般奴古馬雷斯
2022-08-31 12:43:03
米祖域5戰入5球 直逼夏蘭特
今季英超新升班球隊富咸又有佳作,喺周三(31日)凌晨主場以2比1擊敗白禮頓,前鋒阿歷山大米祖域又入1球,呢位27歲塞維爾亞國腳今季英超5次上陣入5球,風頭直逼有6球進帳嘅曼城射手艾寧夏蘭特。
雙方上半場互無紀錄,換邊後僅3分鐘,阿歷山大米祖域近門射入,為富咸取得領先優勢。僅過7分鐘,富咸打反擊,導致白禮頓後衞李維士鄧克擺烏龍。
雖然白禮頓之後由阿歷斯麥亞里士打射入12碼,追番1球,但都係無法收復失地,被打破今季聯賽不敗之身。
至於富咸踢5場聯賽取得2勝2和1負,唯一敗仗係不敵榜首阿仙奴,更曾經打和利物浦,演出令人驚喜。
贏波功臣阿歷山大米祖域以前曾經為富咸踢過2季英超,合共僅入14球,踢2季半英冠入咗81球,其中上季有43球進帳,因而被外界嘲諷係「英冠神射手」,難登大雅之堂。
佢今季大踢爭氣波,以入波數字證明實力,只要保持水準,甚至有力問鼎英超神射手寶座。