其實我對八爺唔算好熟, 我追得好多好雜, 同呢到啲真fans比, 我略懂皮毛啫, 不過八爺嘅才華真係好好, 曲同詞都好有意思同心機, 而且都算高產, 有興趣可以逐首慢慢研究, 我都仲只係研究咗部分, 努力中
V家全稱係vocaloid, 係一系列唔同嘅人聲軟件, 可以透過輸入唔同嘅音調、字詞模仿返人唱歌, 初音只係其中一個最廣為人知嘅角色, 仲有好多其他唔同聲音特色同人物設定嘅角色, 由低音男子到高音蘿莉應有盡有, 最新一代連黑人都有
原意係創作俾一班有才華但唱唔到歌, sell唔到自己啲曲同詞嘅素人用, 等大家都欣賞到佢哋嘅音樂, 但啲角色又紅咗, 被視為獨立創作, 所以都搞咗幾多爭議出嚟, 八爺幫初音十周年寫嘅主題曲砂の惑星都有提過下呢方面, 有興趣可以上網搵下分析研究下nico圈某程度算係由v家衍生而成嘅同人圈, 主要形容喺日本網站ニコニコ(niconico)衍生嘅作品、名人、粉絲等(niconico係日本曾經最大嘅視頻網站, 而家已經逐步被YouTube取代而萎縮緊, 不過仲有一定規模同影響力, 強国嘅bilibili就係抄上抄nico起家)
當時好多v家作品都係上載到nico第一次面世, 八爺當時都係用v家曲喺nico起家(順便提一句ハチ係八爺作為p主專用嘅名, 只會用嚟發表v家曲, 商業化/pop嘅作品係以米津玄師嘅名義, 一般係由自己唱返, 我覺得佢係有意識地希望大家分開佢兩個身份嘅, 所以發表砂の惑星嗰時都特登久違地用返ハチ嘅名義), 呢班創作人通常被大家尊稱叫うP(P主), 有p主嘅作品係紅到改編做商業作品, 亦有自己作品衍生嘅小說、漫畫、動畫, 有部分人紅咗入到商業圈之後就少咗寫v家曲
後嚟有啲想唱歌/鍾意唱歌嘅素人借咗v家曲翻唱, 有咗自己嘅粉絲圈, 呢班人日後被叫做歌い手(唱見/翻唱歌手)(順帶一提第一首被翻唱嘅歌叫メルト, 砂の惑星咁啱有一句“由メルト開始”, 八爺自己冇解釋, 但好多fans都覺得係講緊由メルト開始有咗翻唱生態嘅事), 主攻一啲好似我呢類受唔到電子音又鍾意v家曲嘅曲同詞嘅人, 有啲因此出名簽到做商業歌手(即係電視成日見嗰啲), 但因合約限制搞到合約期間做唔到翻唱
不過其實唱見入面有啲後嚟會自己作歌, 然後自己唱, 或者兼任p主, p主有時又會自己翻唱自己嘅歌, 所以都打到亂晒㗎啦
但因為v家某程度上受商業化同翻唱影響有啲息微, 所以會有v家fans鬧班p主同唱見借v家上位, 然後過橋抽板(冇錯砂の惑星又有寫, 有人話八爺係幫口諷刺, 但老老竇竇八爺自己都停咗好耐下v家曲, 唔覺得佢會咁擺埋自己上枱
, 不過將呢十年嘅事濃縮到喺一首歌, 八爺真係
), 總之有人嘅地方就有是非啦其實仲有跳舞、實況、vtuber好多範疇, 不過八爺冇涉足呢啲所以略過費事太offtopic
nico圈嘅歌手同商業歌手唔同嘅係, nico圈嘅歌手除咗活動以外, 其餘時間係可以保持素人嘅身份, 唔使講俾大家聽姓乜名乜咩出身, 除咗出live可以完全唔露樣, 淨係用卡通人設嚟做icon同宣傳, 甚至出live嗰時都可以帶面具/口罩遮樣保持神秘, 年齡由8歲至92歲都任佢哋自稱, 唔需要定期上節目/做訪問, 有啲人甚或係同時打緊另一份正職, 做緊好普通嘅打工仔, 將音樂事業當成消遣, 唔會有狗仔隊搞亂佢哋嘅私生活(但一樣有瘋狂fans), 唔會有人去挖佢哋嘅真實身份(都係除咗瘋狂fans, 同anti, 或者當事人爆出醜聞一沉百踩嗰時), 想要退出簡單一聲交代就可以消失喺互聯網嘅空氣上, 從此隱姓埋名, 就算突然消失隱退大家都吹佢哋唔漲, 仲有活動範圍會比較集中喺日本本土, 碟只有內銷冇下載, 演唱會通常係live house又冇海外場之類, 所以我自己覺得八爺雖然名義上商業化咗, 但實際上仲行緊nico圈嗰套
nico圈好處係自由啲同真係用自己嘅歌聲吸引人, 壞處係賺得真係少好多, 同除咗nico圈嘅人都冇乜人識自己, 不過近呢幾年因為nico圈嘅人都搞埋YouTube, 加上唔少nico圈嘅人開始有成績, 好似八爺冒起, 多咗翻唱歌手拎o榜一位同去巨蛋等等有代表性嘅大場搞演唱會(咪講笑真係場場爆滿爭崩頭), 唔少動漫、日劇開始用nico圈嘅人寫嘅曲同詞/搵佢哋唱, 仲有前面提過商業化咗嘅作品都紅得起, 有啲成幾年都可以好似富奸咁得閒出下周邊就有班死忠自己獻上荷包
慢慢愈嚟愈多人留意nico圈, fans已經比以前廣泛咗㗎啦商業曲同v家曲同nico圈嘅曲有人覺得曲風/類型有分別嘅, 我自己覺得冇
夾硬要講係後兩者有部分詞會寫得好露骨, 連大人都會頂唔順囉 基本上都係應用上有分別嘅啫, 大體分就寫俾動漫/日劇嘅歌同作為商業歌手賣嘅歌叫商業曲(包括pop song), 一般唔會釋出off vocal俾人拎嚟翻唱, 翻唱咗有時都會因版權問題而被下架, v家曲唔使講就用返v家唱, 一般會整埋off vocal方便大家翻唱, 大部分都係免費發布上nico同YouTube, 除咗同人專輯限定嘅情況, nico圈嘅曲有啲近v家曲, 但係p主特地為某個唱見度身定造寫嘅合作曲, 或者係唱見/p主自己寫俾自己唱嘅, 有部分會另外整多個v家版, 呢個情況通常都會免費發布同有off vocal, 都有啲冇v家版又照免費發布同整off vocal嘅, 同前面一樣都係除咗專輯限定嘅情況寫得太長, 好似有啲騎劫, 同各位sa個冧先
而有d fans就跟o左其他人走
第一次睇自己亂咁估
仲有排等...
仲要唱之前先換, 唱完嗰首歌又換返自己衫, 真係超有心機
所以都有人話八爺將自己投射咗入初音喺MV嘅角色身上
開日巡?
我仲以為你係日本人添
#
巴打入咗幾多隻同埋諗住抽邊場?
