【HiHi喇】我借左筆「靈魂信貸」......(2)

上個post
lihkg.com/thread/325399/page/1

各位我返來喇，大家唔使再擔心我遭遇不測，或者靈魂俾人吸左去喇

順帶一提，小弟首本實體書係各大書局有得買喇


尖沙咀誠品


呢個故暫時未知會唔會出，不過呢啲都要睇緣份啦

唔講咁多, 我地依家去文

FB 同步更新
www.facebook.com/icelemoncoffee

上文提要:

「小瘣妳無事呀嘛？」看著她鮮血淋漓的右臂，我不知如何是好。

「我無事.....」小瘣忍痛把一些藥膏塗在傷口上。

我看見藥瓶上的標籤，驚訝道：「黑玉斷續膏？真係有呢樣野架？可以補滿血架喎！」

「馬老闆亂寫架喳，」小瘣苦笑道：「入面係曼秀雷頓來架，依家用來止下血者。」

「咁點得架，妳流咁多血，不如去醫院先啦。」

「唔使喇，」小瘣搖頭道：「你俾啲時間我用靈力復元就得架喇。」

「唉....」我憐惜道：「小瘣你做咩要咁傻呀，頭先明明有咁多機會都唔殺死隻狐妖。」

「怪我自己輕敵啦，」小瘣這時己處理好傷口，「不過唔係咁，你又點會收伏到嗰兩隻狐妖吖，係咪？」

「其實小瘣妳係咪一直都係暗中保護我，無離開過呀？」

「係呀，」小瘣微笑道：「係見到你傻更更咁想用筷子夾散哂啲邪靈，我先忍唔住出手喳嘛。」

「哈，原來係咁......」

看見她為我奮戰得披頭散髮，我心頭一陣感動，便忍不住伸手過去幫她撥頭髮。

怎料到小瘣這時剛好轉過頭來，我的手指剛好叉中她的鼻窿。

「Sorry.....」我連忙把手縮回，「我無心架.....」

「嗯.....」小瘣尷尬萬分，「我都係入廁所梳洗下先。」

「吓....入面好恐怖架喎....」我猶有餘悸道。

「有鬼都俾你捉哂啦，」小瘣回眸一笑，便走進了公廁。

「唉.....」我內心一片惆悵。

這時手上的古玉突然傳來三尾的聲音：「哥仔呀，借問聲你係咪青頭仔來架？」

我惱羞成怒道：「關你隻死臭狐咩事呀！」

「無....」三尾道：「見你心事重重咁，想開解下你咁者，無咩我返入舊玉度先。」

「喂，」我喝止了牠，「咁你有咩高見呀....」

「哈，」三尾笑道：「咁你都睇唔出條女冧你？」

「吓？你點睇得出架？」

「所以話你青頭啦，」三尾沒好氣道：「佢唔冧你頭先就唔會為左你搏哂老命咁同我家姐打生打死啦！」

「係咪架.....」我內心竊喜。

「我鳩噏架喳，」三尾不負責任道：「我呢啲小狐狸識條鐵咩，嘻嘻。」

「唉，正所謂英雄氣短，兒女情長，」余公這時又來贈慶。

「好心你地食少啲花生啦，」我心煩意亂道。

「阿伯呀？」三尾突然問余公，「我同家姐可唔可以過你嗰邊個靈殼度住呀，呢舊玉入面好逼呀。」

「嘿，那你們可別打擾我安睡。」

「得得得，我地一定唔會嘈你老人家訓覺。」

三尾一說完，我便感到兩股寒意迅速從手上的白玉直竄我的膻中。

「嘩！呢度舒服好多咯！」三尾讚嘆道，「哥仔你副靈殼果然不同凡響！」

「喂！」我責罵道：「妳唔好係入面搞搞震啦！」

「吓....我無呀...」小瘣在我臉前愕然道。

我不知她原來己從廁所走出，連忙道：「唔係....我唔係鬧妳....」

「柒左啦，嘻嘻。」三尾幸災樂禍道。

好不容易下了山，還以為終於可以休息，小瘣卻道：「阿偉，我地係時候要起程喇。」

「吓？又去邊呀？」

「仲有一個時辰就係子時，係全日陰氣最重既時候，我地要把握時機收集多啲亡靈，咁你先有能力對付借錢俾你既財仔架。」

「但係我己經好攰喇喎，」我苦笑道：「況且妳頭先流咁多血，不如我地休息下先啦...」

「你覺得攰？」小瘣揚眉道。

「係呀，做咩呀....」

小瘣沒有回答，反而拉起了我的衣袖。

「阿偉，」小瘣皺眉道：「你啲屍斑己經上到去上臂喇....」

「點解會咁架？」我驚訝道：「咁咪好快會上到眉咯？！馬老闆唔係話我仲有七日命既咩？！」

「嗯....」小瘣臉有憂色道：「水能載舟，亦能覆舟，我諗係因為你體內積聚既亡魂越來越多，加速左你屍化既速度...」

「咁點算呀！」我用力想擦去手上的屍斑，無奈就是擦不掉。

小瘣尋思了一會，才道：「原本我諗住遲啲先教你，不過依家睇來要提前進度喇。」

我好奇道：「教咩呀？」

小瘣直視我的雙眼，回答道：「我要教你控魂術！」

「控魂術？」我難以置信道：「乜真係有呢啲野既咩？」

「嗯，」小瘣點頭道：「簡單啲來講，就係點樣運用靈力既方法。」

說罷，小瘣便拔出桃木劍演示道：「呢下係無用靈力既。」

小瘣隨手一揮，砍倒了馬路旁邊的一棵小樹。

「呢下係有用靈力既，」小瘣雙眼精芒一閃，揮劍橫砍。

馬路旁的一整排欄杆隨即斷開兩截，那斷口平整得就像被利器切割無異。

「嘩.....」我瞠目結舌道：「妳點做到架...？」

「呢下叫以魂入劍，」小瘣挽回劍花道：「有啲人會附魂入刀，每個人都唔同。」

「我知喇，我上網睇過好似有條友叫曲街小次郎，佢把刀郎都好勁。」

「你同我唔一樣，」小瘣答道：「我係將靈魂注入兵器，而你本身就係兵器。」

「咁我應該點做啊？」我還是一頭霧水。

「你依家合埋眼，試想像身體入面既亡魂係一種氣流。」

我聽言照做，卻感到體內空空如也，那三隻邪靈又不知跑哪去了。

「依家試下將股氣流導入你既右掌。」

不知怎的，聽著小瘣指引，我的右掌竟真的開始感到有一股熱氣凝聚。

「阿偉，你係咪感受到啲咩？」小瘣問。

「係呀，我感覺到右掌有道氣越來越熱。」

「非常好，」小瘣讚賞道：「你依家試下將呢股氣一次過發出來。」

「好！」我紮穩馬步，聚精會神地將右掌推出！

砵.......

