最後就係企鵝，既然企鵝係恐龍，咁所有嘅鳥類都係恐龍。但點解鳥類係恐龍，而滄龍、翼龍、鱷魚只係恐龍嘅親戚呢？
因為一個生物「係唔係恐龍」係是非題，無程度之分，所以一係佢就「係恐龍」，一係佢就「唔係恐龍」。
喺「唔係恐龍」呢個類別入面，你可以話佢同恐龍有幾大程度上嘅親緣關係，但正正係咁，佢就明確地唔係恐龍。就好似你可以話小明係你好親嘅表弟，但既然佢係你表弟，佢就唔係你啊爸嘅直屬血脈，佢唔係你啊爸個仔。
你可以當蜥蜴就係恐龍嘅表兄弟，但蜥蜴唔係恐龍，而麻雀、企鵝、雞鴨鵝通通都係恐龍個仔，所以麻雀、企鵝、雞鴨鵝就係恐龍，就正如霸王龍、劍龍、無畏龍係恐龍一樣。喺《裸猿》我邀請大家接受人類係靈長類，今次，我邀請大家接受鳥類係恐龍。
你可能都仲係接受唔到，有咩理由雀鳥係恐龍先？其實真係有理由，因為演化論唔係單靠眼睇，而係由身體結構證明出嚟。就好似鯨魚唔係魚，因為佢有退化咗嘅腳同會哺乳，所以佢係哺乳類一樣。
依家，講返蜥蜴同恐龍。為咗更清楚咁講蜥蜴同恐龍嘅關係，我會補充一下蜥蜴同恐龍嘅共同祖先──肉鰭魚。其實，肉鰭魚嘅其中一個分支，依家仍然同我哋一齊生存喺呢個地球。
