https://m.facebook.com/story.php?story_fbid=pfbid0gmXmSbCtMoxm1MFapXzC2DT2PrMzXxdeia47i73ZXDaDhFV6mXb6VUP5t1Gyp6rJl&id=100063865003401
飯戲攻心 (Table For Six) - 亂搞一家人
7月23日 MOViE MOViE Cityplaza
-
原定今年賀歲片之一嘅『飯氣攻心』躲避暑假鏡仔電影大戰,毅然轉戰中秋檔期。不過喺四月中戲院宣布即將重開時,短短兩日宣布過三次唔同嘅檔期 - 由6月變暑假再變中秋,唔肯買定離手始終睇唔透整體市況嘅。
.
導演兼編劇陳詠燊前作『逆流大叔』其實我就唔收貨嘅,不過外間反應非常好,我唔明有咩咁出色嘅地方。估唔到情況同樣出現喺『飯氣攻心』上,觀影當日全場反應異常誇張,接近「笑冧櫈」兼且一開頭已經係成班觀眾係咁笑,但可惜真係冇辦法令我發笑。
.
啲Gag位過多「字字珠璣」咬文嚼字,完全唔識得適可而止,對一開始無法投入嘅我嚟講越睇越難頂。不過可能普通街客會受落嘅。
.
點解我會投入唔到套戲呢?正正係因為套戲完全係無「開頭」!最基本起承轉合至少套戲開始要「起」先啦,『飯氣攻心』一開就掛住搞gag忽略劇本基本需要。
.
呢套戲個劇本絕對能夠成為教科書例子 - 喺差嗰方面。電影絕大部份場景都係喺屋企發生,非常考驗編劇功力,因為單一場景推進劇情真係靠人物關係同對白。而三兄弟感情建立得「來又如風,離又如風」、子華堅持唔賣單位同堅守呢頭家嘅原因薄弱。
.
既然每餐飯係關鍵之處,係爆發角色矛盾同衝突時但之前又無充足鋪排,淨係用咗好多時間嚟搞gag。明明主軸就係講子華如何面對二佬繼聰同前女友一齊,實質內涵上係充滿情感掙扎,但佢將所有發揮嘅空間用嚟堆砌喺無數笑話身上。
.
所以當後半段忽然情深上嚟,但轉眼間又變返搞笑,如此割裂恍似精神分裂,親情訊息建立得薄弱,又係典型犯咗好想比觀眾帶着有意思嘅訊息離場而夾硬強行灌輸落套戲到。佩服導演以作品說話,向學生說明劇本嘅重要性,老師真係用心良苦。
.
不過誤打誤撞現時中秋檔期又符合電影最終訊息,面對現今移民潮,無謂再堅持人在家在。正所謂苦苦堅持經已沒意思。
.
鄧麗欣角色設定為鍾意保育香港舊物嘅「文青」,雖然設定同成套戲冇乜關係,唯一牽強可以結合返子華角色嘅無謂堅持,但係個連繫係唔夠出。感覺只為美術指導堆砌一個好多舊物嘅景而做嘅原因。
.
演員方面必須一提Stephy扮神經質潑婦完全係好難頂。呢種比阿寶更港女嘅角色真係唔適合佢做,為佢近年演出再創新低。全片唯一尚算討好就係明禎,雖然佢嘅廣東話依然都係喺講對白上非常吃力,但至少最尾啲情感位都交足功課先嘅。
.
戲中主角經常撞到門口部足球機,但明明成間屋咁多位行佢哋都會「唔小心撞到」,呢種夾硬嘅刻意正正就係我咁討厭呢套戲嘅原因。
.
為咗自以為嘅搞笑罔顧電影一切需求,連基本故事都講唔好;演員為咗滿足導演搞笑慾望,連戲都做得差。