<因為EX 我成為左一個禿頭嘅毒撚 然後遇到一隻猫>

14. 得與失 (一)


比賽仲有五秒，我地把握最後衣個暫定制定最後一球嘅戰術，同時間其他後備球員都立刻幫我抹乾淨個傷口同貼膠布。果陣我同Grace講完句野後因為時間緊逼又太過專心場波，所以望唔到佢嘅反應。但衣家係天上面當我可以一直望住阿Grace，我先見到佢果陣原來一直好擔心好緊張咁望住我，聽完我果句說話後眼角竟然仲有d淚光添。

「原來果陣Grace係咁感動咁擔心我… 不過我唔想再回憶起之後嘅片段喇…」我係天空自言自語。

「衣個世界好多時有得必有失，有失必有得… 你係失去左d野，但同時間你都知你係因為咁得到左另一d野呀。」貓仙人好平淡咁講。

我無再回應，因為我知之後會發生咩事，一個我唔想再諗起嘅遺憾。

最後嘅戰術，係同之前一樣大家拉空再等阿威幫我單擋等我射波，如果我射到就射，射唔到就傳比技安等佢係籃底附近完成最後一擊，阿希就負責企係另一邊有威脅嘅位置拉開對手部份防守球員。最後對面果然對我最防範，所以對手擺脫左阿威嘅單擋追得切我，我出唔到手下只好將個波傳比技安，點知係衣個時候我竟然太過心急一時手快將個波誤傳左比技安隔黎嘅敵人。果刻大家都呆左，然後無情嘅哨子聲亦同時好快響起，因為我嘅失誤我地最後以一分之微只可以飲恨屈居亞軍，估唔到我會連誤傳衣樣野都學埋櫻木…

果刻雖然場外好多聲音，但我就好似乜都聽唔到咁，只係呆左咁企係度，接受唔到比賽已經完左嘅事實，直至隊友過黎安慰我，捉左我離場，我先開始識喊…

醫波嘅時候，大家都無咩出聲，但從阿希嘅眼神，我知佢好嬲，因為我辜負左佢同大家對我嘅信任，所以一醫完波佢就好快咁走左，反而技安就過黎安慰左我兩句。不過當刻嘅我，心裏並唔好過，內疚同失望，令我唔敢面對隊友同Mabel佢地，所以之後我都好快離開左球場…

之後幾日我都無晒心機，放學亦無再去玩，不過因為驚要面對Grace，所以我都係專登流連左陣先去等巴士返屋企。不過幾日後，當我去到巴士站嘅時候，我竟然都係見到Grace。

「終於等到你喇…」佢見到我後對住我講。

「你專登係度等我?」我有d想逃避但又避唔到只好咁問。

「係呀… 我見你上堂無心機，衣幾日又無玩MSN，咪專登係度等你想問下你點囉…」Grace有d擔心咁講。

「我無野呀… 」我裝作無事咁答。

「無野你又咁無心機? 而且我聽講你衣幾日都無去打波喎… 」Grace無信我追問道。

「我…唔想再打喇…唔想再累人… 」我只好如實作答。

Grace:「所以你想就咁放棄?」

「我唔知呀…」果刻我真係唔知。

「失誤每個人都有，就算NBA d球星，每場都會有，你唔好咁自責啦…」Grace嘗試安慰我。

「NBA d球員係收錢打波，而且每年都有比賽，但我地好可能淨係得衣年… 大家信我先比我負責最後一擊，但我就累佢地輸波… 射失都還好，但偏偏我係犯d咁低級嘅失誤… 我原諒唔到我自己…」我好自責咁講。

「咁你有無諗過佢地點解會信任你? 因為你平時比到信心佢地… 証明你係一個好球員好領袖! 你唔可以因為一次失誤就打沉自己架… 唔係你先真係辜負左佢地嘅信任… 」Grace又繼續勸我。

我:「我明白… 但衣一刻我真係唔想再打波喇… 」

「喂… 你記唔記得你差我一個願望? 」沒辦法下Grace突然提道。

我:「記得…」

「我衣家就用左佢!我要你唔可以放棄，要繼續打波，仲有，邊度跌低邊度起返身，你失誤輸波，唔係應該放棄，而係應該繼續努力，下年為你嘅隊友一齊贏返返黎!」Grace用力咁鼓勵我。

「好難架…今年C grade係最大機會，之後我地上到B grade就更加難…」但我知之後嘅機會其實好渺茫。

「你係咪想講過嘅野唔算數? 而且我認識嘅史德祖係唔會咁易就被打沉架喎…」見我仲係咁Grace開始嬲嬲地。

「唔係…好，我應承你，不過我有個條件… 」

無法下我只好應承。事實上雖然我口係咁講，但其實Grace頭先講嘅野係話醒到我同令我幾感動，我係唔應該咁易放棄。我欠大家嘅野應該係要加倍努力咁償還而唔係就咁放棄同逃避。突然間我心入面有股豪氣橫生，仲順勢想同Grace提出一個條件，

「咩條件? 」Grace好奇問道。

「我要你陪住我，同我一齊努力。 」我好有力咁講。

「無問題呀~ 」Grace聽到我嘅要求好開心咁答應。

「我指… 你要以女朋友身份陪住我，支持我，同我一齊努力。」見佢唔明我意思我再略加解釋。

「下?」Grace即刻有d反應唔切。

「得唔得?」但我無退縮。

「攪錯呀… 人地鼓勵你，你就乘機咁… 你明知我18歲前唔會拍拖架…」明我嘅意思後Grace塊面紅到好似蘋果咁，而且有d驚慌失措。

「唔得咁就算啦…」我扮晒失望，其實果刻我本身就唔諗住自己會成功，好可能當時只係熱血上腦又或者單純係另一種自暴自棄嘅方式想懲罰自己，然後專心打波。我甚至有諗過佢會一氣之下走左去。

「你… 好! 我應承你…」點知佢見到我成個人好似又再灰返後，竟然比左一個我從無諗過嘅答案我。

「你… 真係應承我?」我唔敢相信自己嘅耳朵。

「做咩呀，到你想反悔呀? 我無問題架~ 」見到我自己反而淆底嘅反應Grace好開心，仲即刻回復返佢嘅本色想食返住我。

「梗係唔得! 應承左無得反悔架!」驚佢真係反口我立刻大聲講道。

「不過講明呀，如果你下年贏唔到我就即刻同你分手!」Grace再補充。

「所以我地真係…」因為太難以相信，我想再確定一下。

「傻瓜~ 記住你講過嘅野呀! 咁我唔陪你搭車喇，Byebye~」點知我未講完Grace就打斷我插口然後拎轉頭就走。

「下? 你去邊? 咁我地即係點呀?」我心急追問。

「我衣家要趕住去補習呀，再講啦~」佢覆左一句後就繼續向前跑走左。

原來佢今日係偷偷地無去補習然後係巴士站等我，所以見我無事佢就即刻衝返去補習。就係咁，我同Grace就突然間就成為左男女朋友嘅關係。


題外話，之後就算我有繼續打籃球，我地都再無入過決賽。阿希因為成績太差，唔可以原校升讀中四，而隨住我地升左上B grade加上越黎越多男仔發育長高而技安自己又無再點增高，佢180cm嘅優勢亦好快蕩然無存，所以之後就算點努力都好，我地都無再接近過冠軍…

不過我同Grace都好有默契咁無再提衣件事，所以我地都無真係因為咁而分手。但正因為咁，令我對當日嘅誤傳更加內疚，亦成為我人生其中一個遺憾，因為我無機會補償到比我嘅隊友。


「係嘅，當日係因為我嘅失誤，造就左我同Grace一齊嘅契機。不過衣家比我揀多次，我可能寧願想要個冠軍。」天上嘅我對貓仙人講。

「又唔好咁武斷。你咁諗係因為你見到衣家嘅結果，但有d野你係唔應該忘記。」貓仙人平靜咁講。

支持樓主

幫樓主推一下, 賓周故開始睇樓主, 其實幾好睇

唔明點解咁少人睇.

