建議睇咗以下條Link先:
https://www.toy-people.com/?p=58495
重點可以睇左最底個幾段。
唔想睇文的話,
簡單啲講,
而家好多人概括有版權嘅叫雕像;
無版權嘅叫GK。
咁到底邊啲先有版權?
有好多工作室都有開訂,
其實大部分都喺無版權,
質素就要視乎工作室。
聽過好多師兄話GK不外如是,
原來佢地係睇完信和用膠盒包裝既大膠「GK」,
其實個啲完全唔係GK,最多叫「假景品」。
不過而家現時點同信和多左啲公仔機,
SHOW返啲真GK出黎,
相信有見過既師兄都會睇得出有名既工作室同真既GK真係靚到一個點。
當你想訂某個款,但又心大心細,可以黎問下大家意見。
(不過請附上圖)
當你買左新款,除左自己開箱開心(或者不幸奶左嘢好嬲),可以黎分享/呻下。
另外希望大家尊重下知識產權。
我聽好多人講版權雕對佢黎講無咩特別,
「有版權」唔係吸引之處,仲要賣咁貴。
老實講有版權最主要就涉及金錢,
閣下唔買唔係問題。
但請尊重有版權嘅工作室同堅持買版權嘅收藏家。
咁多工作室百花齊放,有好有唔好,
好就有良性競爭;唔好就侵犯緊版權,
同埋好易中伏或者呃錢。
有啲工作室官圖無限好,大貨係篤屎。
所以最好問下/做下research先買。
好多工作室睇熱潮,舉個例之前咁多鬼滅出,
好多新入坑玩家以景品角度比較,
當然覺得好正,但講緊以炒價三四千蚊,
已經可以買隻質素再高好多嘅款,
甚至乎買到有版權嘅雕。
當然你話有錢有愛,啲錢係你嘅,
你鍾意點洗我都阻止唔到你。
但乜野都搶乜野都炒,
只會令工作室愈出愈垃圾。
—
以下會有啲簡單Q&A,歡迎有問題再問,
戴個頭盔,未必識答,但識答嘅盡答。
1)講左咁耐,邊啲工作室有版權?
日漫就主要TSUME、開天、RYU、UA、鐵風箏、集美、OC
美漫就主要Prime 1,XM,Sideshow等等
2)邊到可以買到/訂到?
現貨就要問下代理,有時某啲款會有少量現貨
或者上Facebook d 二手Group/旋轉拍賣徵。
由於涉及版權,灰色地帶,唔會有鋪頭明碼實價擺現貨賣GK(海關有機會搞)
有錯請指出。
-
落訂嘅話請搵比較出名嘅代理,近排聽唔少騙案,唔好貪平個少少。
小弟搵開龍珠gk toys同專業gk訂,
香港gk都係比較大嘅代理,
Toy hunters都會有啲版權雕像訂。
另外想係gk zone hk訂野之前做少少資料搜集再決定訂唔訂。
3)訂 / 轉單 嘅流程係點?
訂:搵間信得過嘅代理,
比訂金代理>等工作室整>準備出貨>補款>速遞到付
-
轉單:同賣家傾好價錢,最好開個WhatsApp group,代理+買賣家,講明轉單(或者直接買張訂單,出貨自己補款)
到時出貨>補款>速遞到付
4)土地問題,啲盒掉唔掉好?
隻雕唔係好貴,或收藏價值高嘅話,啡盒就唔建議留(衞生問題);彩盒就最好留,除非你肯定自己唔會搬屋/唔會賣/唔會移民,或者好瀟灑平賣都無所謂,否則無盒要將隻野搬離屋企都幾困難。
但有啲盒成個洗衣機咁大,所以可以考慮租迷你倉擺盒。
5)買返黎爛左點算?
新買嘅就算無位拆出黎擺,都最好拆開檢查下(除非一心轉賣,有人追求全新未拆),
發現有損,即刻通知代理同工作室講,通常售後都會寄返補件比你,由於香港寄返廠唔平,佢未必要你寄返爛件比佢。
-
二手買嘅照問下代理,太耐無得售後就只能夠課金搵手藝人/上色師傅修復。
唔想課金就自己買啲混合膠痴下,最緊要過到自己個關。
6)咩係翻模?
有啲工作室專做翻模
例如古X、XX toys、X先生
即係將啲有版權/炒起左既款,照炒照做多批黎賣,但價錢平一半甚至1/3。
簡單黎講即係A貨。質素就見人見智,但有啲的確幾可亂真
有啲人會睇唔起翻模;有啲人會認為自己收藏無乜所謂。
即係你想買隻撈,但又覺得貴,最後買隻A貨。
有無問題就視乎你自己價值觀。