最根本原因係我識嘅人冇一個係因為大學生身份而成為人生贏家。冇一個係因為大學所以搵到人生意義/興趣、得到一種自己理解事物嘅方式、有自己一套待人之道、賺到好多錢。
小學同中學不斷逃學，因為逃學，我睇咗好多書同演講，慢慢建構世界觀。小學我已經知自己唔會讀大學，但中學令我對教育，返學呢件事好反感。
小學老師對我好好，我到而家都非常感激佢哋。中學老師冇話對我特別差啦，但喺佢哋身上我感受唔到佢哋對教學嘅熱誠，佢哋係返工，我明白中學嘅壓力肯定大啲，青年都比較反叛。但令人感到心寒嘅係「現實」呢個概念無處不在，而中學生嘅「現實」就係大學，老師攞大學不斷壓學生嘅思維。作為中學生嘅我睇到嘅「現實」係，嗰班學士畢業碩士畢業嘅老師嘅人生都唔見得有幾一帆風順，卻同我哋講讀咗大學人生會順風順水，會見識到大千世界，會有份好工。
..