腳穿紅紅
2023-05-23 01:38:59
啱先睇完，覺得成個故仔真係對得住個書名，真係將成個「心」寫出嚟俾你睇。
我主要focus喺老師嗰條線度，冇乜點樣留意「我」，雖然描寫「我」嘅嗰啲篇幅都有唔少精彩位，例如「我」因為老豆就死而唔可以返東京搵工，去東京就不孝，但老豆又唔知幾時死，所以局住做廢青，但因為做廢青，屋企人又會想佢搵工，呢啲咁樣嘅兩難局面，寫得好到肉、好無奈。
想講講最後老師寫俾「我」嗰封長信，老師話：「......或許你無法清楚理解我自殺的原因也說不定，如果真是如此，也只能歸咎於時代的改變造成人們思想的差異，除此之外別無選擇。或者每個人與生俱來的個性原本就不同......」呢句野我覺得好關鍵。老師呢個驚驚青青、內心成日有好多小劇場、優柔寡斷、對自己嘅道德情操有要求等等呢堆特質，集合晒呢啲特質，先至令到佢最終只有死路一條，冇咗其中一兩樣我諗佢做人都可以輕鬆啲。正正因為佢呢啲咁奇怪嘅性格，覺得自己唔可以做啲違背道德嘅事，如果唔係就枉讀聖賢書，又好愛小姐，想娶佢，於是佢要使手段去擊敗佢嘅情敵兼好友K，但又睇唔起自己使手段，到K死咗，又唔敢將真相講出嚟，又嬲自己點解無膽講個真相出嚟，好多好多嘅呢類矛盾嘅諗法，都係逐步逐步推佢自己上自殺嘅呢條路。
同老師相反性格嘅人，可能會完全唔明點解老師會自殺，會覺得老師太廢。朋友鍾意自己鍾意嘅女人，咪同朋友講清楚囉，一係有人讓步，一係公平競爭嘅唧，將自己啲諗法收收埋埋，又要睇準朋友嘅心理要害一野隊落去，本身份人都少少陰險，但又要不屑自己咁陰險，呢種「眼高手低」嘅人（覺得自己應該要係一個好有道德嘅人，但現實自己唔係），其實係好無奈，如果降低自我嘅道德感，又或者提昇現實自己嘅道德實踐水平，都會有唔同嘅結果。唯獨老師呢一款咁矛盾嘅存在，仲要容許自己一直矛盾落去，直到自己推自己去到除咗自殺之外無路可逃嘅地步，典型嘅悲劇人物，命中注定冇好下場。