<因為EX 我成為左一個禿頭嘅毒撚 然後遇到一隻猫>

21. 不同

因為良心責備同埋道德底線嘅關係，我最後選擇左繼續同Grace一齊而傷害左Cindy。Cindy聽到我嘅決定後雖然傷心，但就無再講咩去挽留我，而之後佢亦好似我原本個世界咁同返Johnny一齊。

Grace聽到我決定同返佢一齊後好開心，仲即刻攬住我攬得好實。見到佢笑得咁開心，果刻我真心覺得我嘅決定係無錯。而貓仙人亦開著左快播模式比我睇埋我之後嘅故事。

同返Grace一齊嘅開頭，我地都好好，好開心。失而復得嘅感覺令Grace更珍惜我，而為左可以比返多d時間我，加上佢hall嘅senior亦越黎越不滿佢成日都唔參與hall嘅野比好多壓力佢，佢最後都決定左quit hall，自然亦無同佢嘅hallmate學長一齊。或者因為咁，少左hall同學長帶比佢思想價值觀上嘅轉變，我地嘅步伐好似又慢慢一致返，又或者其實係Grace為左我放棄左部份嘅自己。

而因為無左Cindy，我不自覺亦慢慢靠近返Grace會成日搵佢同佢傾偈。但唔知點解雖然我地嘅關係好似返返去往昔咁，但我個心就總係覺得有d野唔同左，好似我地之間總係少左d野，我再返唔返去以前好簡單純粹咁鍾意佢，依戀佢。相反Grace就好珍惜我，對我超好，係比以前更好，樣樣以我為先。但佢衣種好，反而令我有d無所適從，仲覺得佢好似無左以前比我果種特別嘅感覺。人都係犯賤架喇，對你唔好又話唔好，對你太好又話嫌唔特別無左自己。其實說穿了，應該都只係因為自己無以前咁鍾意對方。

到到大學畢業後出黎做野，其實我地都已經一齊左好耐，雖然我地感情無咩問題，仲係會成日見，每日都會傾下電話，但少左種野衣種感覺就更加強烈。不過因為真係一齊太耐，到咁上下Grace好自然都會問

「咁你幾時娶我呀? 」

Grace早已經係我認定左嘅老婆，所以我都無懸念唔同佢結婚，不過就係我地婚期前無耐，我竟然會開始不斷咁質問自己

(我係咪真係咁就一世? 未同過其他女仔一齊我個人生其實會唔會miss左d野? 我會甘心? 結左就真係返唔到轉頭咩都無架喇喎…)

然後我諗起Cindy，我開始諗如果當日自己揀左Cindy，我嘅人生會唔會好唔同? 突然間我開始有d後悔嘅感覺。

而世事奇妙之處，就係無耐後我真係係一個大同嘅婚宴上撞返Cindy。係原本嘅世界，因為我外型已經係一個禿頭肥佬加上內心變左做一個宅男，所以當時嘅我因為自卑，畢業後亦無點再同大學同學聯絡而沒有出席衣個婚宴。但係衣個世界，我並無衣個問題，而且仲係一個不折不扣嘅型男，所以好自然有出席衣個婚宴娶會。

Cindy其實無咩點變，只係多左種成熟嘅感覺，同埋無左個包包面。雖然佢果陣仍然係咁健談，間中又會開懷大笑，但憑我對佢嘅了解，我總係有個感覺真實嘅佢其實並唔開心，佢個內心應該壓抑住一d負面嘅情緒。不過因為之前嘅事，我同佢並無點交談，直至散席離場，我地咁岩都係去巴士站。

「聽講你都就快結婚喇喎?」行行下佢突然問我。

「係呀，你無耐前結左添啦。」我回應道。

「估唔到最後你都係同Grace一齊，而我就繼續同Johnny一齊。証明你當日嘅決定係無錯呀~」Cindy笑笑口咁講，但直覺話我地衣個笑容下面係有d無奈同苦澀。

「嗯…」我唔知點回應佢好，於是大家又陷入左沉默。

「不過點解我覺得你心底入面好似好唔開心，有好多壓抑咁?」隔左一陣我都係忍唔住問。

「因為我真係好唔開心…」Cindy平靜咁答。

「… 點解?」聽到佢嘅答案我忍唔住望住佢問。

「因為你…」Cindy回望返我咁講。

「我?」我唔明。

「當日你唔守承諾放棄左我，所以我都同返Johnny 一齊… 初頭佢都一直對我好好，亦無再出軌，但時間耐左，我就發現佢故態復萌… 我好唔開心，但一齊左咁耐加上你果次件事後，我發覺我根本離唔開佢，最後只好逼自己妥協接受…」Cindy仍然好平靜咁講。

