呢篇都係想介紹下五漁村居多,可能有少悶
《意大利篇—五漁村 Cinque Terre (1)》
唔知大家仲記唔記得,我咪話過成個意大利,最想去Florence同Venice既?
佛羅倫斯就去過喇,但始終冇踏足過威尼斯。
原因係我地第二晚喺佛羅倫斯嗰陣,已經開始諗定意大利之後去邊度好。經過一番Skyscanner同GoEuro既搜尋下,我地決定左去法國,再順住上去德國。
只不過因為由Venice出發既話會耽誤左少少個行程,所以被逼放棄。只好留一日喺五漁村,然後就要返返Florence出發去法國。
「其實五漁村都好靚架,有好多彩色既屋仔,同威尼斯嗰個彩色小島都有幾分相似。」
Nick嘗試安慰去唔到威尼斯既我。
「其實你唔講,我都真係未聽過五漁村呢個地方,聽落去都幾得意既。」
去唔到我其中一個Dream Place,難免有少許失望,但我都努力嘗試唔去埋怨啲咩,因為呢刻我已經非常committed要同Nick一齊周圍去,冇諗過自己一個走左去。
*
第二朝我地晨咁早就起左身,連間Hostel都未開始serve早餐,有少少掛住佢杯咖啡。
從佛羅倫斯去五漁村,一啲都唔難。只要去返第一日嗰個中央火車站,直接喺自動售票機買飛,13歐羅度,但注意目的地係一個叫「La Spezia Centrale」既地方,上面並無「Cinque Terre」呢個選擇,原因等陣會講返。
頹到極致既我地,走左去火車站對面既麥當勞食早餐,但今次應該係心理因素吧,我竟然會覺得麥當勞(非McCafe)啲咖啡好飲。
成程火車大概兩個鐘多啲,途中會經過Pisa站,即係好出名嗰個比薩斜塔既所在地,所以好多人去五漁村會順便去埋Pisa,不過我地因為時間關係,就放棄左去嗰度,其實每個人去到,咪又係擺個做到爛既推塔Pose就走,對我黎講冇咩特別。
魚與熊掌,不可兼得。
女人既心情真係可以好反覆,琴日我係個唔襯衫,吹啤酒既女漢子;今日我係個為左影相呃like而特登襯衫既港女。而Nick照舊都係著得好平凡。
由於早出發既關係,整夜無眠既我理所當然喺火車又訓著左,朦朧中感覺到我有好幾次唔小心訓左喺Nick膊頭,不過自然反應下,好快又彈返起身。
2小時12分鐘後,列車到達La Spezia站!
一直唔知道有呢個地方存在既我,當然對呢度尤其陌生。
猶記得踏出火車站,只見到小屋幾棟,並無想像中既彩色屋山丘。
「說好的彩色屋仔呢?」我一臉著急咁問Nick。
「唔好咁心急啦,都未到。其實呢度仲未算係五漁村架。」
佢耐心咁同我解釋,原來五漁村顧名思義,係有五個村鎮所組成,而喺La Spezia再搭火車轉乘到第一個鎮(Riomaggiore),車程只不過係十分鐘既事,班次亦非常密。
當我地順利到埗第一個村鎮時,我喺火車站既圍欄旁見到前面既一片深藍色大海,海浪聲不斷衝擊著懸崖,頗為壯觀。
出去車站後需要行一段樓梯路先會到小鎮既中心,雖然仲係未見到心目中既景象,但沿途既風景已經足夠令我慢慢欣賞。一邊行一邊回望時,就好似見到全島既風貌咁。
Riomaggiore好似係最多店鋪同餐廳聚集既鎮,兩旁既建築物都被塗上唔同色,就好似置身喺一個童話式小鎮咁。不過因為係渡假勝地,比較少見到真正當地人既生活,街上大部分都係被唔同國家面孔既人擠滿,人流亦絡繹不絕。