加油

多謝你地支持呀
隨住劇情推進希望慢慢會好d
我寫d故通常係要中後期先會慢慢比到d感覺大家

15. 得與失 (二)


同Grace所謂嘅拍拖，其實開頭根本係比佢呃左，因為就算名義上一齊左，我地嘅相處同之前可以話係完全無分別。

「每日可以MSN傾陣偈，每星期可以講一次電話，每個月可以出一次街。不過因為大家仲係學生，所以唔可以拖，唔可以攬唔可以錫，直至大家18歲。」 果晚Grace好快就同我約法三章。

雖然條件苛刻，但可以名義上同Grace拍拖，特別係頭幾個月，我都仍然好開心。我知道佢為左鼓勵我肯咁樣，其實已經係作出左好大嘅讓步，我一定要好好珍惜同尊重佢。於是我地就跟住佢嘅法章開始左我地嘅拍拖生活，當然除左一個月先出一次街，間中我地都有一齊放學搭巴士返屋企，唔係就真係太過悲慘。而隨著時間流逝，我地對大家嘅認識同感情，都與日俱增，但就真係一直守住佢定嘅界線完全無任何身體接觸。衣種柏拉圖式嘅純精神戀愛你聽落可能覺得我地好戇居，但無可否認衣個都係我地細個果陣未被社會洗禮而獨有嘅一種純真。不過當大家感情都越黎越深，我地第一次嘅拖手，始終都係等唔到18歲果日，雖然已經好接近。

第一次拖手係會考後我地有次睇戲，即係我地所謂開始拍拖嘅兩年後。可能因為大家考完試都鬆左一口氣，加上一齊左兩年大家其實都越黎越鍾意大家，所以果日我係睇戲期間，終於鼓起左勇氣去拖住佢隻手。佢初初有少少震想縮，但好快就決定反拖返我。手心存來嘅溫度，令我個心首次被濃濃嘅甜蜜所溶化，望向佢嘅眼神亦都充滿住柔情。我地之後就一直拖住，直至果日夜晚送到佢返屋企留下，我地兩隻手先捨得分開。

不過無人會諗過拖手後我地嘅下一步，竟然係一次過完成晒成件事仲跑埋壘返home…

可以同Grace拖手已經夠我開心好耐，所以係第一次拖手後兩個月，我都唔敢再進一步做d咩。但兩個月後我卻突然面臨我人生第一次最大嘅打擊，因為我爸爸突然遇上交通意外過身。果段時間嘅心情，我唔知點形容，只係覺得一切都好突然，個心好似裂開左咁… 我覺得好絕望以後無得再見到老豆，好懊悔以前無好好孝順佢珍惜同佢相處嘅時間… 果段時間晚晚我都只可以係床上面喊，而為左令自己舒服d，我仲開始迷上左酒精…

我記得果晚係攪掂晒老豆d身後事無耐，而阿媽就因為傷心過度加上太過勞累所以攪掂無耐就突然暈倒入左醫院。好彩醫生檢查完後話無咩大礙，只要平伏心情同休息夠就會無事。而過左探病時間後我就自己返左屋企望住空蕩蕩嘅屋企又開始飲酒，因為我知唔飲我會訓唔著。

點知突然間有人襟鐘，一開門竟然係Grace。

「阿祖，Auntie有無事呀? 」一見到我Grace就好擔心咁問。

「無事呀唔駛擔心，醫生話只係太勞累，休息下就無事，觀察多晚應該明天就可以出院喇。」我安慰Grace希望佢唔駛擔心。

「咁就好喇…咁你呢? 你點呀?」但Grace仍然係一臉憂心咁問。

「我無事呀…」我言不由衷。

「衣段時間我知你一定好辛苦，你要小心身體呀，唔係我驚你都會暈埋… 對唔住我好似咩都幫唔到手咁… 你記住有咩要幫手或者唔開心都可以同我講架…」Grace捉住我隻手同我講。

「傻啦，你一直陪住我已經好好，點會無用呢? 夜喇，你返屋企先啦，唔好要Auntie Uncle擔心，唔駛擔心我呀… 返到去同你傾陣電話?」我拍一拍Grace的頭頂安慰佢。

「我想係度陪多你一陣呀…」但Grace竟然唔想走。

「咁好啦…多謝你…」我亦接受左Grace嘅好意，因為衣刻問心果句，我都好想佢可以陪住我。

「傻啦… 我係你女朋友黎架嘛…」Grace見我無拒絕就甜甜一笑咁講。

本身我地坐係梳化繼續傾下偈都無乜野，直至Grace突然指住我個飾物櫃講

「嘩，衣架LEGO跑車好大架好靚呀!」

「係呀，係幾個月前老豆買比我嘅生日禮物…」講完諗起自己果陣收到份禮物開心到攬住左老豆係咁大叫，我突然再忍唔住，好似觸動左某個開關咁開始爆喊…

「Grace，我以後無得再見老豆喇，我真係好掛住佢… 點解我以前唔對佢好d仲要成日頂佢頸…嗚嗚…」淚水缺堤徹底失控，我喊到成塊面都係眼淚。

「對唔住呀阿祖… 我無心架…你喊啦…喊晒出黎會舒服d架…」Grace見到我突然咁好驚又好內疚自己提左d唔應該提起嘅野，於是忍唔住衝左過黎攬住左我…而我只可以不斷咁係佢懷抱入面喊。

直至過左一段時間，我情緒開始受控，發覺自己都攬住左Grace，近距離見到佢為我擔心但又好靚嘅樣子，加上酒精令我自制能力大減，我忍唔住就錫左落佢個嘴度。佢震左一震，但無阻止我，相反仲好羞澀咁嘗試回應我…

錫錫下，加上醉醉地，我開始忍唔住，本能上咁想得到佢嘅更多，我發覺我隻手不自覺已經伸左入佢件衫入面…不過佢仍然無講咩，任由我撫摸佢襯衫下面應該從未被親人以外其他男性觸碰過嘅身體。可惜佢嘅縱容並無令我就咁滿足，相反佢間中一兩下因敏感而發出嘅聲音令我嘅獸性越發不可收拾，我突然一個翻身將Grace壓左落梳化開始想除佢衫…