「點解你離唔開佢呀? 值得咩?」但聽到佢咁講我就好難平靜。

Cindy:「因為咁耐以黎，我淨係鍾意過兩個人，而佢地一個會背叛我，一個會放棄我。我唔想再對其他人投放感情喇…」

「其實只要你肯嘗試，無野話係唔得架…」我嘗試遊說開解佢。

Cindy:「你知唔知呀，Carter都退左休喇，仲要想正正式式有場告別賽都因為個肺炎而變左得返最後幾十秒出場… 有d野我地係要學識接受現實。」

「果日… 我都有諗起你…」諗起突然成為左Carter最後一場比賽果日，我都好傷心失落，亦好自然諗起Cindy，好想搵佢一齊訴苦。

「我都係… 不過見到你地一直一齊仲去到結婚衣步，咁至少你當日嘅選擇係無錯，我嘅感覺都好d… 好似我嘅犧牲係有價值咁~」講到衣度，我見一直語氣好平靜Cindy嘅眼角竟然有d淚光。一種內疚嘅感覺突然蔓延全身，衣一刻我好想攬住佢。

我知最好最負責任嘅做法係唔出聲，然後由得衣件事過，大家繼續大家嘅生活。但突然間我又諗，七年前我揀過一次令到衣家自己唔甘心，七年後嘅今日如果我仲有機會修補衣個遺憾，我係咪唔應該再比機會自己後悔多次?

「其實並唔係咁…」我忍唔住向Cindy講。

然後到Cindy一臉意外咁望住我。

「雖然當日我揀左繼續同Grace一齊，但之後唔知點解我一直都唔可以再好似以前咁投入咁鍾意佢，總係覺得同佢一齊爭左d野咁… 不過因為一齊左咁耐，我覺得要負責任同對佢交待，所以我決定同佢結婚。但其實一直，我都有懷疑同後悔當日嘅決定，我都成日諗如果當日我係揀左你，我地嘅結局會係點…」我一口氣將我衣幾年嘅鬱結講晒出黎。

「係咩? 可惜已經太遲，衣家講衣d又有咩意思?」雖然Cindy咁講，但我感受到佢對我嘅說話並唔係無感覺。

「可能未遲呢? 如果我地比個機會大家彌補大家嘅遺憾…」我厚顏無恥咁提出。

「我…結左婚架喇，而你黎緊都會結婚…」雖然Cindy咁講，但我感受到佢並唔堅定。

「但你老公都係照出軌，至於我… 你唔駛擔心我，衣個係我自己嘅問題…」我繼續遊說。

「我唔想做第三者…」Cindy繼續說服自己唔好。

但我無再比佢講野，因為我已經再忍唔住攬住左佢然後錫左落佢度… 佢開頭想掙扎，但好快就放棄左。衣個情境似曾相識，同多年前嘅果晚好相似，不過唔同嘅係今次我地無再放棄大家，然後我地正式成為左大家嘅秘密情人。

同Cindy秘密一齊左後，我嘅人生好似豐富同多左好多色彩，而之前嘅遺憾亦好似得到左填補，所以之後就算我同Grace順利結婚，我同Cindy都仍然繼續保持住衣段關係。而令我有d意外嘅係可能因為遺憾填補左，我同Grace一齊嘅時間反而好似再無之前果種總係覺得爭d野嘅感覺，仲因為內疚而對佢更好添。可惜，衣個世界係無永遠嘅秘密，兩年後嘅一日，Grace終於發現左Cindy嘅存在。而更不幸嘅係，佢發現嘅時間肚入面正陀住緊我地嘅BB。而因為情緒太過激動，最後Grace少產，我地個BB咁就無左。亦因為咁，我知任我點補救，佢都無可能會原諒到我…

結果Grace之後同我離左婚，而因為內疚同不安，我同Cindy亦都決定結束衣段關係。之後嘅我人生都係活係內疚同痛苦當中，我覺得自己唔再配有快樂同幸福。結果因為頹廢，無耐我又變左做一個禿頭嘅肥佬。而今次我阿媽因為太過嬲我，亦都無再理我幫我搵相睇對象，所以最後我就只可以好孤獨咁渡過餘生。


「…」見到自己最後係咁嘅結局，我都真係無語。原來原本嘅我都唔算最差，至少暫時我唔駛活係內疚同孤獨當中…

「唔出聲?」貓仙人見我個樣咁難睇於是問。

我:「唔知可以講咩…」

「正如我頭先所講，你地人類係好受自己情感所影響，有時甚至根本無理性邏輯可言。原本因為Grace係你追得好辛苦先追到手，所以之後你會好珍惜。但到到你變左心，之後反而係Grace死纏難打苦苦哀求令你回心轉意。可惜因為太易得到唔駛靠自己努力爭取，你覺得唔矜貴結果又到你唔珍借，仲成日好介懷自己當日miss左同第二個一齊嘅機會，有左心魔就唔可以再全心全意咁投入段感情而係不斷咁質疑當日自己嘅決定…

到到之後見返Cindy，有機會彌補當日嘅耿耿於懷，你自然好難忍得住啦… 調返轉如果係你本身個世界Grace肯答應返同你一齊，我相信你唔會好似衣世咁對佢，因為你知得來不易，但同時Grace亦唔會好似衣世咁對你咁好咁死心塌地。所以你地人類所謂嘅愛情，其實都幾唔實在，如果愛係一個fact，點解唔同嘅情況下個反應可以咁唔同?」貓仙人少有發表咁長嘅感言。

