「恭喜客倌!」馬老闆笑道:「你成功收納左一批亡魂喇。」
「吓?」我望了望猶自握在手中的匕首,「我唔覺有咩唔同喎?」
馬老闆托了托眼鏡,道:「你依家試下向右揮一拳呀,」
我聽言試探著把拳頭向右一伸。
砰!
我竟憑空在牆上擊出一個大洞!
「嘩!好撚勁喎!」我又驚又喜。
「Ok啦,」馬老闆不以為然道:「你必須要收集多啲怨念較強既亡魂先有得同個財仔鍊下,不過你道行太屎,頭先唔係小瘣及時過一過啲陽氣俾你,你一早陰陽失調死左喇。」
「陽氣?」我奇怪道:「通常女性唔係陰氣重啲咩?」
「你有所不知喇,」馬老闆笑吟吟道:「小瘣係虎年重陽節午時出身,屬百陽之集成,陽氣極盛,所以佢個名先會有個瘣字來相沖返。」
「哈哈,我地一陰一陽真係好夾呀,」我向小瘣開玩笑道。
「溝小陣女啦,」馬老闆打斷道:「係你未收夠亡魂之前,小瘣都會跟住你架啦,大把機會啦。」
「多謝馬老闆!」我感動道:「我地萍水相逢你都咁幫我,我實在唔知點報答你。」
「閘住先,」馬老闆揚手道:「我打開門都係做生意既,你如果真係咁好彩攞得返個靈魂既話,就要返來幫我打兩年工。」
「無問題!」我拍心口保證。
「辛苦妳啦小瘣,」馬老闆向小瘣打眼色道。
「無計啦....」小瘣苦笑道:「鬼叫我都係幫你打工既咩。」
「有一點你地要記住,」馬老闆正色道:「就係無論點都好,你地兩個絕對唔可以發生肉體關係,否則後果不堪設想。」
「點解呀?」我失望道:「會有BB?」
「呢層馬老闆你放心啦,」小瘣臉紅道:「我絕對唔係啲咁隨便既人。」
「嗯,」馬老闆點頭道:「咁我都信佢溝唔到妳既,」
為免他說多錯多,我搶著道:「時間緊逼,無咩我地行先喇!」
「等我送你地一程啦,」馬老闆轉動了書檯上的墨硯,原本堵住入口的書櫃隨即移開。
我抱拳道:「咁後會有期喇馬老闆。」
「造化弄人,」馬老闆昂首嘆道:「希望你有命返到來啦。」