其實仲有冇人玩Project Zomboid?

https://www.youtube.com/watch?v=nPbsDmzZ3Oc

https://www.youtube.com/watch?v=pU150792vtY

官網：https://projectzomboid.com/blog/
Steam：https://store.steampowered.com/app/108600/Project_Zomboid/

遊戲名稱：殭屍毀滅工程
遊戲原名：Project Zomboid
遊戲類型：寫實風喪屍末日求生
對應平台：PC (Steam, GOG)

Project Zomboid Wiki
https://pzwiki.net/wiki/Project_Zomboid_Wiki

Fandom Wiki （勁有用！）
https://projectzomboid.fandom.com/wiki/Project_Zomboid_Wiki

Project Zomboid 互動地圖（原版遊戲，部份Mod地圖都有）
https://map.projectzomboid.com/



呢隻遊戲出名開局難，但好玩在於玩家技術會越玩越勁
去到後期好多人都變身戰神，以一敵百殺到血流成河
前提係，你要有耐性，摸熟咗隻遊戲，知咩時候要做d乜

死，基本上係必然
呢個係遊戲嘅核心
This is how we died

究竟幾時更新 講咗成年 影都冇
又唔肯出住少少先

等緊減價 想買嚟玩下

Q&A
1. 隻Game嘅畫面好難頂，睇到已經唔開胃，點算？
放棄呢隻Game，但你會錯失幾乎係市面上最正嘅喪屍末日沙盒遊戲

2. 開局馬上俾喪屍圍，點算？
首先，開局馬上撳Ｃ踎低，唔理你開局響荒野抑或響室內，踎低可以迴避喪屍嘅視線，減少噪音，令喪屍冇咁容易發現你

3. 隻Game點玩，有冇結局？
呢隻係開放式求生模擬遊戲，暫時冇任何結局或者任務（以目前Build 41嚟講），你嘅目標就係響呢個喪屍末日入面儘量生存多一日

4. 有冇開局教學？
呢樣嘢YouTube有好多，不過如果有人有興趣，我都可以寫開局教學

5. 有冇多人連線功能？
有，你可以一個人面對數百萬喪屍，加入現有嘅伺服器，甚至自己setup一個伺服器，同一班朋友齊齊求生

6. 有冇得Mod個遊戲？
呢個係PZ最大賣點之一，隻遊戲嘅Mod多到拍得住《上古卷軸》，由增加功能、增加地圖、加槍加車加防具嘅種類，任君選擇。每一局遊戲開始之前，你都可以設定用邊d mod，自訂個世界嘅設定，總之調整到自己舒服先開始玩。

7. 開局響邊個城鎮最好？
新手最好去瑰木鎮（Rosewood）或者河畔市（Riverside），呢兩個地方都有d比較容易守嘅地方，比較適合建立據點，附近亦有唔少食物同工具，適合新手上路。

8. 隻Game嘅樂趣響邊？
單打嚟講，最好玩嘅係一步步集齊所有資源，提升能力，建立據點，然後去你想探索嘅城市，或者清空你所在嘅城市嘅所有喪屍。多人連線的話，基本上一班人分工合作求生又好，出去探險死過番生（又或者睇住隊友被咬死）臨場感十足，最緊要係夠真實，冇誇張嘅技能，全憑你同隊友之間嘅合作同默契。

9. Build 42究竟幾時出？
官方一直唔肯俾確切嘅日期。而家淨係話，預計2024會正式面世。

10. 乜嘢係Build 42?
PZ其實已經存在超過10年，一直都係話Early Access，而家大家玩得嘅版本叫Build 41（即係第41代版本），下個版本Build 42聽官方講將會係有史以來最大嘅更新，除咗製造方面嘅功能會導入新系統之外，遊戲畫面、流暢度、聲效、光影都會提高，亦會加入農務同畜牧功能，地圖方面將會加大兩到三倍，原有最高七層樓嘅建築會一口氣開放到32層，即係會有市中心摩天大樓跌喪屍落嚟嘅畫面，同時亦會加入多層地庫功能，有唔少地下建築（地鐵站、防空洞）以會相繼面世，俾玩家進入地底探險。

官方只係講過話2024內有可能會出。最近呢幾個月嘅Update不斷強調話之前佢哋新加嘅功能已經逐步加入遊戲裡面，試過曬話冇出問題。估計真係可能今年內會出到。

講番轉頭，個團隊真係好癲，呢一年好多以前做Mod嘅大神加入咗做正式開發團隊成員，睇住一個個新功能加入個遊戲，感覺距離Build 42面世越嚟越近。

你好似錯過咗個特價，前一兩個禮拜先做近特價，冇記錯大約$120到$150港幣左右

舊年同講故台幾個大佬一齊開伺服器打喪屍，結下咗喪屍小隊嘅情誼
齋等咗半年，Build 42仲未有得玩，乾脆瘋狂裝Mod

有幾隻Mod真心推介俾大家

1. Sixth Sense


呢個Mod我只可以話我不能沒有你。只要殺夠一定喪屍數量，將靈巧同輕足提升到相當等級就可以解鎖第六感技能。擁有呢個技能之後，只要有喪屍進入17米範圍內，你就會睇到警報響起，並且隨住喪屍越嚟越接近，由綠色轉變成深紅。不過由於唔知道究竟嚟嘅係一隻喪屍，抑或幾十隻，所以就算知，都只係俾你多少少反應時間，同埋周圍探索嘅時候冇咁容易俾喪屍嚇親（俾喪屍嚇個聲效已經嚇咗我唔知幾多次）。