「我都答唔到你… 或者真正嘅fact唔係愛唔愛，而係隔黎飯香，得不是先係最好?」睇完衣個世界嘅結局我感覺到自己好似捕捉到一d野，但就需要d時間去消化一下。

「Good point! 黎緊你應該仲會有好多發現，所以預備好去另一個時空未?」不過貓仙人無比咩時間我。

「好…」

「預備好就諗咒吧!」貓仙人突然又進入左亢奮嘅狀態。

「…貓仙人醒，貓仙人勁，貓仙人無得頂，喵喵喵chance~」而我就只好又好尷尬咁一邊唸一邊跳。

第一個時空嘅故事黎到衣度貌似完左喇
不過更精彩嘅故事仲係後面等緊～
我相信衣個故事係睇落去係越睇越有味道

雖然自從上個星期一日內連續三個負評後就好似再無新讀者
但只要有人睇落去我都會努力寫落去唔會比佢爛尾

大家如果覺得故事還可以，希望你地間中會留下言比下支持我啦，始終連登出故都會想可以同大家有d互動

感覺點行都唔會有好結局 因為點樣揀都係錯

樓主今次個故開頭開得幾好 加油

以男豬咁嘅性格 當年揀咗Cindy 會唔會都係離婚收場

睇落去就知 其實有時都係好難定義對定錯
有d影響可能未到死果刻你都唔知

多謝 但暫時反應係最差

不妨睇落去再了解下男主角多d

樓主比心機

多謝你一直支持呀！
岩岩見到終於多左個正評 今日有加更～

22. Mabel

第二個時空

因為已經有左心理準備，所以我無再驚，強光閃完後我就打開左眼睛，然後我又見到年輕時嘅我正執拾書包準備放學。

「阿祖，今日去唔去巴富街跟隊?」平時一齊打開波嘅阿希係班房門口問我。

正當我想問點解好似同上次一樣嘅時候，下面嘅另一個我好快話左個答案比我知。

「好呀，雖然有少少燒咁，但波係唔可以唔打嘅~」雖然有d唔舒服，但衣個世界嘅我為左玩，都係選擇左去打波。

估唔到今次轉捩點咁快出現，於是之後我對Grace係巴士上一見鍾情果一幕並無出現，取而代之係因為病住打波令我唔小心拗柴然後請左兩日病假。


“叮噹”

難得無啦啦多左兩日假，而且又行動不便有晒藉口，我當然把握機會係屋企瘋狂打機。不過突然間門鐘一響。

「Mabel?」打開門我就見到都算係我青梅竹馬嘅Mabel。

「點呀你，死得未呀?」佢好自然咁就行左入我屋然後放低左一堆野。

「跛左啫，唔會死嘅… 」我關返度門然後就一隻腳跳下跳下咁去張枱度睇下佢放低左d咩。

「衣疊係你d功課，衣盒係買比你嘅下午茶。睇死你uncle auntie返左工公你晏晝都係無啖好食食杯麵架喇 ~」Mabel一邊講一邊整理佢放低嘅果堆野。

「唔該晒~ 好感動呀! 」雖然口係咁講，不過其實心入面我覺得係幾理所當然，完全無唔好意思嘅感覺，因為我同Mabel識左好耐一直都好friend，不嬲邊個有需要另一個都會義不容辭咁幫手。

「好心你琴日唔舒服就唔好去打波啦，結果攪到自己受傷… 有無事呀? 」Mabel見我包到成隻糭咁嘅腳後忍唔住話我。

「以為自己無咩事嘛，下次真係唔敢喇，已經第三次拗柴，我都有d驚自己拗到變慣性…」望住自己隻腳我都忍唔住搖搖頭。

「知死就最好啦，咁你自己一個係屋企悶唔悶呀? 」見我知死Mabel就無再話我。

「點會悶呀，打足成日機不知幾開心~」我笑笑口答。

「咁玩左咁耐，一齊黎做功課啦~」Mabel就偏要好掃興咁講。

「下… 唔想做住喎… 你係度做完之後再比我抄咪得囉~」我反提議。

「攪錯呀你! 唔得呀，一齊做!」Mabel當然唔肯。

「你就當體諒下我衣個傷者啦… 最多好返請你食餐好嘅!」我就繼續扮慘扮死狗。

「你… 唉，怕左你… 我做好話你聽啦…」果然Mabel就即刻心軟。

「Yeah，都係Meimei最好~」

Mabel全名叫梁美兒，係佢未有英文名前我一直都跟佢父母叫佢Meimei，係上左中學佢有左英文名後聽同學咁叫得佢多我先慢慢跟佢地改口。但有時情急下或者得我地兩個果陣我都會不自覺咁叫返佢做Meimei。Mabel聽到我咁叫佢後好似好開心咁，然後就坐低開始做功課。

到到佢做完功課叫我，我抄完後又同佢玩左陣，我媽咪先返到屋企，見到Mabel佢好熱心咁留左佢係度食飯話答謝佢幫我拎功課又請我食tea，所以最後Mabel就食埋飯先離開我度返屋企。我同Mabel嘅關係就係咁熟嘅存在。