「阿祖…唔好呀…」Grace終於感到害怕，雙手開始掙扎嘗試想阻止我。

「對唔住呀Grace，但衣刻我真係好需要你… 求下你唔好推開我…」講完，我又有滴眼淚流左落黎，仲滴左落佢塊面度。Grace聽完又感受到我適眼淚之後佢竟然真係無再反抗，合埋眼後就任由我好粗暴咁除晒佢身上面嘅衫。我稍為欣賞完Grace雪白無瑕嘅胴體後就再忍唔住成個人壓左落佢度，然後瘋狂咁親吻佢全身嘅每一寸肌膚…

其實本身我對果晚所發生嘅情節並唔係太有記憶，只係記得到我第二朝醒既時候Grace已經走左，但就留低左張紙條同一個杯麵比我。不過發現被下嘅我並無著衫，而床上又好似有d戰鬥過嘅痕跡同氣味，一部份零碎嘅片段都慢慢係我腦海中浮現返出黎。就係咁，我突然一晚連升幾級，同Grace做晒攬同錫仲食埋佢隻豬。

未親眼見到自己嘅”獸行”，我本身嘅感受都無咁大，事後只係好內疚同感激。但衣家親眼睇住自己嘅所作作為，下面仲傳黎緊Grace當時羞澀又痛楚嘅哼音，我真係好嬲我自己。

「唔係親眼睇住我都無咁大感受… 我真係好仆街呀!竟然利用Grace嘅同情心咁樣拎左佢嘅第一次…」我忍唔住鬧自己。

「咁你都唔係有預謀嘅，果刻你真係好唔開心好需要釋放自己嘅負面情緒，而果陣嘅佢亦真係好擔心你好著緊你… 所以我先話有d野你唔可以淨係睇最後嘅結果去判別。」貓仙人仍然維持佢一貫嘅冷靜講道。

「咁問心我一直都知Grace果陣對我係真心，唔係又點會換黎之後咁大嘅痛苦?」我同貓仙人講，亦係同我自己講。

16. 轉變

梳洗完再食埋個杯麵後，我立刻去左搵Grace諗住負荊請罪。去到佢屋企樓下，好彩佢仲肯落黎見我。

「Grace…對唔住呀…」一見到Grace，我就好似個做錯事嘅細路仔咁企左係原地不斷講對唔住。

「知自己琴日幾過份喇咩?」Grace好似真係好嬲咁講。

「我…對唔住呀… 我都唔知點解自己會咁…」除左對唔住我唔知自己仲可以講d咩。

「咁你衣家諗住點?」見我咁Grace又問。

「我…一定會負責任，以後會更加好咁對你!」錯已經發生左我改變唔到，唯一可以做嘅就係盡量彌補對方，所以我好真誠咁講。

「想負責任就應承我，快d振作，你爸爸都唔想見到你為佢而傷心。我明係好難，但你一定要努力，我都會一直陪住你。當然，你對我都唔准始亂終棄呀!」Grace終於由嬲嬲樣變左做笑得好甜嘅樣。

「多謝你呀Grace… 放心，我一定會振作，亦永遠唔會唔要你，衣世我都會好好對你架!」知道得到對方原諒，我緊緊咁攬住左Grace講。

係，果刻我同自己講以後都要好好對Grace，點都唔會離開佢，只係我無諗過我唔離開佢唔代表佢唔會離開我…

自從果晚後，我同Grace嘅關係可以話係一日千里，親密左好多。而不得不提，發生左關係後佢對我嘅態度亦完全唔同晒，變得對我極度依戀好鍾意痴住我。難怪有人話當女仔失身於你，佢個心同樣都會跟住比埋你。我地嘅關係確實因為大家有左最親密嘅接觸而昇華左去另一個層次。而我地有左第一次後，佢都無抗拒再有第二三四次，間中都會肯同我攪野滿足我嘅需要，所以我地真係過左好開心好甜蜜嘅一段時間。

之後其實我都有問返Grace點解果晚會比我，佢話佢本身真係完全無諗過，但果刻佢唔知除左自己仲可以點幫到我，因為果刻佢感受到我真係好需要佢，佢唔忍心拒絕… 當然佢話最主要係因為之前兩年我都可以一直忍到無做任何過界嘅野，連拖手都無，所以佢可以好信任我對佢係真心絕對唔係玩下玩下，亦唔可貪圖佢嘅外表只係想攪佢，佢可以好放心咁將自己嘅第一次交比我…


我係上面睇住Grace過往對我嘅點點滴滴，真係百般滋味在心頭。果刻嘅我地，大家對大家嘅感情都係百分之百真心，點解最後會變成咁? 睇返晒咁多回憶片段後，我係咪真係可以繼續嬲得佢落?

「好喇，前事回憶都差唔多喇，我地係時候去到衣個平行時空嘅轉捩點。」貓仙人襯住間場時間突然講。

「轉捩點?」我唔明白。

「嗯… 有d野，可能你自己都唔記得喇…」貓仙人一副高深測嘅樣子。


我同Grace自從果晚之後嘅關係都一直好好好甜密，不過避免故事過份冗長，我就唔係度點描述，總知就好好，製造左好多甜密嘅回憶。然後時光飛逝好快又過左兩年，轉眼間我地都成為左大學生，不過就係唔同大學。Grace聽取左父母意見入左港大商科，而我就去左中大讀IT。本身我都想入港大，但因為英文差港大唔收所以就入左中大。然後我地就咁被逼分開，各自迎接我地全新嘅生活圈子。

入到大學，真係好多野唔同左，你會接觸到好多唔同嘅人同事，生活摸式亦同中學完全唔同，好多野你都終於可以真正咁自己決定，例如返唔返學，參加D咩，幾時返屋企，去唔去exchange等等，因為去到大學，一般正常父母都會完全放手唔再干預你嘅決定。同時間一直陪喺自己身邊嘅同學仔，亦都突然換成左另一批完全陌生嘅新面孔，所以大學生活對每個年青人都可以有構成好大嘅衝擊同改變。當然，衣d都係事後我再諗返先至發現。

因為唔想阿媽自己一個，所以雖然返學放學遠d但我都無選擇住hall。相反，Grace本身暗地裏其實係好鍾意玩同chur嘅一個人，又想試下脫離父母獨立，加上港大hall嘅文化亦都好出名，所以Grace就選擇左住hall。

起初，因為仲未適應新環境，不論同Grace又好同其他中學同學都好，我地都仲會見得好密。但隨住同新朋友越混越熟，大家都各自建立左自己嘅新圈子，大家見面嘅次數亦自然慢慢減少。不過咁唔代表話大家嘅友誼受損或者變得無咁重要，因為去到某個位置嘅朋友，係唔需要成日見面都仍然會keep住好friend。而慢慢你都會發現，大學同學同中學同學，其實並唔係可以互相取替嘅存在，因為唔同成長時期建立嘅友情，原來係心入面嘅位置都會唔同。

話題講遠左少少。講返我同Grace其實都一樣，初初我地都仲成日會盡量抽空見面，但耐左見面嘅熱情都會稍為冷卻。例如以前我為左可以見佢唔介意山長水遠咁夜晚入去港大同佢食飯，但過左幾個月後，我都少左動力會咁做。另一方面佢平時都好似好忙咁，hall多function又多野玩，之後慢慢變左我地多數都只係星期六日先會見面。而當衣d改變潛移默化咁出現而你又習慣左，唔知點解就好自然咁就總會有其他人出現係你身邊，影響你地嘅關係﹐所以大半年後亦確實係曾經有d事發生過。