我的右掌居然發出了清晰響亮的屁聲。

「嘻嘻，」三尾笑道：「原來你手掌識放屁。」

原來又是這隻死臭狐搞的鬼。

「唔好灰心啦，」小瘣安慰道：「係需要時間練習既。」

接住落來係新文

我和小瘣在一間通宵營業的茶餐廳坐了下來。

「兩個常餐呀唔該，」我向茶餐廳的伙計落單道。

「你唔係唔會肚餓既咩？」小瘣揚眉問。

「淨飲雙計嘛，」我苦笑道：「況且妳成日無食野，食多啲都好呀。」

「哈，我都唔係好肚餓者。」

小瘣雖然這樣說，但當侍應送上食物的時候，小瘣差點吃得連碟子也吞進肚裡，甚至還打包了一盒白飯。

「小瘣呀，」我啜著凍檸啡說：「其實妳點解識咁多野既？」

「唔好咁講啦，」小瘣擦了擦嘴巴道：「我都係跟馬老闆學架喳。」

「咁馬老闆究竟係咩來頭呀？」我好奇問。

「呢層⋯⋯」小瘣忍不住笑道：「其實我都唔係太清楚，不過我知道借錢俾你果個財仔，應該係馬老闆既師弟來既。」

「師弟？」我失笑道：「唔會係佢地原本師屬同門，之後Tony鬼迷心竅自立魔教呢啲老土情節呀嘛.....」

「唔係啦，」小瘣笑道：「聽馬老闆講，佢地好似係讀同一間中學咁者。」

「我頂，」我哭笑不得道：「原來係呢種師弟。」

「唔好講咁多啦，」小瘣站起來道：「依家當務之急係要幫你盡快掌握好控魂術。」

「咁我地去邊度練呀？」

「趁住就來子時，我地一於返墳場度練啦。」

喂 頭香

或許是我和小瘣的裝束過於奇特，又或是我們站在墳場附近，路上每架的士經過我們的時候，全都是加速離開，沒有一架願意停下來接載我們。

其中有一名司機更是放慢車速向我們膜拜了幾下才開車逃走。

如是者，我和小瘣只好沿著原路，徒步上山。

「阿偉，你依家仲有無咁攰呀？」小瘣問我。

「唔.....唔攰呀.......」我氣喘如牛道。

「咁睇來你要從基本要訣開始喇，」說罷，小瘣便拉我到一處墳前坐下。

「有怪莫怪，」我向墓碑叨唸了幾句才敢在小瘣臉前盤騰而坐。

空山寂寂，這場景有點像楊過和小龍女在古墓旁練功的那幕。

「阿偉，」小瘣正色道：「接住落來，我講既野你一定要留心聽好。」

「無問題，」我吞了吞口水。

一說完，小瘣便用桃木劍在地上迅速刻畫了一個人型的圖案。

「好劍法！」我不禁讚嘆道。

「假設呢個公仔係你，」小瘣用劍指了指地上的人型。

「嗯...」我側頭道：「咁妳應該話得再靚仔啲....」

小瘣沒理會我，猶自道：「根據道書《雲笈七簽》所記載，人有三魂七魄，其中三魂為天魂，地魂同埋命魂。」

「嘩！」我興奮道：「小瘣妳好似Hunter入面解釋「念」嗰個師父呀。」

實時監控出文狀況

「正經啲啦，」小瘣臉紅道：「而三魂當中，天地二魂常在外，唯有命魂獨住身。就好似阿偉你依家咁，其實係全靠命魂支撐住你既肉體。」

我聽了倒抽了一口涼氣道：「咁呢個命魂，會唔會就係馬老闆口中所講既靈堂一點清明？」

「無錯，」小瘣點頭道：「人之將死，七魄先散，三魂再離，所以當阿偉你僅存既命魂都離開你既時候，就係你壽終之日。」

「照妳咁講，我三魂當中既天地魂都抵押左，咁七魄呢？」