望住以前同Mabel衣種青梅竹馬嘅關係，我都難免有種唏噓嘅感覺。係我嘅世界，我同Mable嘅關係都真係好似由細識到大嘅好兄弟咁。而係我同Grace一齊左之後，雖然大家相處嘅時間係少左，佢都好似有d避忌，但因為佢同Grace嘅關係都好好，所以我地仍然係好friend，直至我同Grace分左手後，我地嘅關係先有左變化…

同Grace分手後，Mabel因為覺得Grace見異思遷對我唔住而同Grace絕左交，而喺我被Grace飛左後佢知我好傷心好頹廢亦都好主動一直陪住我，只係當時嘅我並無領佢情，有時仲覺得佢好煩… 結果一次衝動下，我對佢講左d好過份嘅說話，自此佢就再無搵過我。然後無耐佢就同左一個追左佢好耐嘅男仔一齊，之後仲跟佢移民左去澳洲添… 其實我一直都好後悔自己之前咁對佢，但就因為面子問題一直都無同佢講sorry。所以衣家見返以前同Mabel嘅相處，我都真係感慨萬分…

因為無左巴士讓坐果幕，衣個世界嘅我並無對Grace心動，亦因為咁無主動參加壁報設計比賽，引致我同Grace係衣個世界完全無晒交集。原來無左果一下心動，Grace之後對我黎講就只係一個好普通嘅同班同學，世事嘅野有時就係咁神奇。

而轉眼間，又到左聯會營嘅日子。因為大家想一齊去玩，所以就算無左Grace衣個因素，大家都決定接受Bryan邀請而參左左衣個camp。不過由於衣個世界無左我追Grace衣個元素，Bryan亦自然無提議搵管弦樂團參加，最後天文學會就搵左野外定向會參與。

Bryan作法下，我地五個仍然編埋左係同一組，而Grace嘅位置Bryan就求其搵左同級另一個唔熟嘅同學代替。而去到二人三足嘅環節，因為無左Grace，我同Mabel就好自然係同一組。雖然換左人，但因為我地同樣使用先守後攻嘅低調制略，而且純講默契我同當時嘅Mabel自然更好，所以故事發展同原本我同Grace嘅都差唔多，最後都係得返我地同另一組對手仲係場上。

不過或者因為命運嘅法側真係存在，當我同Mabel努力同對手糾纏嘅時候，Mabel同樣地因為心急想避開對手嘅攻擊，結果一個失去平衡跌落地下，而我亦順勢比佢扯跌左，成個壓左落佢度。因為太過突然，我同Mabel係跌落地時差d黎左個嘴對嘴，好彩我見到避得切拎轉左塊面所以佢只係錫左落我塊面到，但同時間我嘅胸口都感受到一種軟綿綿嘅壓力，好似攤左係張軟墊上面咁卸左唔少力。雖然同Mabel由細玩到大，但今次應該係我地由史以黎最親密嘅接觸，亦係我首次真真正正咁意識到對方其實一直都係一個女仔。

雖然感覺幾舒服令我有少少唔捨得起身，但理智都係令我好快起返身，同時間亦好快扶起返Mabel問佢有無事。唔知係因為其他人見到我地頭先咁樣發出強烈嘅喧鬧聲定係因為其他原因，Mabel 塊面好紅，低下頭應左我聲無事後就急急腳咁走返去其他人度。

最後我地都係輸左，而因為頭先尷尬嘅情況，整個大食會時間我地都成會左另外幾個人取笑嘅對象。我其實無咩所謂，不過見Mabel好尷尬同難堪，我最後都忍唔住發脾氣先阻止到佢地令佢地肯收口，但就攪到我同Mabel一直都好似怪怪地咁果晚都無再講過野。

23. 受傷

第二日我照樣參加左籃球隊嘅練習，Bryan就繼續幫手天文學會夜晚嘅BBQ同觀星活動。但由於今個世界管弦學團換成左野外定向會，所以Mabel佢地今次就join左佢地個學會活動玩下野外定向。

去到三四點休息緊果陣，我見到佢地返到營地，但就唔太對路咁嘅樣。無耐我就見Mabel要由另外一個女同學扶住單腳跛下跛下咁行返黎。我即係衝左過去。

「Mabel做咩呀? 整親?」

「係呀，頭先落山果陣扭親隻腳，好痛…」Mabel帶住點痛苦咁講。

「咁快d返房坐低除隻鞋我再睇下…」我擔心又焦急地說。

於是我同隊長講左聲後就同佢地一齊返左Mabel房。一除隻鞋Mabel隻腳踠果然腫晒。

「嘩，都好嚴重下… 要冰一冰敷先。阿偉麻煩你可唔可以幫我去飯堂果邊拎d冰黎?」我同旁邊嘅阿偉講。

「我諗都係快d出返去搵個跌打睇好d… 唔好再留係個camp喇，一陣我地call的士出返市區我同你去睇跌打啦。」見阿偉出左去我又同Mabel講。

「下… 咁咪累你無得繼續玩囉?」Mabel有d唔好意思。

「傻架咩，玩幾時都有得玩啦。我同你住咁近又最方便，而且上次我整親你都照顧左我唔少啦~」我完全無所謂。

「咁…麻煩你喇…」Mabel有d唔好意思，但又好似有d開心咁。

「頂，我地之間唔係仲要咁客氣掛?」我見佢咁客氣忍唔住話左佢一句。

「嗯…」Mabel低下了頭應道。

等阿偉拎左d冰返黎我同Mabel冰敷左陣後，我地兩個就執好野先一步離開營地，搭的士直到我地屋企附近有間我睇開嘅跌打鋪。師傅檢查左陣之後，話都係扭傷，好彩無傷到骨，敷藥休息段時間就無事。於是佢敷好藥後我地就離開鋪頭返屋企。不過見佢就算我扶住佢行都好似好痛咁，我就直接再提議不如我揹佢返屋企。

