跟 #Jeremy #李駿傑 （ #Remy ）這溫柔男孩只曾「近」距離接觸一次，那次他站在後排，默默為 #AnsonLo 按肩。他常說以MIRROR為先，今年3月Remy接受 #Do姐鄭裕玲《 #口水多過浪花 》訪問，他說：「我一直嘅夢想都係男團，所以我永遠都係將 #MIRROR 擺第一位。我成日都諗，希望MIRROR真係可以有十周年、可以再長啲，有幾長去到幾長，然後我先會再諗自己嘅未來係點。」
昨日他再應邀接受Do姐訪問宣傳第三首solo《阿波羅》，問他最驚甚麼，他說：「最驚…最驚冇咗MIRROR。」Do姐抬頭愕然地望他，大抵以為Remy會答最害怕昆蟲動物之類。Remy謂：「呢個真係而家最驚嘅嘢。人生嘅嘢嚟講，最驚冇咗MIRROR。」
Remy最近去完韓國日本，每天睡到自然醒。「主要行程係shopping，主要買衫。我唔會特登去睇風景，總之我好有目標，我知道自己要去買嘢，就淨係去買嘢。」MIRROR出道第一次去韓國，他預備了9千蚊shopping，結果大夥兒去了烏溪沙。Do姐好奇Remy每次出活動都有stylist，私伙根本用不著，他就說：「平時著吖嘛！」Do姐反問：「你有『平時』嘅咩？」
話題扯到vlog，《巨龍與豬仔》已很久沒出片：「之前同 #Stanley（#邱士縉）有個YouTube channel叫《 #巨龍與豬仔 》，但係因為大家好忙，又擱置咗。」他說「以前」，聽落有點傷感。畢膠索與梵膠，Remy不斷攻擊邱生，邱不斷笑他港女。Remy謂要再儲彈藥才能拍，期待 #巨豬 新片上架。
【笑NaNa發嬲好cute】
至於貓主子NaNa，Remy先是奉承一番：「聽過好多朋友嘅貓，如果（奴才）太耐冇返屋企，佢會發脾氣﹐周圍屙尿，我隻貓性格好好，我返到嚟佢會瘋狂嗲我，係咁黐身黐埋嚟。」笑指離港期間，NaNa像留守兒童那樣，怪可憐。「我隻貓好好笑，交畀朋友時佢冇嘢嘅，仲好開心添。直到我同佢講『NaNa我走喇！』佢即刻嬲喎！」又扮NaNa發怒的樣子：「好cute呀嗰下！」返港後接回NaNa，主子一見到他又嬲，回到家又沒事了。NaNa如知道Remy背後笑牠﹐記得十倍奉還。
Do姐還記得《全民造星》期間第一次跟Remy閒聊，他很多憂慮，擔心自己做得不夠好。現在呢？Remy說：「而家都係咁，但我學識咗適當時放過自己。」謂以前很在意外間怎樣看自己，令自己很辛苦。他最擔憂令fans丟架：「唔想令fans失望，呢個係我最大worry，好想佢哋proud of me，唔想佢哋成為unicornsss覺得羞家，要不斷push自己做得好啲。」他不滿意自己在《半》和《九》的表現，「其實當時已經覺得係可以再好啲，但未有能力做得再好。」今次《阿波羅》，「又係一隻令自己好辛苦嘅歌，」他大笑，「個辛苦係，不斷反思自己，好似做緊一首自己carry唔到嘅歌…」
【Do姐：點解咁harsh對自己】
Do姐問他給《阿波羅》演繹幾分，他想了想：「60分囉…」Do姐問：「你幾多分滿分？（Remy：100分）哎呀，點解咁harsh對自己？」要求他詳列清單數自己，嚴禁空泛負評﹐又說：「你係『悲』底㗎啦，悲底就扣好多分喇喎！」Remy也承認：「扣咗20分先！」Do姐再問：「你有冇試過perfect咁開心？」Remy想了想：「可能係開演唱會嗰時，MIRROR第一日出嚟，嗰日好開心。」很快又擔心，覺得自己樣樣都做得不好。
Do姐正色道：「我覺得你呢句要戒，Jeremy，你成日第一樣就覺得自己能力做唔到，係真嘅咩你覺得？我覺得唔係喎。」Remy不斷裝作撥髮壓驚，承認常這樣折磨自己，「但我覺得呢個係一個好好嘅動力，可以進步得快啲。」Do姐掩面：「咁樣好折磨…」又說：「我相信你已經畀晒你嘅嘢出去，佢點樣行就點樣行，你已經交咗你最好嘅嘢出去。」Remy憶述《阿波羅》錄音期間很挫敗，自覺越唱越衰，Do姐又「哎呀…唔好咁啦…」Remy已是隊中公認表現最穩定一個…
《阿波羅》MV，Remy最初想去冰島拍，成本問題結果去了北海道。十一月初抵達當地，因為日照時間短，拍了四日。「《半》睇到人嘅唔同面向；《九》睇到人唔同嘅選擇，《阿波羅》想講經歷完之後，點樣成為一個更加好嘅自己。」Do姐問現在的他是否一個更好的自己？他說是。「MIRROR出道四年，大家大大小小嘅事都經歷咗好多，我知道點樣愛惜自己、放過自己。」
《阿波羅》是三部曲終章，他計劃來年用「妖」入歌：「呢個係我嘅目標，係有啲難，但我想挑戰下。」他說也很想拍劇，但怯於爭取：「我好驚爭取嗰下，覺得好似係一件好agresssive嘅事…」擔心外間覺得他不自量力。Remy還說，很想跟Serrini合作。節目尾聲，Do姐給Remy一個願望，他想了很久還沒想到，Do姐說：「證明佢冇成日諗呢啲嘢，係一個好踏實嘅人嚟嘅。」最後他想到了：「MIRROR長長久久！」Do姐微笑：「你真係乖。」
唔好再提
