Anson Lo變劇透撈 明年推個人服裝品牌 《Megahit》學溝通 《永順街》對自己坦誠 再為台上落淚致歉：放心，OK！
#AnsonLo （阿撈） #盧瀚霆 曾於電台節目或live分享小六初戀、第一次被飛／被示愛經驗。初戀跟女同學在學校附近便利店拖手仔。至於被分手經驗，有次是「分咗手都唔知，講講下嘢跟住大家冇講嘢…」那時還是SMS心連心年代。另一次戀愛經驗是中學：「嗰陣喺MSN問佢可唔可以做我女朋友，以前好直接㗎嘛；第二日我拖佢隻手，佢縮囉。」
長大後的撈，入行前曾接受訪問，勇敢直白對愛情的想法和期待。今日（30日）他上《#叱咤樂壇》 宣傳新歌《 #永順街39號 》，也說：「如果我鍾意人嘅話，我會同佢講。唔鍾意轉彎抹角，如果佢唔受嘅，但我又好鍾意、覺得有possibility喎，我會繼續。」歌曲講初戀遺憾和初衷，撈說他比前更勇敢提出想法。
【曾想用初戀對象全名 為歌曲命名】
「我錄音嗰陣唔知點解係咁浮現初戀個女同學…」撈甚至想過用女方真名為歌曲命名，「我有特登contact呢位女同學…」笑稱兩人不常聯絡，「我問佢首歌可唔可以用佢個名啦，佢即刻講『唔得！』因為佢真係好驚俾人起底。」永順街39號是兩人小學校址，「去親邊度都一定經過永順街39號，係一個好標誌性嘅地方。我哋好轟動嘅，因為全校都知，嗰陣太細個，要見家長，我媽咪都好記得呢個女仔。」主持嘉姐 （#謝茜嘉）追問兩人怎樣開始，撈說：「再講就真係起到底㗎喇喎…」最後就範。兩人是同班同學，同一個sport team。女生屬高冷型，撈自言追求了很久，「佢係幾有挑戰性嘅。」
追求方法不離枱底寫字、紀念冊傳情之類，撈做齊，直接寫「我好鍾意你」，女方終於有少少反應，「但佢又唔係確認，又唔拒絕，令到我好……要繼續囉總之。」他對初戀的印象是「要黐埋一齊，拖吓手仔，去便利店食撈麵。」一碗兩份。這些畫面也見於MV裏，小六女生變成陳漢娜。
【錄歌落淚：向自己坦誠，要承認自己係唔開心】
「我覺得呢首係一首好慘嘅歌：以後就算遇到任何人，都覺得比唔上內心最鍾意嗰個。但錄嘅時候，心裏面覺得都係bitter sweet嘅，因為當時係puppy love，唔係太seriously…係好多愛喺裏面。」
Edward Chan也放手讓他發揮：「我相信每個人心入面一定有一個人、或者一件事會哽住，一諗返，唔開心嘅情緒仲喺度，未解決。第一日錄音，最後一個take我錄到喊。我覺得錄完呢首歌係一個釋懷，俾我釋放一啲壓力。」嘉姐默默聽畢，說：「《39號》只係個引子，或者係當年幾粒種子。我哋嘅人生路經過初戀之後，無論係愛情、工作、人生，都會有好多唔如意，甚至遺憾，所以呢首歌根本唔止係喺嗰條街發生嘅事，而係我哋嘅人生。」撈點頭稱是。
嘉姐表示覺得阿撈閒聊間多了一份從容，願意打開自己，撈也說：「我知道神徒聽到呢句可能擔心…人經歷咗唔同嘅嘢，就有唔同嘅choices，會轉變…《永順街》我想唱得personal啲，因為我覺得，原來坦白好緊要。我成日講《Megahit》教識我溝通，原來同自己溝通都好緊要，要處理好自己、同自己坦誠，知道自己有咩問題，內心go through緊乜嘢，你要承認自己係唔開心，呢個都係溝通。」
【「呂爵安唱完，第二句我已經…」】
日前《KKBOX風雲榜》頒獎禮，撈唱《#WeAllAre》時唱不下去，要請Jer柳應廷幫忙。他說：「我真係唔想咁樣，我好想…好…好完整地完成晒所有曲目嘅表演，我唔想因為喊唱唔到。所以由最後一首歌一起歌，一路望住個天同自己講，唔好唔好唔好，真係唔好喇。呂爵安唱完，第二句我已經…我知道自己應該唔得喇。」「作為表演者，我應該完成晒整首歌，但我做唔到，我覺得好對唔住…」
他再鄭重致歉，梁文禮說：「可能對鏡粉或者神徒嚟講，你喊都係一個表演嚟…」撈提高聲線：「唔可以咁講㗎！」嘉姐便謂：「我哋係人，都有感覺，唔需要講唔好意思。」撈之後連說兩次「唔使太擔心」，他謂：「現在我呢一刻嘅情況係輕鬆…同埋OK嘅，放心。」謂只是某些活動或事件令他突然緊張，「唔係每一刻都懷住嗰個情緒，大家唔使太擔心。」
節目第二部份，事先張揚劇透撈登場，撈說：
1.錄新歌
新劇《 #百萬同居計劃 》主題曲，曲風屬開心勵志、陽光；至於劇種，撈笑言屬荒誕、唔make sense唔logic，角色個性比較隨性。嘉姐再問詳情，撈笑：「12月5號自己睇！」
2.推出個人時裝品牌
撈喜歡時裝、喜歡買衫，由拍《男排女將》已開始構思成立個人服裝品牌，但一直拖至半年前才實行。「每件設計自己都有參與，包括logo，好自豪，好想每日都着，好有自己style。」謂希望大家「着得好舒服、覺得好好睇」「大家係會鍾意一啲小detail，一睇就知係Anson Lo設計嘅衫。」神徒能否優先購買？撈說：「當然係…可以啦！」主攻粉紅色？「呢個唔可以劇透，我諗神徒會好知我平時着咩色。」預告最快明年一月launch。嘉姐問會否開地舖？撈向花姐求救：「花姐呀救命呀！」
3.拍劇／電影
染了一頭黑髮的撈表示：「我嚟緊…」花姐示意唔講得，他硬生生將餘下句字吞回，但又不甘心：「我每次染黑色頭髮大家都知咩事啦，無啦啦唔會黑到咁。」他頓了頓，續說：「我想講劇本…唔係劇本…」在旁的嘉姐表示愛莫能助。撈一輪嘴說：「我諗一陣花姐鬧死我，花姐你唔好鬧我得唔得呀…花姐你一陣真係唔好鬧我…」但原來花姐根本乜都聽唔到，還問：「你講咗啲咩？」
4.2023年單曲
快歌，準備錄音。「我次次都咁講，呢首歌係我so far聽過最好聽嘅一首快歌。」
/