「下… 我好重架喎衣家，仲要有兩個背囊，唔駛啦…」Mabel想拒絕。

「但你好似好痛咁…得啦，我打開籃球又唔係好遠。而且唔駛擔心喎，頂唔順我自然會扔返你落地下架喇~」我講笑道。

「咁好啦…」

於是我將自己個背囊放左去心口，Mabel又揹返佢自己個背囊，然後我再揹住佢。

「果然係重左好多喎，有食飯呀下~」感受到Mabel個心口又壓左落黎，我努力唔諗然後隨口講左個話題。

「都話架啦，重就放低返我啦!」Mabel即刻有d唔好意思。

「講笑咋，雖然你係重，不過我仲大隻!」唔再理佢我邊講邊開始行返屋企。

Mabel無再出聲，然後慢慢就將個頭放左上我膊頭度。

「阿祖… 你記唔記得細個果陣你都試過好似咁揹過我一次?」過左陣Mabel突然細細聲係我耳邊問。

「有咩? 幾時?」我無咩印象。

「哈，你果然唔記得! 記唔記得小二果陣有次我地放學去左遊樂場玩，你係個攀登架度爬黎爬去我又跟住你爬，點知我爬爬係跟唔上你然後跌左落地下?」Mabel邊回憶邊講。

「你咁講起我又有d印象喎! 跟住你個膝頭流晒血好痛，係咁喊呀嘛~ 然後話好痛行唔到，結果要我揹你返屋企你先肯唔再喊，返到去我仲比你媽咪鬧左鑊呢!」我都諗返起當年嘅片段。

「哈哈，因為我驚比媽咪鬧所以賴係你唔小心推跌左我，不過你果陣好好，幫我食左隻死貓~」Mabel笑住咁講。

「咁見你之前喊得咁慘，費事你比媽咪鬧又喊過啦…」諗返起當時情境我都忍唔住笑。

「嗯… 咁你仲記唔記得你揹我返屋企果陣你攞走左我一樣野?」Mabel突然面紅紅咁問。

我:「攞走左你一樣野? 攞走左你d咩?」

Mabel:「唔記得就算啦! 不過琴晚發生果件事你唔駛放係心呀…」

「琴晚? 哦… 我無放係心呀… 你唔好放係心就真…」 諗起佢應該係講緊唔小心錫左我塊面一下果件事。不過我覺得對佢黎講應該係大件事過對我，因為衣個應該係佢嘅初吻。

「意外黎架啫，我無呀…」Mabel細細聲咁拎側左塊面講。

「咁就好…」

轉眼間返到佢屋企，我將佢交左比佢媽咪後就返返自己屋企。始終後生復原能力就係強，兩日後佢已經可以開始慢慢行返路所以都可以如常返學，而我就好有風度咁跟出跟入幫佢拎書包希望盡量減輕佢負擔。放學後我又會盡量係佢屋企陪下佢，而佢作為回報都會好快做完d功課然後比我抄。而一個星期後，佢已經可以行動如常，我就功成身退無再特別照顧佢喇。

然後轉眼間，又到學屆籃球比賽，一如原本世界，我地一路勢如破竹順利入到四強，而係四強我亦照樣被對方專人涷結，到最後一個攻勢亦同樣落左係我身上。不過今世唔知係咪因為之前嘅舊患變左慣性加上今場體力消耗大最後有d腳步唔穩，最後一下剷籃驗射雖然同樣射入左，但落地嘅時候我就因為踩到對方球員隻腳然後拗柴。

「哎吔!」

雖然嬴波應該開心，但隨住我大叫一聲然後應聲倒地，我同所有隊友都無時間開心同慶祝，全部衝晒過黎睇下已經訓左係地下嘅我有無事。而我一拗都已經心知不妙，因為感受到劇痛知道今次應該係大拗。於是因傷我被逼缺席左決賽，而係無左我衣個主力射手下單靠技安同阿希最後我地都係輸波同樣只可以飲恨亞軍。

樓主可唔可以寫個贏嘅宇宙

不過都係支持樓主

幾好嘅提議
不過狀態大勇加上鍾意嘅人現場支持都輸，好難講佢有咩改變可以變贏到
可能會用另一個方式代替

如果冇咩野分心咁樣又得唔得

睇落去

24. 70 蚊與100蚊

係原本嘅世界，因為我嘅誤傳累球隊輸波令我充滿住內疚同遺憾，而係衣一世因傷唔可以打決賽最後仲輸埋同樣令我感覺好難受，構成左另一種遺憾。因為唔知原本世界係點，衣個世界嘅我一定會諗如果自己無傷，拎冠軍嘅好可能係我地。所以雖然決賽後嘅我已經可以慢慢行返路，但就一直都無心機。而Mabel見我咁有時都專登同我一齊走同陪下我。

