葉開葉開
2022-04-18 17:28:18
三百五十九
我既足球生涯響今季黎講係有喜有悲既。
喜既當然係我為香港拎左東亞少盃拎左個金牌兼拎到賽事神射手;悲既係我地響青年聯賽次循環最後關頭輸波,最後只係得聯賽亞軍。
暑假既時候,由於今年港青都冇乜比賽(因為我地入唔到亞少盃決賽周),我以為自己已經完成今個球季,直至暑假果日我接到陳sir既一個電話。
「喂?熙仔?」電話入面傳黎一把熟悉既聲音:「我係陳sir啊。」
我知吖,我有來電顯示架嘛。
我心入面有啲奇怪,陳Sir你把聲我響球場就聽得多,電話入面真係少聽。
「係。請問有咩事搵我?」作為我其中一個既足球啟蒙老師(另外既啟蒙老師係文叔佢地),我對佢好有禮貌。
「唔...或者我開門見山問你喇。」陳sir諗左一諗,再道:「你想唔想去日本踢波?」
*
根據陳sir所講,有間唔知叫乜鳩鑽既日本球會派左個姓加乜撚野既球探去考察日本青年軍既表現,諗住從中去挖角一啲出色既日本仔去佢地既球會,但經過香港隊響亞少盃外圍賽同東亞少盃決賽周兩次對陣日本隊之後,呢個加乜球探反而對我地部份球員既表現印象深刻。
不過阿球探先生需要啲時間去說服球會高層點解要搵個外國人(仲要係香港人)加盟,所以都花左小小時間先至同流○正式接觸,而且高層只係准佢搵一個球員。
日本人都幾排外喎。
雖然我只係青年軍,唔係有合約在身,但日本呢間球會禮數上都做到幾足,向流○打足招呼之餘再叫佢地聯絡我。
陳sir話其實佢地呢次黎唔係正式要求我轉會住,而係要我趁暑假去日本試訓,再由佢地球會青年軍既教練睇下我究竟係咪合適佢地既球會。
*
「唔駛諗,梗係去喇球星!」同日同阿必響屋邨球場入面踢波我同佢講起,佢就答我:「日本喎!有機會外流喎!我都想呀!」
我諗如果有多過一個位既話,阿必都可能有份一齊去試訓。
「嗱嗱嗱。」阿必見見我唔出聲(其實我只係諗緊野),又補充多句:「我唔係話我想搶你個位去呀,但呢啲機會真係千載難逢,唔去點對得住自己呀?」
「比我諗下先……」我唔想離開香港、離開秋兒姐姐喎……
「仲諗,你想踢職業波就應該去日職開始!」阿必力勸:「人地職業足球發展得咁好,你響日本踢波一定好過響香港先喇!」
「咁人地都唔一定揀我既啫……」我總係想搵個原因推左佢。
「我對你有信心喎!」阿必笑道:「你上年射撚死班日本仔喇!」
呢個時候文叔都走埋過黎,道:「你兩條豆釘響度搞乜春搞到有波都唔過黎踢呀?」
「浦和○鑽青年軍邀請球星去日本試訓呀!」阿必興高采烈地道,仲興奮過我。
「嘩,咁撚癲?」文叔笑住咁望實我:「幾時起行呀?」
「下…我都未決定去唔去…」我答道。
「哦?必仔果次話你諗住同佢一齊踢職業波喎,咁好既機會都唔去?」文叔奇道。
「試訓啫,又唔係即刻簽我……」我又響度搵藉口了。
「你條撚樣唔似咁冇自信喎。」文叔笑道:「你想唔想去先?咁好機會。」
其實……
你問我心底入面想唔想去?
想架。
入左流○青年軍之後,我就一直渴望同更加高水平既對手比賽。
同日本青年軍踢過兩次,我好清楚日本其實係一個我好值得去比賽既地方。
但…
點解我仲猶豫?
一來我未同老豆提過我想踢職業足球,我唔知佢會唔會反對。
但更重要既,係我唔響度既時候,我唔知Jonathan會對秋兒姐姐做啲乜。
我想留響度保護佢。
「因為錢?」文叔見我冇出聲,於是再追問:「機票酒店食宿?」
「唔係。」我搖頭道:「今次係佢地邀請我去,所以一切洗費佢地比晒。」
文叔望住我半响,再拍拍我膊頭,道:「我明白要你咁細個一條友走去他鄉學踢波,係有好多因素要考慮。而家就睇你係咪真係認真想以足球為職業喇,如果係既,你排除萬難都好,都唔會想走甩呢個機會既。成功既,去到咪咬緊牙關咁捱過佢囉,到時你係香港日職第一人架喇。」
「日職第一人喎球星!」阿必加把口。
「……」我冇理阿必,認真諗緊文叔既說話。
「再講,你自己夠話試完人地都未必簽你喇。」文叔笑道:「你咪試下囉,冇壞架。」
(待續)