅？」

我又再畫多幅。



同之前一樣，佢又話唔得。
「呢隻太老，我想要隻可以生存得耐啲嘅。」

我已經忍無可忍，想快啲拆開副偈黎整。於是我就 hea 畫咗啲咁嘅野畀佢。



我同佢講：
「呢度係個箱。你要隻綿羊就喺入面。」

不過諗都諗唔到，佢見到幅畫之後塊臉好似識發光咁，佢話：
「我就係想要呢啲野！你估佢會唔會要食好多草呀拿？」
「做乜咁問？」
「因為我住嘅地方好細架……」
「一定夠草畀佢食嘅，我畀你隻綿羊好細隻架咋。」
佢用個頭痴住幅畫咁睇，
「都唔細隻架喎……睇下！佢瞓咗呀……」

就係咁，我識咗小王子。

停左？

停左？

好似冇咩人睇

留名

Lm

Brother，好欣賞你翻譯既文筆，比原文易投入好多，而且圖文並茂，好有心機；

但點睇依個都係小王子既故事，你諗住山寨版咁係唔得Wo

利申：等睇完樓主解釋後俾正評

Lm

Good!!!

繼續

想睇埋先

小王子？

自己譯ga

粵譯
支持

但係蛇嗰度轉做大蟒蛇(定第二個品種?)會唔會啱啲?
我唔肯定係咩品種，但我無記錯嘅話原文應該係拉丁文二名法品種名來，而唔係大包圍嘅general name (snake)

原著： Le Petit Prince. Antoine de Saint-Exupéry (1943).
參考： The Little Prince, translated by Katherine Woods.

小弟嘅語文底子唔係咁好，希望大家可以多多包涵。
我主要都會係意譯行先，唔會話一字一句都會完全一樣。

同埋因爲呢個英文版同原著差少少，所以就算我唔係好識法文都要睇一睇。我譯嘅當中一定會有好多錯漏，希望大家指出同見諒。

我呢家只係見到佢係一頂帽 見唔到佢係蛇了