「阿祖呀，都過左去喇，唔好唔開心啦… 受傷你都唔想，而且你仲有幾年學界嘛，下年再黎過囉!」第二日佢跟左我返屋企見我悶悶不樂咁於是同我講。

「今年 C grade係最大機會，之後難度高好多架喇… 而且阿希成績咁差，我估佢下年都未必可以留到係度… 唉，如果我唔係傷左，我地真係有機會贏架，點解又要拗柴呀! 仲要偏偏係衣個時候…」衣一刻我好憎自己隻腳，憎佢點解咁廢咁易受傷，恨不得將佢斬左落黎，所以好大力咁打左自己隻大脾一搥。

「咁受傷無得控制亦無人想… 職業球員都成日受傷架啦，所以唔關你事架，唔好怨自己啦…」Mabel繼續想安慰我。

「Mabel我真係好唔甘心呀… 不過你唔會明架喇…」但佢嘅安慰並無起到咩作用。

「我感覺係無你親身體會咁深，但我都明你點解會唔甘心，會怨天尤人，不過世事有時就係咁，唔到我地控制，亦唔係我地話想要咩就可以有咩。人生嘛… 本來就係充滿遺憾架啦~ 我地唯一可以做嘅就係接受現實，同埋盡力去彌補，唔比自己將來有更多嘅遺憾，而唔係仲一直執著於已經失去左或者改變唔到嘅野… 雖然今日輸左，但因為努力第日贏返唔係仲熱血? 今日唔得唔代表聽日都唔得!」Mabel搭住我膊頭繼續苦口婆心。

「咁你都講得岩… 放心啦，你講嘅我都明，過多幾日我無野架喇…」而今次佢嘅說話有少少話醒返我。

「我知呀，我識嘅阿祖從來都無咁易會被打低嘅!」見我好似有返少少精神Mabel都開心返。

「哈，講到好了解我咁… 不過最了解我嘅朋友，應該都真係你嘅~ 咁你呢? 講得出頭先番說話，似乎你都有唔少遺憾喎…」我好奇問道。

「哈哈，我果d就不值一提啦…」Mabel拎側左面微微苦笑住咁講。

「講黎聽下?」而咁引起左我嘅興趣。

「嗯… 其實我比你仲衰，你都叫努力過，我連努力去爭取都唔敢。」Mabel諗左陣後講道。

我:「點解?」

Mabel:「因為我驚失敗左，會連本身嘅野都無埋。」

我:「咁嚴重?」

Mabel:「就好似你本身已經有70蚊，你可以拎去投資或者賭去令佢變100蚊，但如果衰左你就連70蚊都好可能無埋。雖然我好想有100蚊，但我唔敢搏…」

「咁搏唔搏都有好多因素要睇嘅，例如成功率，輸左嘅唔同後果同各自情況，你又有幾想真係要100蚊等等… 不過如果無100蚊對你黎講係遺憾咁嚴重，或者你應該都要去試下。有d野做左後悔，總比唔做後悔好，而且我地仲咁後生，有咩係輸唔起? 無左70蚊咪再重頭賺過囉。好過第時老左成日怨自己果陣點解唔去試下… 因為唔試，你永遠唔知答案，然後成世都會覺得唔甘心…」講講下我都不自覺入左認真mode。

Mabel:「但果70蚊未必賺得返架，有d破壞出現左就修補唔返… 不過即係比著係你，你會去搏?」

我:「我唔知咩事唔敢講一定會，但比起永遠唔知結果果種唔甘心，我諗我會寧願去搏一下。始終做左後悔，總比唔做後悔好。」

Mabel:「嗯… 明白…」

「咁即係咩事啫?」見Mabel仲係唔講我追問。

「唔講你聽~」不過Mabel都係唔講。

「攪錯呀!」我表示不滿。

「放心啦，可能有一日我會話你知嘅~」Mabel變返笑笑口咁講。

「車!」

題外話，過左無耐，Mabel就加入左學校嘅排球隊。雖然我唔明同100蚊理論有咩關係，但因為咁我就一直以為佢係講緊入唔入校隊衣樣野。


過左段時間後，我都從頹廢狀態回復返過黎，又繼續每日玩樂。而三個月後，就迎黎我15歲嘅生日。

對於我地幾個最熟嘅朋友，其實任何一個生日我地都會相約搵晚出去食餐飯，而另外為左令送嘅禮物可以價值高少少又實用少少又唔會令大家有太大財政負擔，所以我地慣常都會一齊夾錢買份生日禮物送比壽星公或者壽星婆。今次都無例外，佢地夾錢送左件卡達波衫比我。

「生日快樂~」

中學時間，唔知點解同中學同學食飯，好似永遠都會食得好開心，而衣餐生日飯亦一樣。不過由於餐飯唔係重點，所以我就skip左中間嘅情節，去到重點晚飯後我同Mabel一齊返屋企果段路，因為返去途中，佢突然又送多左兩份禮物比我。

