因為間民宿係男女分開房既關係,我感覺上都放心好多。
我唔係介意同男仔一間房,反正都試過同Nick同房,只係第一次住hostel,想熟悉下個環境先。
我間房都叫做乾淨整齊,裝修頗為簡陋,只有六張bunk beds,但空間感足夠,我check-in個陣得兩個女仔係度,就同佢地打左聲招呼。
示意圖:都係上網搵,個陣冇影到
其中一個美國女仔叫Cara,佢好熱情,不斷同我講佢係歐洲其他地方backpacking既經歷,仲話遲啲諗住去完歐洲之後,去泰國既廟體驗mediation一兩個月。
其實我都好想我可以真真正正咁拋低一切,冇後顧之憂咁樣去backpacking,逃離都市生活既繁雜同不安感。
奈何呢次trip只係我入社會大學前一個逃避現實既藉口,諗起之後可能要晚晚加班既日子,我就更加覺得要珍惜呢次旅程既每分每秒。
______________________________________________________
Cara問我想唔想等陣一齊出去行,因為佢都係今朝先到。
但我諗起Nick,覺得冇理由無啦啦自己走左去,三人行又好似有啲奇怪,所以都係禮貌咁話我同左個朋友一齊黎。
呢個時候,有人敲一敲我地既房門,因為我張床比較近,所以我去左開門,一打開,原來係Nick過黎搵我。
Cara見到Nick,就即刻露出四萬咁口既笑容問:
“Hey there, are you Jess’ boyfriend?”
我即刻好緊張咁話唔係,而Nick就乜都冇答,淨係企左係度,對住我笑。
“Aw, what a shame, you two make a cute couple!”
以我同西人相處左咁多年既經驗,佢地對呢啲野真係唔會避忌,因為只是一個善意的玩笑。
雖然我覺得冇所謂,我係驚搞到Nick尷尬姐。
「乜你好驚人地以為我地係情侶咩?」Nick反而若無其事咁問。
「呃…唔係,都係實話實說姐。」唔知點解我仲尷尬過佢。
「知喇傻妹,快啲準備好,我地就出去行下啦。」
佢好快咁摸左一下我個頭,我彎起嘴角微微一笑。
摸頭對於男仔黎講究竟係一個點樣既概念?一種征服感?
我就話有時會摸下一啲好可愛既小朋友,覺得咁樣係表示對佢地既喜愛,唔通男仔摸女仔頭係出於同一個原因?
依家諗返起,我個刻心入面應該真係偷偷地當左我地係情侶,即將要係呢座古城展開我地既浪漫之旅。
今日出左成二千字要補充下元氣先,唔係之後個幾日交唔到文
聽日見