係大學開學前嘅細O camp，我認識左Cindy，佢係我果組入面唯一一個女仔。而因為細O嘅關係，我同果幾個組員都係比較熟絡嘅一群，就連之後嘅group project，有得自由分組我地都盡量會夾埋一組，所以我同Cindy都算係大學同學一齊玩埋果一堆，不過就真係一直都只係好朋友。

Cindy外貌唔算特別出眾，細粒，包包面又有少少baby fat，但就係一個樂觀健談又好outgoing嘅女仔。佢會鍾意行山滑水騎馬，每星期都總係有數之不盡嘅活動，仲令佢曬出一身黑實嘅膚色。不過因為咁嘅性格，佢係班入面其實都幾受歡迎，亦有唔少狗公埋身，但佢因為有一個青梅竹馬嘅男朋友，所以一直都不為所動。

而我同Cindy可以進化到比一般朋友更加好傾，係因為有次閒談下我地發現原來大家都有一個共同偶像，就係NBA嘅球星Vince Carter。唔好以為我係射手就會鍾意返射手，因為我做射手其實都只係因為自己先天條件不足嘅問題而又咁岩好似有d射波嘅天份。如果有得揀我寧願做阿希果類剷得又射得嘅球員，因為實在型太多…

而Vince Carter嘅入樽確實係深深震憾到我， 我仲記得當年睇住佢係奧運一跳跨過個七尺巨人然後入樽，真係令我忍唔住彈左起身大叫左一聲。而Cindy亦一樣，比佢打波嘅果種魅力所深深吸引。但因為Cindy男朋友係踢波唔打波，所以Cindy同唔到佢分享Carter嘅話題，而當佢遇到我衣個同佢一樣嘅die hard fans，我地霎時間就好似遇到知音咁講過不停，然後大家嘅距離都突然間拉近左唔少變得更加熟絡。又題外話一下，Grace都鍾意睇NBA，但佢就鍾意Kobe唔鍾意Carter，因為佢未贏過任何冠軍指環。

「我覺得只有帶領到球隊贏嘅人先至可以叫真正嘅勁~」

衣個係Grace嘅說法，事實上佢一直都係一個幾著重結果嘅人，正如當年嘅壁報設計比賽一樣。諗返其實都幾好彩佢無真係因為我之後贏唔到學屆比賽而同我分手…

「鍾意卡達嘅人唔會係壞人~」而和Grace稍為唔同，衣句係Cindy成日掛係口邊嘅說話。

因為避免鬧交我都好少同Grace講卡達嘅野，但同Cindy就完全唔同。

不過事後諗返我地之所以咁熟其實仲有另一個原因，就係因為大家都知大家有另一半而且仲感情好好，所以大家都無咩避忌，可以好放心咁暢所欲言。但衣種突然昇華嘅關係其實係好危險，特別係當以後如果一方同另一半感情出現問題果陣。

17. 改變 (一)

「你無事嘛?」大半年後嘅一日，我同Cindy係Lab趕完project後因為見佢好似心事重重咁所以問佢。

「我發現左Johnny出軌…」Johnny係Cindy青梅竹馬嘅男朋友。

我:「你…肯定?」

Cindy:「嗯… 我有friend見到佢地一齊，然後我再偷偷查左佢電話…」

我:「咁你諗住點?」

Cindy:「我都唔知… 分手我驚我地會連朋友都做唔成，而我想像唔到無左佢我會點…」

我:「但你接受到佢有第二個?」

「我都有問過自己衣個問題，因為我相信佢最愛嘅點都會係我，我地嘅感情係無人可以取代… 但咁係咪就代表我接受到佢會偷食? 我都唔知…」Cindy帶著迷茫咁講。

「衣個問題我都代唔到你答… 但如果你睇唔開接受唔到而逼自己去接受，你衣世都唔會開心… 而我覺得一段關係，如果一方單向地變得屈就同卑微，咁衣段關係注定唔會健康發展而只會變得越黎越差同唔平等…」我語重心長咁講。

結果一星期後，Cindy回復左單身，而唔知消息係邊度傳出黎後，成班IT狗公更加主動瘋狂咁去接近Cindy。不過明顯Cindy並唔想咁急去搵另一個，對於衣班狗公佢只係覺得煩厭。而係無辦法下，佢只好搵左我出黎做擋箭牌，之後任何人想約佢佢都會話約左我… 因為大家都知我有女朋友，所以雖然咁慢慢令到班狗公知難而退略為收斂佢地嘅行為，但同時間我都成為左佢地嘅眾矢之的，背後不斷咁話我一腳踏兩船，獨食等等…

「對唔住呀，累到你都比人杯葛…」有晚我同Cindy食晚飯果陣佢同我講。

「你都知呢… 不過ok嘅，最緊要幫到你。」我苦笑住咁講。

「多謝…」

「但點解你唔嘗試下同佢地接觸? 話唔定有個可以令你心動呢?」我好奇問。

「現階段我唔想再拍拖，我根本都未放低佢… 而且果班男仔… 算啦，真係無興趣，個個都好似有目的咁… 睇到Leanne班fans你就知有幾可怕啦…」Cindy苦瓜乾咁講。順帶一提， Leanne係Cindy其中一個best friend，亦係衣家中大好出名嘅其中一個女神級人物。

「咁我都明… 但你就唔驚我都係佢地一份子?」我又問。

Cindy:「你唔會啦，你同佢地唔同…」

「因為鍾意Carter嘅唔會係壞人?」我講笑咁問。

Cindy:「係呀~ 而且你對女朋友咁好，點會對我有意思呢? 我都係因為咁先咁放心同你熟架咋…」

「原來係咁… 不過我同Grace近排都好少見…」提起Grace我都有少少失落。

Cindy:「點解? 佢仲係好忙?」

「嗯… 我地嘅距離好似越黎越遠咁，衣家有時一星期我地都未必見到一次。而次次見到佢都係講佢hall d野…」我乘都機訴下苦講。

Cindy:「有無同佢傾過?」

我:「我都有諗過，但次次見佢講得好似好開心咁，我就唔敢，驚掃佢興…」

「你睇你對佢幾好呀~ 唔緊要啦，衣段時間就你陪下我我陪下你，好快就捱過架喇~」Cindy 突然搭住我膊頭講。

於是我地就開始越黎越習慣對方係自己身邊嘅日子。之前每次Grace同我講唔得閒，我都會唔開心，但因為想見佢又會繼續約。但多左Cindy陪伴後，慢慢就算Grace唔得閒推我，我都越黎越少難受嘅感覺，甚至到到某個位，我因為唔想自己再失望開始直程放棄左約佢反而直接約Cindy。