「所謂七魂，」小瘣拿劍在人型圖案上比劃道：「指既係屍狗、伏矢、雀陰、吞賊、非毒、除穢、臭肺呢七魄，統稱為「身中之濁鬼」，分別分佈喺頂輪，眉輪，喉輪，心輪，臍輪，生殖輪以及海底輪呢七個脈輪之上。」

「等等，」我舉手道：「妳頭先話我全身得番命魂，咁即係話我連呢七魄都抵押埋？」

「係啊，」小瘣苦笑道：「不過好彩既係，命魂乃七魄之根本，七魄乃命魂的枝葉。魄無命不生，命無魄則不旺。」

我瞪大眼道：「咁即係點呀？」

「即係擁有命魂既你，可以重新藴成過七魄，而最快既方法，就係透過吸納邪靈而來。」

「哦，」我似懂非懂道：「所以我地一直吸返來既亡魂，其實係為左重新塑造我既七魄！」

「醒目，」小瘣讚賞道：「一旦七魂化藴，我諗阿偉你就夠料去挑戰Tony喇。」

「咁我地仲唔快啲去捉鬼！」我跳起來道。

「無用架，」小瘣也慢慢站了起來，「自從你收伏左狐妖之後，附近既小鬼都哩埋哂喇。」

「班仆街小鬼居然淆底？」我搔頭道，「咁點算呀？」

「唔使驚，」小瘣笑道：「我特登等到差唔多子時先上來，為既就係要捉啲陰氣極重既厲鬼。」

「厲鬼？」我左顧右盼道：「係邊呀？」

「叫得厲鬼，」小瘣沒好氣道：「又點會咁隨便出來呀。」

「佢地唔出來，我地又點捉呢？」我攤手道。

「所以接住落來，」小瘣壓低聲線道：「我要教你聚鬼咒！」

留名

晚上十時五十五分，距離子時，即是全日陰氣最重的時辰，只剩下五分鐘。

我和小瘣來到一棵槐樹之下，靜默而待。

原本漆黑無星的天空，似乎還開始聚集起烏雲。

「準備好未？」小瘣問我。

「嗯，」我手中緊握著三條黑雞毛。

我們前面放著小瘣剛才在茶餐廳打包的那盒白飯。

「咒文都記得哂喇嘛？」小瘣又問。

「我盡人事喇....」我露出苦澀的笑容。

「時間差唔多喇，」小瘣退到槐樹之後，「我倒數三聲就開始喇喎。」

「唉....好啦。」我在飯盒前趴下來，胸口維持在離地三吋的位置，據說這是最接近靈界的距離。

地上的寒氣通體而來，四周的氣場亦好像頓時變得冰冷。

「就到子時喇....」小瘣的聲音從上方傳來：「三......二.......一！」

我立即硬著頭皮唸咒道：「陰山鬼神大山兵，吾奉神使鬼差來赦令，赦你烏鴉神將飛半天，催得凡間百鬼聚，離人散，三百六支骨節支支酸，支支痛……天開開、地開開、年開開、月開開、日開開、時開開、天散、地散、人散，仇人對面不相看，疾！」

一口氣唸完聚鬼咒，我隨即把三枝黑雞毛插在白飯之中！

霎時間，悶雷大作，山風四起！

我全身不由之主地被狂風捲向飯盒。

「小瘣啊啊！！！！」我大聲呼救，拼命想用手指抓緊地面。

「阿偉！！！」小瘣在樹後跳出，猛地向我這邊撲來。

可是我未來得及拉住她的手，便被吸進了飯盒的靈界之中。

正皮留名待續

pish

正皮呀

Copy and paste都咁慢

三尾

啊爺，樓主冇走數呀。

留個明

所以有頂你個臭肺就係咁解？

卒之有新喇

樓主你唔好再學富奸拖稿啦下
BTW, 繼續正評支持！