「嗱，衣兩份私人醒你架~」

「嘩，駛乜送咁多份呀，我會唔好意思架喎…」見到又多兩份禮物，我有少少surprise。不過其實Mabel間中都會私人醒多份禮物比我，但就好少好似今次醒兩份咁多。

「衣份係驚你打波又整親所以特登買比你嘅，以後打波戴住佢啦。另一份係知你想要所以順便買埋比你~」Mabel笑住咁講。

係佢面前，我唔興咁有禮貌，所以直接係佢面前拆開左兩份禮物。打開一睇，一份係一個盒裝嘅防拗柴護踭，一份係陳奕迅岩岩出嘅專輯CD一隻，確實兩樣都係我實用同鍾意嘅野。

「嘩，真係好有心喎，多謝!」我好似buddy咁搭住佢膊頭抱一抱左佢一下。

「岩用就好~ 返到去記住細心睇下每一份禮物呀~」Mabel突然有d面紅咁講。

「哦~」而我就不以為意咁應左下。

返到屋企沖完涼我就立刻開左隻CD然後放左入部電腦開始聽歌。不過當我打開盒果陣我發現盒入面有張咭仔，係一張細細地嘅生日咭。入面寫住”阿祖，生日快樂!”。

「衣個傻女~」我不其然自然自語講左句。不過當我反開張咭望下另一面果陣，我發覺上面寫滿左堆睇唔明嘅字，密麻麻咁佈滿成張咭，但就構唔成任何句子，好似只係亂咁將堆字堆埋一齊。

「嘩，攪咩呀佢，咒語黎架?」我完全不明所意。

跟住我放低張咭，又打開左護踠個盒諗住拎佢出黎試下，結果試上腳都幾岩size。

「希望有用啦~」

見岩size我就再無再理佢，由得d野放晒係枱面然後繼續聽我隻Eason專輯。同時間我又打開MSN同Mabel講多句多謝。

25. 解謎


「再一次多謝你兩份禮物~」

Mabel:「唔駛客氣~ 有無試上腳?」

我:「有呀，fit到漏油~」

Mabel:「咁就好~ 聽緊隻CD?」

我:「係呀，不過張咭後面堆咒語係咩意思?」

Mabel:「你唔明?」

我:「點明呀，點睇都係你亂咁寫咋喎…」

Mabel:「哈，比你發現左添! 就係想玩下你咋嘛~」

我:「無聊!」

Mabel:「所以你無其他野同我講喇?」

我:「咪多謝囉，無喇~」

Mabel:「咁好啦，你聽完隻碟就早d訓啦…」

我:「知喇，可能一路聽一路訓添。你都早d抖啦，thanks bro~」

然後我地就結束左我地衣日嘅對話。

直到兩星期後，有日我比阿媽鬧我張枱亂過亂葬崗要我執枱，我再次見到裝住護踠個盒仲係枱面，就諗住扔佢落垃圾桶，點知扔果陣突然聽到盒入面有聲似乎仲有野，於是就打開多次個盒睇下入面仲有咩，原來係本說面書。

巡例上都拎左出黎諗住望下有咩講，點知一拎出黎，我發現有張好多個窿嘅卡紙痴左係本說明書上面。於是我隨手摵左佢落黎研究，但諗左好耐都諗唔到係乜黎。於是我就放棄將個盒同說明書扔返落垃圾桶然後又再開始繼續清理張枱，但執執下我又見到Mabel果張生日咭係枱面。

正當我諗住收好張咭果陣，我突然醒後頭先張穿窿咭同衣張生日咭個size好似差唔多，然後又諗起卡後面果堆符，我突然靈機一觸拎返起頭先好多窿果張卡然後放上衣堆符上面，果然d窿立刻出現左一堆睇得明嘅字。


“阿祖 其實我一直都好鍾意你 你就係我一直想要嘅一百分”

睇到衣句句子，我驚訝得目定口呆。

(Mabel鍾意我?)

突然間，我明白左佢當日70分同100分嘅比喻係講d咩。佢想我地可以一齊去到100分，但又好驚我唔接受然後大家連原本好朋友都做唔成，最後連原本嘅70分都無埋。唔怪得佢話70分無左就未必可以再賺返。

果刻嘅我受到好打衝擊，真係唔知自己應該點算好。


「Mabel鍾意我?」係空中嘅我見到衣一幕同樣忍唔住問。

「到底係衣個時空先係咁，定係我個時空都係咁?」見貓仙人無反應，無耐我又問。

「有d野你一直無留意所以先無發覺啫。當你知道左個事實再諗返轉頭，就會突然明白好多野架喇。」貓仙人繼續懶係高深莫測咁講。不過佢嘅說話確實刺激起返我一d記憶。

我諗返起係自己個世界唔記得邊一年，佢都有比個一張背面又係有堆符嘅生日咭比我，但印象中好似並無果張提示咭。

我諗返起當我同佢地講我成功追到Grace果陣Mabel當日嘅笑容係好似有d勉強，而之後當佢同Grace熟左，佢都講唔少Grace背後嘅感受我聽，好似變左我嘅小偵探咁，我地未一齊就當過料比我，一齊左後就成日想確保我地一齊係開心。而當我同Grace分左手後，佢對Grace果種責備甚至因為咁同佢完全反左面，果陣我都一直覺得係有少少over左。