一直我都無咩留意衣d潛移默化嘅變化，直到有一日

「Johnny係咁求我原諒佢…」Cindy同我講。

「所以你心軟?」我望住佢問。

「我唔知… 但過左咁耐，我真係有d原諒佢嘅衝動… 始終我地真係識左好耐感情好深…」Cindy有d艱難咁講。

聽到佢嘅答案，我個心突然覺得好唔舒服，我原來並唔想佢地復合… 表面上我以為我只係驚Cindy會受傷，但慢慢我發現原來我係驚佢地一齊左去，Cindy就唔可以好似衣家咁一直陪住我，大家可以成日見面，好舒服咁相處。然後，我發現我對Cindy原來不知不覺間，已經唔只當佢係朋友咁簡單，我會想獨佔住佢…

「你覺得佢唔會再犯?」我收起自己嘅負面情緒冷靜咁問。

Cindy:「唔知…我想相信佢，但我知我個心相信唔到… 但我驚我再係咁，我會做錯事…」

「做錯事?」我唔明白。

「我驚我會鍾意左我個好朋友，我會想係佢女朋友手上搶佢返黎… 但如果我同返佢一齊，繼續鍾意返佢，我就唔會咁…」Cindy突然dup低左頭唔敢望住我咁講。

「所以你為左咁寧願作賤自己?」我把聲變得有d尖銳。

「唔係咁我唔知自己可以點… 」Cindy有d驚好細聲咁講。

「唔得! 你唔可以咁… 唔係你只會以後繼續唔開心架咋…」但我就越講越大聲。

「咁你係咪可以對我負責任呀? 只有你肯同我一齊我先有可能抗拒到佢… 但你知唔知咁意味住d咩? 你得咩?」然後Cindy都再細聲唔到。

果刻，我好有衝動攬住Cindy然後應承佢我可以。但同時Grace嘅面孔出現係我腦海中，好清晰咁話比我知唔可以… 雖然我地確實係越黎越疏遠，感情都不自覺間變淡左，但唔代表我可以背住佢咁做… 霎時間我陷入左天人交戰。

「對唔住…」良久，我都係艱難地講出左衣三個字。


「傻啦，你無對我唔住…」雖然應該早已估到答案，但聽得出Cindy嘅聲音有d失望但又有d如釋重負嘅感覺。

之後，我地都無左主動去搵大家。而雖然我好唔開心，好唔想Cindy返返去佢個青梅竹馬度，但我都真係無野可以做到亦無資格…

不過人真係好得意，當你發現自己感情轉移左，可以有第二個選擇果陣，同一件事你嘅感受同容忍力會可以好唔同。因為無搵Cindy，所以我注意力好自然咁去返Grace度，甚至係更加想搵佢等我唔駛再諗住Cindy。但當Grace再一次又一次咁以好忙為由拒絕我，我終於忍唔住首次爆發左出黎。

「其實我到底仲係咪你男朋友? 點解次次我嘅priority都係最低? Hall，同學，project，溫書，屋企，好似我永遠都係排到最後? 你諗下我地有幾耐無見? 」

「咁我真係好忙嘛… 我都已經盡量有每星期抽時間出黎啦…」Grace有d唔好意思咁答。

「每個星期淨係兩個鐘陪我食個lunch?」但我仍然繼續渲泄我嘅不滿。

「點解你唔appreciate下我寧願唔訓耐d都抽時間出黎見下你? 有時我都好累架… 你估個個好似你咁得閒，日日淨係玩? 你有無諗過大學想得到d咩拎到d咩走，第日畢業後自己想做d咩? 唔係唔好玩，但都要諗下點好好裝備自己架?」結果估唔到Grace嘅耐性都好快見底，仲引發埋可能佢一直想話我但之前無話嘅野。

「所以衣家係我錯，想見你都係我錯!」其實衣段說話可能已經比左d暗示我，但當時嘅我當然完全聽唔入耳。

「費事再理你! 你冷靜完後先再搵我啦!」Grace講完後直接cut左我線。

比佢Cut左我線後我真係好嬲，點解想見女朋友會係錯，會係唔上進?到底佢仲鍾唔鍾意我? 仲想唔想同我一齊? 點解我衣家要愛得咁折墮?

果晚，我打左個電話比Cindy。

「今晚可唔可以出黎陪我?」


「咦? 點解會咁嘅?」天上嘅我睇見自己有咁嘅舉動後十分意外。因為印象中我果日雖然好嬲亦有諗過搵Cindy，但最後我並無咁做，因為咁好似利用左Cindy又對Grace唔住。

「衣個平行時空嘅你選擇左另一條路，而衣個都可以話係你衣個世界入面嘅一個轉捩點。」貓仙人氣定神閒咁講。

樓主寫得好好
所以我推

再推

多謝你
見幾日正評數無旭過我都開始有d淆底

可能個標題唔夠突出 但你文筆同故仔係好好嘅

好睇

唔好唔出文
我係覺得好好睇
推

多謝你讚賞
文筆睇過其他作者d文我唔敢話自己好呀
今次都係第一次試成個故仔都用白話文寫
希望盡量流暢d
最緊要有人鍾意睇

你寫幾多 我睇幾多

多謝支持！
放心啦 開左頭無論點我都會努力寫埋佢嘅
之前幾個故我都無試過脫稿
相反仲等緊大家令我加更架

18. 改變 (二)

Cindy收到我電話並無拒絕我，於是我地就去左官塘碼頭果邊飲酒吹水，嚴格黎講係佢聽我吐苦水。

「其實我都已經咩都就晒佢啦，佢話忙唔得閒我都一直無比壓力佢默默咁忍受，因為我知佢有好多野想做又鍾意玩… 但我都係想佢間中都話比我知佢係鍾意我仲著緊我啫， 點解就變左係我唔體諒佢，全部係我錯? 咁有無人可以體諒返我?」我咆哮道。

「因為一直你都好體諒佢縱容佢，而當佢習慣左衣d成為理所當然之後，到有日你先埋怨佢，佢自然唔會認同…」Cindy冷靜咁分析。

「所以由day1 開始我就唔應該咁就佢為佢著想?」我問。

Cindy:「如果純從你地兩個人嘅相處角度出發，可能係… 而到衣家大家都習慣左，甚至感情已經變淡左，你再想去改變就好困難喇…」

我:「所以我就只好繼續忍受有佢等於無佢?」

「其實… 你有無諗過你地兩個都已經變左?」Cindy猶豫左陣後問道。

我:「變左?」

「例如你以前會忍受到佢咁，衣家唔得。而佢以前都唔會咁話你，唔會將你priority放到咁低，但衣家會。甚至，佢會開始對你嘅生活態度不滿… 你唔覺得衣d都係代表大家變左?」

Cindy嘅說話令我陷入左深思。到底係我變左定係佢變左? 還是… 大家都變左? 點解我會突然忍受唔到佢對我咁?

