《試當真Trial & Error》YouTube頻道上年8月宣布為咗「杜絕黃牛」，將現場版門票用減價拍賣方式（或稱荷蘭式拍賣）出售，由開售當天每張一萬元逐日減價至十蚊出售！當時破格賣飛形式成功引起話題，門票亦都好快高價沽清。好多網民當時笑言呢個係經濟學嘅成功例子，估唔到真係喺今年經濟科考到！
根據網友Frankie Lam貼出嘅試卷相片顯示，喺今日（3號）經濟科選擇題嘅第10題，就提到「試當真賣飛」一事，「在2021年，一個香港的Youtube頻道「試當真Trial & Error」舉行首個現場表演。以下是門票價格的安排。上述個案說明了價格的_________作用，因為_________。」
試卷提供四個選擇，分別為：
A.「分配……更多資源可以分配到該表演的製作」；
B.「分配……這安排可以確保門票沽清」；
C.「配給……這些門票售予最高價值的賣家」；
D.「配給……這些門票是以先到先得準則分成」。
根據經濟科課本，價格係有「分配」同「配給」兩種功能。「配給功能」係指將現存供應分配予願意付最高價值嘅用家；「分配功能」就係指「從邊際利益得出需求，從邊際成本得出供應，兩者的相互作用決定價格及資源配置」，「相對價格的轉變與資源調配」。多數留言網民都認為，答案就係C！你又點睇呢？
source: https://gongjyuhok.hk/articles/11059
#DSEECON #經濟學 #經濟科 #試當真 #文憑試 #公開考試 #廣東話 #港語學
