突然諗起細個大約三年級既時候, 有一次同個幼稚園就識既好朋友, 仲有我阿媽同埋佢阿媽出街
話就話行街, 實則其實係陪啲大人買餸
行左一陣我同朋友就覺得悶唔想行, 咁阿媽就俾我地兩個細路自己搭車返屋企先
返到屋企附近, 我地都好想食脆香雞翼
所以就每人夾錢買左4隻雞翼食, 因為冇錢買成個餐, 重記得個陣買左10蚊
個朋友唔太食得辣, 一邊食一邊嗌辣
幾年前呢個好朋友不在人世了
直到而家我都覺得個次係我食過最好食既脆香雞翼
又有一次我跟阿哥阿媽出去, 跟阿媽去探個朋友
個陣成日見到KFC廣告, 我同阿哥都成日話好想食, 但屋企個邊冇KFC
而且細個屋企好窮, 阿媽好少帶我地出街更加唔會點出街食野
去完阿媽個朋友屋企, 阿媽見到附近有KFC, 就帶左我地去食
重記得喺藍田食, 唔知間KFC重喺唔喺度呢
買左一個餐全家share黎食, 個種美味而今我都記得
出左黎做野之後, 而家我一個月都食幾次麥當勞/KFC, 但都再冇好似細個既時候食咁好味了