望住Cindy，我突然間好似補捉到答案。

「或者你都講得岩…好多野其實都不自覺間咁變左…」

「可能你要接受你地兩個已經唔係行係同一條直線上面，而當衣個問題出現，大家其實慢慢會越行越遠，而問題亦遲早會出現。」Cindy感觸地說。

「咁我可以點?」我無助地問道。

Cindy:「你只可以試下tune返自己嘅步伐希望可以同佢一致返。又或者… 搵另一個同你行同一條直線嘅人繼續行落去。」

「Cindy…」我唔知點回應好。

「阿祖，衣幾日其實我好掛住你… 無左你係我身邊，我先知原來你早已經成為左我生活好重要嘅一部份… 我知自己唔可以搵你，但我真係好辛苦… 為左忘記你，我越黎越動搖想同返Johnny 一齊… 但今日見到你搵我，我好開心，而聽到你同你女朋友嘅問題，我心入面竟然有個衝動叫我要搶你返黎… 我唔會比壓力你或者要你做d咩，不過我想話你聽，其實你係有唔同嘅選擇…」Cindy繼續將自己嘅心意一次過講晒出黎。

「選擇? 係嘅… Cindy，想唔想聽我講心入面真實果句?」而佢嘅表白打動左我，令我越黎越動搖。

「想…」Cindy諗都無諗就答。

「我好唔想你返返去Johnny身邊… 我唔想你受委屈，唔想你唔開心，唔想你咁卑微… 而且，我好想可以繼續一個人霸住你…」受酒精影響我唔想再顧慮咁多鼓起勇氣將自己對Cindy嘅感受都講返比佢聽。

「真嘅? 但…」Cindy聽到後有d開心，但又有d擔心。

「既然佢已經唔需要我﹐咁我不如放手，然後搵個需要我又同我行係同一條線嘅人? 咁對你對我對佢，可能都係最好…」我再補充說道。

「阿祖…」Cindy已經開始有d眼泛淚光。

我無再比佢講落去，直接攬住左佢，然後就咀左落佢個嘴唇度。好快，佢都好熱烈咁回應我。

「阿祖，我都想同你試下一齊，但我唔希望你係一時意氣嘅決定，唔係我地都唔會開心亦行唔得遠，相反仲會破壞左我地本身嘅關係。所以… 不如你冷靜下先? 等你冷靜完後如果諗法無改變，我地先一齊，好無?」濕吻完後，Cindy略帶點喘息咁講。

「好… 多謝你呀Cindy，我會好認真咁諗一諗…」聽完Cindy咁講，我都開始冷靜落黎，亦認同佢嘅說話自己需要冷靜思考一下。

之後我地就好有默契咁無再講衣個話題，然後係海邊吹左成晚水。


第二日冷靜過後，我嘅心情亦更加複雜。一方面我無再咁嬲Grace，亦覺得琴晚同Cindy錫左好對佢唔住。但另一方面我亦唔可以否認我真係鍾意左Cindy對佢好有感覺，而我知道佢同樣需要我去抵抗Johnny。霎時間，我真係唔知應該點選擇。


「咦，點解我好似聽到另一個我諗咩嘅?」天上嘅我突然問道。

「衣個都係我嘅能力之一，因為同你個世界出現左分歧你未經歷過衣家發生嘅事所以亦未必知道另一個你諗緊乜，但由於你地其實係同一個人，所以我專登比你聽到另一個世界嘅自己諗乜，等你可以睇得投入d。呵呵，我係咪真係好勁好偉大呢?」貓仙人答答下又開始自high。

我:「係，你真係好叻好偉大… 但點解我衣家先發現嘅?」

「因為之前果d片段同你個世界無分別，所以佢同你諗嘅野自然一模一樣，咁你咪唔覺囉。直至故事發展到唔同嘅分支去到你未經歷過嘅部份，你自然無衣d部份嘅記憶，如果無我嘅幫助下你當然唔會知佢諗咩，只可以自己估估下啦。」貓仙人繼續解釋。

我:「原來係咁…」

「繼續心存敬畏咁睇落去啦。」貓仙人收起左頭先個自傲樣又變返目無表情咁講，但我感受到佢必入面其實好得戚。


而下面嘅世界過左兩日後，仲掙扎緊嘅我突然收到Grace嘅電話。

「Honey對唔住呀，我果日語氣係重左… 我冷靜後諗返，都發現自己其實真係不自覺咁冷落左你，我唔應該怪你發我脾氣… 你會嬲會唔開心，其實都係代表你仲著緊我。對唔住呀，我黎緊會改，會比返多d時間你架，你唔好嬲我啦…」

「傻啦… 我都有唔岩果日唔應該咁話你發你脾氣…」聽到Grace主動道歉，我心入面驚喜之餘又十分內疚，因為我諗起同Cindy果晚果個kiss，仲令我更加唔知點選擇好…

「為左表示我歉意，我有個idea想講你聽呀!」然後Grace又有d興奮咁講。

「咩idea?」我問。

Grace:「今個暑假我地考完試後一齊去過短trip 好無? 我地係個trip度補返晒之前失去嘅所有時間!」

「好呀!」聽到Grace嘅提議，我真係好開心，亦覺得衣個係修補大家關係嘅好機會於是無多諗就答應左。


係我原本嘅平行時空，雖然我同Grace並無鬧大交，但唔知Grace係咪都突然意識到我地嘅關係出現左危機，所以有日照樣打比我提出左衣個提議。而聽完佢衣個電話我當然好開心，暑假亦都同佢去左日本渡過左一個好難忘嘅旅行。係果短短五日，大家都只有大家，所有感覺都好似返返去大家未入大學之前咁樣。

而係衣個旅行後，我對Grace嘅感覺返返晒黎，亦無再諗過Cindy，只係諗住要繼續堅持同Grace一齊。 不過旅行完後，雖然我地有段短時間好似回復返昔日嘅關係咁，但慢慢地Grace又再投入返佢多姿多彩嘅生活，然後我地嘅關係又再度疏遠返，價值觀亦變得越黎越唔同。而喺三個月後嘅一日，佢終於同我提出分手，原因係佢覺得大家諗嘅野越黎越唔同，感情亦變得越黎越淡，咁不如早d結束。之後任我點求佢，佢都唔肯改變主意。而分手後過左無耐，我就從其他途徑知道左佢同左hall另一個師兄一齊。然後，我徹底崩潰亦踏上左頹廢宅男衣條不歸路，有左我之後悲催嘅十幾年生活。

但係衣個世界，當我同Grace收線後Cindy個樣就立刻出現係我個腦海中。於是我去左搵Cindy然後話左Grace個計劃佢聽。

19. 改變(三)

「所以你已經有左決定?」Cindy扮作無事咁問。

我:「我唔知… 理論上我應該同Grace努力修補大家嘅關係，但唔知點解同佢收左線後，我只係不停咁諗起你，所以先搵你出黎話比你聽。」

Cindy:「咁你去囉，之後你地好返繼續一齊，我又同返Johnny一齊，大家都好似無事發生過咁，其實都幾好呀。」

「但我唔想你同返Johnny一齊呀!」見佢好似無所謂咁我忍唔住開始大聲。

「你都有左決定啦，仲理我做乜啫!」然後佢都變得大聲，之後我就知原來佢頭先只係發晦氣，實質上佢仲係緊張我。

「我… 唔得，我決定左喇，我地一齊啦! 我唔可以比你走去不幸…」突然間我有左決定。

「如果你純粹為左唔想我同返Johnny 一齊而有衣個決定，咁都係算啦…」但Cindy並唔滿意我個反應。

「唔係… 最重要係因為我真係鍾意左你…」我再解釋希望可以消除佢嘅不安。

「真係? 咁你鍾意我d咩?」Cindy追問。

「鍾意你鍾意Carter，鍾意我地大家都有數之不盡嘅話題，鍾意你夠真夠率直，鍾意同你一齊好輕鬆舒服，鍾意我地係係同一條線上…」而我未講完Cindy已經忍唔住衝前攬實左我。

