2：呢條友，都幾癲。先放風話自己請到巴塞，然後再放風話啟德體育園拒絕佢申請；再涉嫌偽造一封email，話係啟德send出嚟向佢say sorry；最癡線係，佢涉嫌偽造另一封email，話有記者勒索佢1000萬，然後拎封email去報警。
我第一唔明，點解覺得唔會穿；第二唔明係，啟德體育園喎，香港重大基建喎，仲想起個棚喺度搵食？真係覺得走得出Ian嫂羅淑佩嘅法眼咩？
3：呢個黃浩霆，古惑嘢都唔只做過一次。之前高調話要收購AM730，然後懶好笑哋，開咗間公司叫「PM730」。開頭施永青開心到形容單刁係「開心價」，後來黃浩霆開100萬票「誠意金」俾施生，竟然寫錯年份彈票喎。好在施生挑通眼眉，之後就冇俾佢撚啦。
4：當然佢撚嘅唔止咁少人，我身邊就識有獵頭公司，都俾佢玩咗一大輪。
事緣Edwin Wong，上年年中左右，就主動聯絡一間獵頭公司，話要大展拳腳，要請人盛盛，「佢就好大口氣嘅，講到公司有200幾人，會不停收購合併。佢仲問我哋公司有冇興趣俾人收購呀，佢可以幫我哋上市添，呢啲緊係聽完就算。」
5：好啦，咁佢請人情況係點呢？有兩個例子，當時佢請PA，開7萬幾8萬銀一個月，最後獵頭公司都叫幫佢搵到兩個岩嘅人啦，結果，兩個candidate最後都reject offer，原因：「兩個人見個Edwin後，都覺得佢太鬼啦」。
6：一role未平，一role又起。佢又走去同獵頭公司講，準備收購一間拍賣行，想揾喺佳士德做過嘅人，幫佢負責呢個project，一個月人工開30萬，「好啦，最後有個本身接開freelance嘅candidate見成咗。咁Edwin出左offer之後，約都冇簽，叫人整個business proposal俾佢先。做起咗，準備onboard啦，佢突然就話收購有阻濟，要遲啲先onboard。」
仲有，「佢仲拍心口，單刁一定會順利完成，之後仲會搬去中環The Henderson開office添。」講到咁大，最後喺呢位candidate 臨返工前一星期，Edwin Wong就完全消失了。
7：可能大家都會有疑問，佢做咁多嘢，最終目的係想要啲乜。
其實萬騙不離其中，我之前都寫過，好似比華利山偽富豪設「天仙局」、「假名媛」Anna Delvey騙局一樣，都係利用假身份，成功呃到一班菁英，再由其他人去課金俾佢繼續營造假身份、假人設，同時利用呢啲真嘅人脈去包裝自己，從而呃更多嘅人。
所以上面佢做過嘅事，可能只係佢原本劇本嘅一部份，佢真正aim可能更high。不過，而家好明顯，智慧限制佢嘅高度。
8：今次事件，都仲有兩個正面啟示嘅，一，見到好多人一開頭都信巴塞會嚟，證明大家都相信啟德體育園，對頂吸球隊係會有吸引力嘅；第二就係，由Edwin Wong吹水內容反映，今時今日，同人講租咗中環The Henderson office，已可以成為身份地位象徵了。
