預備篇
1. 呢隻game一開局就馬上進入求生模式，冇時間俾你慢慢入去先嚟學操作，建議未開始正式玩之前，最起碼玩咗個Tutorial先，起碼你要識點操作先好進入遊戲，否則真係入Game一分鐘就會慘死。
2. 玩完Tutorial之後，建議第一次玩乜Mod都唔好諗住，遊戲主頁揀Solo，Playstyle揀Builder，遊戲起點揀Rosewood或者Riverside。呢兩個地點比較適合新手。至於能力同職業，第一次玩建議揀Dextrous同Fast Learner，令執物資同提升技能快少少。由於首次玩嘅關係，唔建議咁快就嘗試用負面能力換取消耗8點能力值嘅高階能力。簡單開局玩咗先再算。
3. 當你入Game死咗十幾次，挨到頭十日之後，你可以開始嘗試玩沙盒模式，完全打造適合自己風格嘅喪屍世界。（稍後會講沙盒模式點Set）
上路篇
1. 第一次入Game，馬上撳Ｃ踎低。原因係喪屍嘅視覺同聽覺會令佢哋走向玩家，撳Ｃ唔只令佢哋比較難睇到玩家，而且進入潛行模式比較安靜，響屋內冇咁容易吸引屋外嘅喪屍注意。
2. 如果你係響民宅內開局，首先要做嘅係將全屋所有窗簾閂曬佢，然後檢查自己有冇着鞋。（試過真係開局係冇鞋着，踩到玻璃或者響街狂奔對腳流血跑唔到俾屍咬死）
3. 如果你已經閂好曬窗簾，踎低潛行的話，基本上你所在嘅民宅係可以挨到一陣嘅。所以唔好急於衝出去，檢查屋內有冇你所需要嘅物件。出門必備嘅包括：武器一到兩件（新手用鈍器其實比較好，可以打到喪屍跌低，俾時間你走位），縫紉針、較剪、錘仔、鋸、士巴拿、背囊、水樽、釘、手錶或鐘。食物反而唔需要帶響身邊，如果你打算返嚟呢間民宅過夜的話，到時返嚟食飯，又或者去其他民宅「帶外賣」返嚟食就夠。
4. 唔理你夠唔夠裝備，如果屋內有手錶有鐘就記得睇住時間做人，頭8日新手可以每日6am、12pm、6pm睇電視學木工、烹飪、拾荒技能。儘量遷就時間返嚟據點睇電視，但記得記得將聲量減到最細，否則外面d喪屍聽到電視聲又會嚟拍門拍窗。
5. 離開自己嘅民宅，先撳一撳個Esc，然後開Browser嚟呢個網站 https://map.projectzomboid.com/
地圖Load好之後，點擊右上嘅地標欄目，搵你所在嘅市鎮名（例如Rosewood或者Riverside），睇熟咗你自己所在嘅城鎮有乜響附近，然後先開始響遊戲入面正式探索。呢隻遊戲，識路同唔識路可以差好遠。周圍亂行好容易撞正喪屍群唔知走去邊，結果拉曬返屋企搞到自己冇地方匿。記住，新手嘅生還法則係要同喪屍玩捉迷藏，離開喪屍嘅視線範圍，然後用潛行令自己發出少d聲，再爬窗進出建築物甩開喪屍係最基本嘅手法。尤其響你未鞏固好據點嘅防禦措施之前，儘量拉喪屍離開自己據點，寧可兜吓路都唔好俾喪屍見到你直接入屋。
以上只係我自己嘅心得，歡迎大家討論新手上路第一局點玩