「我都係… 但你真係決定左?」佢唔放心再問道。

「嗯… 不過我有個請求。」我回抱返佢咁講。。

Cindy:「咩請求?」

我:「比我同Grace去埋個旅行先，我想留個美好嘅回憶比大家。之後…我會同佢分手…」

「… 好… 你為左我可以放棄佢，我無理由唔可以為你忍受一段時間… 而且雖然我知咁唔可以補償到d咩，但至少… 我個心應該可以對佢無咁內疚…」Cindy好快就答應左我衣個請求。

有左衣個約定，結果我同Grace照讓去左日本旅行。不過唔同嘅係因為我知衣個trip會係我地最後嘅時間，所以成個trip我對佢係更好，更溺愛，用盡我一切嘅方法去令佢開心，希望可以留個最美好嘅回憶比佢同大家，而佢亦好開心好投入，感受到佢真係好想補償返大家之前失去左嘅時間咁。到到旅行最後一晚，我地差唔多成晚都無訓過只係瘋狂造愛，努力想更貼近對方…

返到香港後，其實我都好唔捨得，但同時間我又有鬆一口氣嘅感覺，因為我知衣種矛盾同內疚夾雜嘅煎熬終於要完結了。

「Grace，不如我地都係分手啦…」返到香港幾日後，我調整好心情後終於主動同Grace講。

「下? 點… 點解? 你仲嬲緊我? 我地唔係無晒事仲係日本玩得好開心架咩?」Grace呆左數秒，然後先好似開始get到我講咩。

「因為…我地都改變左喇…你唔覺咩? 我地嘅問題，其實都無解決到，雖然衣家暫時掩蓋左，但之後其實都會繼續係度，因為我地已經唔係同一條線上面喇…」我解釋。

「咩唔係同一條線上面呀? 唔係架，有咩我可以改架… 我應承左你以後我會比返多d時間你，我實做到架! 你唔好唔要我呀…」Grace開始一邊喊一邊求我。

「我…對唔住呀… 我諗我真係唔可以繼續同你一齊…」再三猶豫我都係狠下左心腸。

「係咪因為有第三者? 你鍾意左第二個?」Grace靜左陣後問道。

「嗯…」而我諗左陣後唔想呃佢所以都無否認。

「史德祖! 咩大家改變左唔係同一條線上面啫! 講得咁好聽，好似責任係我度咁…你變心就變心啦，搵咁多藉口做咩啫!」講完，Grace就喊住咁走左。


為什麼你 帶我走過最難忘的旅行
然後留下 最痛的紀念品

「估唔到衣個世界嘅我同Grace會咁樣完結左…」背景又出現左配樂，但上空嘅我都無再理會首歌有d震驚咁講。

「未算… 之後發生嘅野你會更加估唔到。」貓仙人答道。

「但我唔明… 真係因為果晚搵左Cindy，kiss左，我嘅感覺就咁大分別可以咁撇脫選擇Cindy而唔係Grace?」我有d唔相信。

「因為係你嘅世界，你根本都無諗過分手衣個選項。如果唔係果晚見左Cindy佢同你表白然後提出同Grace分手再同佢一齊衣個可能性，你本身並無諗過衣個可能性。加上果個kiss令你意亂情迷又有新鮮感，直接引發左你對Cindy嘅感情，所以之後嘅結果自然好唔同。你地人類有時個心一變左，就點都救唔返，你繼續睇落去就會再有多d領悟架喇…」貓仙人緩緩咁講。


同Grace講完分手後，我無即刻搵Cindy同佢一齊，因為我覺得自己都需要d時間去調整自己心態，對Grace亦需要一份尊重。不過無諗過三日後，我竟然又收到Grace嘅電話。

「祖… 你老實答我，你有無同佢上過床?」

「無…」

「衣幾日我好掛住你… 我諗返好多我地以前嘅回憶，諗返起你對我嘅好，包容我嘅任性，係日本更加錫我錫到燶咁濟… 突然間我覺得我唔可以怪你鍾意左第二個，要怪只可以怪我無好好咁珍惜你，無比返相對嘅愛你，衣大半年甚至我連對你嘅重視都無，所以你先會鍾意左第二個… 我好後悔呀…」Grace帶著點哭腔講。

「你唔好咁講啦… 變心嘅係我，錯嘅都係我，唔好幫我合理化啦…」聽到佢咁講我只係更加內疚同心痛。

「我諗清楚架喇… 不如我地比多次機會大家? 以前嘅野我地忘記佢，黎緊我地一齊返呀? 我真係唔想同你分手… 為左你我甚至可以唔再住hall架… 你比多次機會我唔好唔要我啦… 求下你…」Grace哀求道。

「Grace 你… 我唔值得你咁委屈架…」對Grace嘅行為我感到好驚訝同震憾。

Grace:「唔委屈呀… 你老實答我，你仲鍾唔鍾意我?」

「鍾意…」我不能否認我對Grace唔係無晒感覺。

「咁咪得囉! 我地咁多年嘅感情，就咁放棄好可惜架… 我地比多次機會大家啦，為左你我咩都肯做架…」Grace聽到後有d開心，然後繼續哀求我。

我:「你比d時間我考慮下…」

Grace:「好…」

聽到Grace嘅哀求，你話唔感動就假嘅，亦令我為自己嘅行為同決定更加內疚… 要應承Grace好簡單，但咁Cindy又點? 佢已經等左我一段時間，如果我衣家先同佢講我要繼續同Grace一齊，咁我咪好仆街? 我做唔出… 但Grace已經放低晒身段咁求我，對佢我又唔係真係無晒感覺，要我咁hurt佢我亦都做唔出… 於是我用左個好多人都會用嘅拖字訣….

一方面我同Cindy解釋Grace嘅舉動我需要時間handle，盡量將佢嘅傷害減到最低。一方面我又同Grace講我需要時間考慮清楚同認清自己感受，唔想未確定自己做到又謬謬然應承左佢。但我無諗過我衣個舉動竟然反而引發Grace會越做越多野…

為左答謝大家琴晚嘅留言同支持，今日照加一更

支持

為左想睇下有無新讀者係度 我決定下個加更位係第7個正評

20. 人心

自從Grace提出復合後，每日佢都會message我噓寒問暖，又會成日想約我出街食飯，仲整左唔少小禮物送比我…

最令我印象深刻係佢整左本故事書比我，入面記錄低晒我地由相識到衣家嘅一切一切，仲貼左好多我地嘅合照係入面。

其中一張係聯會營我地觀唔到星後用相機係相畫畫嘅一張相，相入面得我同Grace兩個人，然後我地中間有個用閃光燈畫嘅心，同時間亦有個大心心包圍住我地。衣張相應該從未曝過光，因為係我果陣偷偷拜託阿偉同阿釗搵機會靜靜雞幫我同Grace影一張。Grace以為係好多人影，但偉個鏡頭其實就淨係影住我地兩個，至於阿釗係中途畫咩，除左畫果個當事人其實唔會有人睇得出。而由於我地果陣一次過影左好多相，衣張又係果陣最後一張，當果晚大家想睇返晒d相果陣，阿偉專登係前一張相就話睇完，所以Grace 應該一直無見過衣張相。衣張相係我嘅私人珍藏，本身諗住將來有機會先比個surprise阿Grace。