而係我因為Grace而意志消沉果陣，佢都成日陪住我鼓勵我，直至有日比我鬧走左為止…

我記得果日應該係我同Grace分手後大概三個月左右。因為唔想阿媽擔心，我落左街自己係度飲酒，而Mabel知我係度又好自然黎左陪我飲。

「祖呀，都三個月啦，你仲要傷心到幾時呀… 我地個個都好擔心你呀…」雖然已經講過唔少次，但Mabel都仍然係keep住講。

「你唔好理我啦，你地唔會明我衣家到底有幾痛… 每一日我都控制唔到自己不斷咁諗起佢，然後每次諗起佢我個心都好痛，好似窒息呼吸唔到咁，原來人個心真係會識痛架…」我意志消沉咁講。

「幾痛都好，三個月喇，你都要接受佢已經移情別戀離開左你衣個事實，改變唔到架喇…」Mabel繼續佢機械式嘅錄音帶。

「點解你咁肯定改變唔到? 如果我繼續努力追返佢，可能佢有日會比我感動到呢? 又或者有日佢同個新男朋友散左，咁我咪可以追返佢囉! 我其實真係知錯架喇，係我唔好，之前無好好經營大家段關係由佢掉淡左，一齊得耐我無左危機意識… 但我地之前感情明明咁好，只要我肯努力，佢一定會記返起架!」我繼續自我安慰。

「你唔好咩都攬晒上身啦… 佢要變心嘅變關你事啫… 佢唔係你諗到咁好架咋，又或者講佢已經變左唔係你以前識嘅佢喇…」Mabel則想我接受現實。

「係我無睇住佢令佢變…如果我早d醒覺就唔會咁…」但我仍然係不停自責。

Mabel:「你唔好再不斷咁美化佢，不斷咁將所有問題推晒落自己度啦…」

「你唔明我到底有幾後悔… 佢真係好好架… 明明我地去旅行果陣都仲好開心…點解所有野可以變得咁快? 衣家我每次出街，經過我地一齊去過嘅地方，我都會諗返我地嘅回憶… 所以我相信佢都一樣，我相信佢有日會鍾意返我同返我一齊… Mabel，不如你幫我個忙呀。」我自怨自艾完後突然靈機一觸。

Mabel:「咩忙?」

「你唔好因為我同Grace反面啦，你同佢做返好朋友，咁你咪可以幫我收風囉，得閒又可以同佢講下我嘅好說話等佢知道我仲好鍾意佢… 你幫我啦!」我厚顏無恥咁提議道。

「我… Sorry我做唔到… 而且我同佢已經無可能返返去以前咁架喇…」Mabel臉有難色咁講。

「點解呀? 其實係我同Grace分手咋嘛，你做咩要咁多事又鬧佢然後要反面啫! 你地之前咁好姐妹，有咩事認句錯講句sorry咪得囉! 定係你根本唔想幫我咋!」見Mabel唔肯幫我我開始發佢脾氣。

「史德祖! 我同你十幾年朋友，你真係咁睇我? 我為你同佢反面，衣家你鬧返我轉頭仲要我同佢去say sorry? 你有無諗過我嘅感受? 係咪得佢重要我就完全唔重要? 仲有其他所有關心你嘅人都唔重要?」Mabel見我鬧佢都有d嬲，仲開始眼濕濕。

「係! 對我黎講Grace先係最重要，只要佢肯返我身邊其他野我全部都可以唔要! 我唔需要你地嘅關心我淨係想要佢嘅關心，你幫就幫唔幫就以後唔好再理我! 我都唔想再比你地煩住晒，凡正你衣d拖都無拍過嘅人點會明白我呀，淨係識叫我唔好唔開心，要放低! 你估真係咁易? 你走啦! 我以後唔駛你理呀!」但咁並無令我心軟，相反總令我覺得好煩厭，心入面淨係覺得佢係唔明白我又唔想幫我。

「… 點解人總係唔識珍惜真係珍惜自己嘅人，而只會當唔珍惜自己嘅人先係寶…史德祖，記住你今晚講過嘅野… 」Mabel聽完我講後，喊住咁講完衣句說話就走左。

果刻因為心情唔好又飲左酒，衝口而出講左好多難聽嘅說話。見到Mabel果刻嘅眼淚同喊聲，我知我真係傷害左佢，但因為硬頸，我並無追返佢。而冷靜返之後我又諗，或者寧願佢傷心一陣，都好過要佢再為我花精神同時間。所有嘅痛苦就等我自己一個承受，無謂連累其他人陪我一齊唔開心。所以雖然抱有歉意，但我就一直都無同Mabel講對唔住。 只係當時嘅我並無諗過衣次之後，我地再見面已經係三四年後嘅事，而我亦會因為Grace嘅離開而繼續頹廢足咁多年。

岩岩入嚟睇下有冇

本身今日諗住一篇，不過岩岩發現原來多左個正評（雖然同時間都多左個負評），所以都照加多左篇加速下

不論好壞 都係一種支持

幫推

你講得岩 代表至少多左兩個人睇

多謝！