錢係我最大嘅戀物癖，22歲輸晒所有身家

SnoopDoge 2022-08-02 12:44:48

19年開始炒幣，上年牛市最高炒到上8位數，之後就一直輸錢，上上落落，直到去到前幾日利潤連本金30萬都輸埋，而家銀行得返千幾蚊。

我而家個心態係真係行唔到出嚟，尤其是係擁有過之後再失去，而家我個心態其實我唔識用文字表達出嚟，我其實係想了解在座咁多位前輩係經歷呢啲事情嘅時候，係點樣去渡過呢一個階段？

小弟文筆唔好，我長話短說啦，唔知有幾多人會想聽我嘅故事

一切嘅故事要由19年講起，當時我啱啱讀咗半年時裝設計就輟學，原因係抑鬱，我自己知道以我當時嘅狀態係冇可能讀到落去。

而我抑鬱嘅主要原因其實係由屋企人對金錢嘅價值觀造成，但我其實直至而家都冇同佢地溝通過佢哋嘅價值觀對我造成好大嘅壓力，要搵一個開口嘅機會其實唔容易，我同時間會覺得我唔能夠達成父母嘅期望會好對唔住佢哋。

當時我都有自己去睇心理醫生，但係嗰費用實在太貴，半個鐘頭就收我三千幾，仲未計藥物嘅費用，嗰時我仲讀緊書，我唯一嘅收入來源炒賣潮牌，一個月收入1萬幾，我負擔唔到繼續睇醫生嘅費用，同時間我覺得心理醫生其實根本幫唔到我，只有藥物先幫到我。

跟住落嚟呢一個決定應該就係我人生嘅一個轉折點，當時喺網上發現有地方可以用一個合理價格去買Xanax，但係淨係收bitcoin，果次就係我第一次踏入虛擬貨幣嘅世界，仲記得當時Btc先$4xxx u，同時間我都慢慢開始炒幣。

我唔知呢個對於我來講係救贖定係懲罰，我當時對呢個世界其實冇乜慾望，我淨係想賺夠一筆錢俾我父母，然之後就離開世界，但係慢慢嚟炒幣嘅過程中發現有多巴胺可以提供到快樂俾我。

之後就一直都炒得好順利，312 519 呢啲日子都避開晒，又成功扑中 doge shib gala 呢啲幣，個時一路炒幣都有喺telegram 度開Channel，其實我知自己係牛市股神個類型，我淨係好彩先可以賺到咁多錢，但係都有幾千人follow我。

我見當時牛市咁瘋狂咪諗住睇吓自己影響力有幾大，跟住我就開始慢慢入一隻細幣嘅現貨，同時間都開埋合約，跟住再搵日喺tg Channel嗰度號召啲人埋佢，我都唔怕開名，嗰隻幣叫ZEN ，其實當時市值都唔細，有10億美金，我嗰時都冇諗過出完post之後個半鐘，就已經升左一倍，就係靠果次我累積到八位數嘅資產，啲信徒都開始吹捧我，我自己都開始慢慢自大，慢慢唔記得咗自己其實係靠運氣。

跟住落嚟嘅運氣就冇企係我呢邊啦，嗰時係21年12月，我本身有了解過Luna 嘅機制，嗰個時候我就喺度賭佢遲早脫鈎，於是我就喺50幾蚊嘅時候short 左佢，點知嗰時韓國佬仲大把錢，市況又唔差，就咁俾佢救翻上百幾蚊，果次我輸咗5成倉位，Channel都冇心情再更新了，直至二月，我又再short 多一次Luna ，命運之神冇再企係我呢邊，韓國佬又成功救市，我已經輸咗九成九倉位。

直到五月Luna ust 又開始脫鈎，但果次已經我冇勇氣short 佢，唔知佢真係跌倒歸零，呢次我冇輸錢，但我輸咗個信心。

之後係我交易生涯最黑暗的月份，當時陷入咗蝕錢-->唔敢開倉-->猶豫中開倉-->又蝕錢嘅惡性循環。交易心態極差，幾乎冇收入，除左工作嘅壓力，仲有來自家庭嘅壓力，挫敗感籠罩，直至上個星期六，終於輸晒所有錢，銀行剩返千幾蚊。

而家我一無所有，甚至比19年前更加窮，而家失敗嘅我唔知點樣面對父母嘅期待，只係感覺回天乏力。

輸咗咁多錢，對我嘅打擊真係好大，我已經係冇信心入返呢個圈子重新開始，我唔知點樣面對我嘅未來，究竟係繼續追求金錢定係去追求自由？

呢三年我不斷追求財富，只不過係為左不為金錢所束縛，但係喺過程中發現自己已經變成慾望的奴隸，價值觀亦都逐漸傾向同我父母一樣。

人終其一生，究竟追求啲乜嘢？

Hello32133 2022-08-02 12:49:11

吸收經驗下次牛市再黎過