2. Superb Survivors


單機覺得悶的話，呢個Mod就啱曬。呢個Mod會加NPC入個遊戲，班NPC會自己周圍去搵資源，設立據點，亦會有善意同敵意嘅NPC，要睇當時情況作出反應。我自己就試過有傻仔NPC同我引開咗幾百隻喪屍，方便我「入屋行劫」，亦試過有NPC衝入嚟我嘅據點，同佢惡戰一輪之後個據點俾喪屍攻入，搞到我要着草離開。

3. Proximity Inventory


又係一個我不能沒有你嘅Mod，響原版遊戲入面，你要一個個櫃咁打開，翻查入面有冇你需要嘅物件。但安裝呢個Mod之後，響你身邊2米內嘅所有櫃入面有乜，都可以一個按鈕全部睇曬。最重要係，就連屍體都可以用呢個功能。換句話，殺咗幾十隻喪屍之後，你唔洗再企響成堆屍體上面一個個打開嚟檢查，可以一口氣睇曬成堆屍帶咗乜嘢響身，唔會再錯過任何道具。

我不能沒有樓豬

等更新等左成兩年幾三年都仲未有

佢哋二月果陣話內部實裝咗地庫功能，同埋實牙實齒講話Build 42今年推出，講到明Official Announcement，信埋佢呢次囉

https://youtu.be/B9qZ3FYZvR4?si=PLSqzFtWaG2v7MHW

https://youtu.be/m3Tzna-nAM8?si=EutDnPkp-PGD7eAT

有冇server run緊？

強帖留名

LM

2014年買咗, 間唔中試下玩 次次都好快喺大街俾屍圍死所以擺低咗隻game
十年後前幾日先認真研究, 開始摸索到點樣玩原來真係超好玩

之前講故台某個大佬開咗個Server，不過已經停咗　
我都想知道有冇連登Server

佢個Tutorial其實真係有等於無，好多嘢要靠自己摸出嚟

譬如開局8點技能，我個人會揀Fast Learner同Dextrous, 因爲我冇乜耐性，技能升得太慢我會黐線，Dextrous係方便我執嘢快手d，好多時候俾屍追嘅時候，執到武器同執唔到係生死之間嘅差別，武器同Maintenance快d練高咗，方便我殺得更爽手，殺得更耐

另外，首次開局未有背囊之前，我唔會周圍走，主要係搵個可以匿埋，拉起窗簾嘅據點，然後將電視搬上樓，響比離開窗門嘅位置，方便我上午6點，中午，下午6點睇電視，可以一口氣谷到木工Lv 5左右（方便起無敵牆），又順手可以學煮嘢，唔一嚟就馬上食曬d罐頭。尤其響民宅或者住宅區開局的話，每家每戶嘅廚房收集埋d食物擺響雪櫃，九成可以挨到斷電爲止

講吓新手Tips：
個人嚟講，我係傾向官方冇禁止嘅話，就算出茅招都冇所謂嘅
所以我平常都會練一下木工，然後整所謂嘅無敵牆



無敵牆，就係用木圍欄夾住木箱。因爲一般喪屍無法翻越圍欄後面嘅木箱，而且普通喪屍唔可以攻擊圍欄（爬屍可以打爛圍欄，要注意），所以面對無敵牆嘅時候，喪屍只會不斷向前行，玩家只要揸住比較長嘅武器就可以90%安全咁清喪屍。（我之所以話係90%，原因係因爲爬屍會打爛圍欄之外，玩家用武器直接攻擊喪屍嘅時候，有機會被判定係攻擊木箱，當你面對幾十隻喪屍，而自己唔小心打爛咗木箱，咁d喪屍就會好似洪水咁響一個位爬入嚟，咁你就

除咗無敵牆之外，電視機亦係隻game set咗唔會遭受攻擊嘅物件，所以如果有辦法成排電視擺響度嘅話，基本上就算有成千上萬嘅喪屍，佢哋都只會係咁咆哮，對你完全無可奈何（不過玩家行太近會壓力爆升）

呢兩招對新手保命嚟講非常有用

唔記得咗講，小弟仲未甩P牌，要勞煩各位大佬幫忙推Po
我會繼續分享心得，講吓有咩mod好玩
若果大家有興趣一齊傾或者有問題想問嘅，可以一齊講吓

呢隻驚勁真實
試過唔記得打爆玻璃逃走唔記得執玻璃
結果俾玻璃界傷流血不止死咗

有時會睇片但冇玩
有冇得set啲喪屍喺你匿埋喺房嗰陣唔會自動嚟搵你
成日見到啲人匿喺密室都俾喪屍搵到好不解

前個月先買
一開始末日難度係咁死
明咗少少，人仔升級到咁上下，一時失誤被咬中真係
裝個繼承技能mod先敢出去

睇片未來更新個地下室啲背景聲好得人驚，我諗我會唔敢落去

點解到到都見到史提夫巴

以前試過玩10幾人ser
但一有人瘋狂偷玩好影響團隊既遊玩性

曾經run 過兩個月伺服器，留名