(點解Grace會有衣張相?) 我好驚訝。

不過Grace嘅文字好快就解釋左比我聽，原來係第二日佢有問過阿偉借部相機影相，然後無意中就發現左衣張相，佢初初以為係阿偉嘅惡作劇，但就無嬲仲要求阿偉要偷偷send返衣張相比佢自己一直keep住。而原來係衣次聯會營因為同佢之間發生過唔少事又比左影相睇星衣個驚喜佢，佢發現佢開始對我有少少感覺，所以之後先開始每晚會專登玩MSN同我傾陣偈。

「原來佢一早見過衣張相… 同埋原來係聯會營後佢已經開始對我有感覺…」天上嘅我見到衣幕後開始自說自話。

其實好諷刺，因為係我本身嘅世界，當Grace要同我分手後，我為左追返佢都曾經做過一模一樣嘅野，我整左本相冊將屬於大家嘅回憶同感覺都寫晒入去，而衣張相曾經係我自以為會surprise到Grace嘅殺著，但點知原來佢一早都已經有左衣張相，而我仲終於知道左Grace係幾時開始對我有感覺。

「不過我無諗過原來我地做嘅野會咁相似…」我又繼續喃喃自語。

「你地一齊左咁耐，唔多唔少其實都會互相影響大家，係大家嘅靈魂入面留低自己嘅烙印。你地嘅思想行為舉止，甚至講野嘅語調同用詞其實都會互相影響到大家，只係你地無留意啫。你地人類d戲唔係都有講，”戀愛會結束，經歷會留低”咩? 有時就算分開左，其實大家都會用另一個形式同緊你一齊，因為有佢先有衣家嘅你，亦因為有你先有衣家嘅佢。」貓仙人望住下面個世界講。

「嗯…」

但當我繼續望到Grace為我越做越多野，有時甚至去到有d卑躬屈膝嘅地步，我真係越黎越唔敢相信自己嘅眼睛。係我嘅時空，明明我先係Grace衣家嘅角色，但那怕我做幾多野，點求Grace回心轉意，佢都完全無動於衷，異常絕情。我又點可能諗到原來係另一個時空嘅Grace都可以有衣一面，真係風水輪流轉…

「見到咁嘅佢你衣家有無d心涼?」貓仙人見我一臉驚呆後問道。

「如果係我未回憶返之前嘅片段而見到衣一幕，我估我個心真係會有d暗爽。但衣家，見証返我同Grace嘅開始到相戀，再到自己衣個時空嘅背叛，我又無衣個感覺，只係有種無奈同心痛… 因為佢提醒返我Grace對我曾經都係真心真意，亦付出過好多，只係我地都敵唔過”改變”衣兩個字… 但係我唔明，如果佢真係咁鍾意我，咁著緊我想同我繼續一齊，點解我果個時空入面佢又要同我分手仲要咁絕情?」我真係唔明白。

貓仙人:「你地人類係好受自己情感影響嘅動物，就算明明係同一件事，但由自己提出定係人地提出結果都可以好唔同。不過又唔係唔可以解釋嘅，就好似有個一定要爆嘅炸彈，由你引爆定其他人引爆，你受傷嘅程度都可以好唔同。因為如果係你自己引爆，你會有心理準備，預先可以著定避彈衣，但對方就無咁好彩喇，突如其來嘅爆炸分分鍾被炸到遍體鱗傷…」

我:「係嘅… 自己嘅決定當然係易接受好多… 人點都係想係由自己去決定自己嘅命運。如果係我提出分手，咁衣個係我自己嘅決定，命運係由我自己掌控。但如果係Grace提出分手，咁衣個就唔係我嘅意願亦唔想去接受，而人總會想對抗命運自己幫自己話返事… 同埋果個旅行我覺得其實都有好大影響，因為佢令我地都返返去最好感情嘅狀態。當時嘅我，亦係因為旅行後下定左決心要繼續好好愛Grace專心一意同佢一齊，點知最後無耐就被拋棄，個正反落差實在太大… 衣個時空嘅Grace 可能都係一樣…」

貓仙人:「其實仲有幾個原因可以解釋。最重要果個係因為衣個時空你有Cindy，而你本身個時空佢提出分手時亦已經開始對另一個有感覺。當你本身感情已經分薄左，又知道自己就算失去左對方都有另一個人替補，感覺自然差天共地。相反，對另一個人黎講自己嘅另一半鍾意左另一個衣個消息自然亦會傷心欲絕。而且仲有個情況係你地本身各自被告之分手時都自覺對對方係有虧欠，所以覺得內疚係自己無做好本份令對方變心，自然會想彌補然後令對方回心轉意，亦解釋到點解你地各自之後都會咁努力想追返對方。仲要你地兩個其實都係好勝嘅人…」

「可惜原來人個心只要變左，要返轉頭係咁困難… 衣家嘅我，或多或少都理解到當日Grace嘅感受…」

我之所以咁講，係因為我感受到衣個時空嘅我雖然係感動，但同時間我亦感受到一種無形嘅壓力，因為佢對我越好我就越內疚，亦覺得我比唔返對等嘅感情同愛佢，因為我個心真係多左另一個人。慢慢地，我甚至開始有d唔敢再見Grace或者睇佢d message。相反Cindy比我嘅壓力就少好多，雖然每次同佢出完街我對Grace都會有種內疚感。


「咁就好，衣個平時時空最想比你睇嘅野已經完成，我地可以去下一個時空喇。」貓仙人突然講。

「下? 咁就完? 咁衣個平行時空下嘅我最後係點?」未知結果我唔想走住。

「衣度只係其中一個改變啫，之後你每一個決定其實都可以再衍生唔同嘅平行時空。例如係衣度你決定揀Cindy定係Grace都已經係完全唔同嘅故事軸。我無可能同你睇晒咁多條支線架， 你要記住貓仙人嘅時間係好寶貴!」貓仙人解釋。

「但我好想知衣個時空下嘅我之後過得好唔好呀… 至少應該都好過衣家嘅我?」我哀求道。

「怕左你… 見係第一次，就送一個之後嘅後續比你啦。你想係衣度揀同Grace繼續一齊定係同Cindy一齊?」好彩貓仙人見我個樣咁慘都肯可憐我。

我好認真咁諗左一陣。雖然好想知我同Cindy一齊後個世界會係點，但Grace始終係我咁多年以黎一直嘅心結，衣個機會亦係我曾經苦苦追求過好多年，所以我更想知道如果我地真係可以有多次機會，我地最後嘅結局會唔會改變。

「我想睇下繼續同Grace一齊嘅結果…」所以我下左衣個決定。

「好。」貓仙人好似一早估到我會咁揀咁。

Live

唔好淨係得個好字⋯

後續好快黎啦~