葉開葉開
2022-04-20 13:05:02
三百六十
我返到屋企一路煮飯一路思考文叔既說話。
呢次去日本既試訓只係一個星期,如果唔得既話其實我都只係離開秋兒姐姐七日啫。
就響我煮緊飯既時候,我聽到秋兒姐姐屋企有開鐵閘既聲音(我淨係鎖左鐵閘,但冇關晒門),應該係秋兒姐姐去完Jonathan屋企既讀書會返黎。
唉,放左暑假之後,秋兒姐姐去讀書會既次數好似仲密左,所以你話我點放心去日本試腳?
不過唯一令我稍為安心既係,秋兒姐姐從來未試過響Jonathan屋企食晚飯,而係會好似而家咁,響食飯時間返黎。而我就會開住門煮飯,通常等我聽到秋兒姐姐返黎既時候,我都差唔多煮好晒,然後我就會出去同佢打聲招呼話就黎食得飯。
今日都唔例外。
「秋兒姐姐~就黎煮好架喇,妳去洗個手換件衫就食得,到時我去拎啲飯餸過黎吖?」我出去隔住道閘同秋兒姐姐打招呼。
「好啊。」秋兒姐姐微笑地道。
「......」
「唔?」秋兒姐姐見我望住佢但又唔出聲,於是開口問:「熙熙?」
「啊,係,冇事,我去繼續煮飯先。」其實我係諗緊應唔應該同秋兒姐姐講試腳件事好。
都係唔講住。
萬一佢完全冇留戀冇唔捨得咁叫我去試下咁點算?
「好快有得食架喇。」我轉身走入廚房。
專心煮飯先。
*
「秋兒姐姐……」我響度督自己碗飯。
「唔?」秋兒姐姐抬起頭微笑地望住我。
「……」我又督左幾下自己碗飯:「都係冇野喇。」
「嗯,熙熙如果你有心事又想同我傾既就隨便開聲喇。」秋兒姐姐面上依舊掛住溫柔既微笑。
唔?
我個樣咁易比秋兒姐姐睇穿既咩?
不過秋兒姐姐同往常一樣,唔會逼我講,而係等我想講先至講。
……
……
……
其實我猶豫緊啲咩?
真係驚秋兒姐姐冇唔捨得?
其實諗落都知應該唔會喇。
唔。
信唔過秋兒姐姐咩。
於是我下定決心講出黎:「日本有間球會想我過去試訓。」
「試訓?」秋兒姐姐臉上一片疑惑,睇黎並唔知試訓係咩意思。
「即係佢地包機票食宿叫我去日本試下同佢地啲球員一齊操練,如果我表現好既話佢地就會簽我。」我R一R頭,續道:「應該係咁,陳sir係咁講。」
「嘩熙熙咁犀利!」秋兒姐姐吃驚地道:「幾時出發?」
我直直咁望住秋兒姐姐雙眼,之後先說道:「我仲未決定去唔去呀?」
「嗯...你就係煩緊呢樣野?」秋兒姐姐睇穿左我:「唔...因為唔知點開口同叔叔講?」不過佢就估唔到我煩惱既根源。
老豆當然係其中一個原因,但係...
真正既原因係因為妳呀...
「嗯...」不過小學雞既我,係唔夠膽承認呢樣野...
「唔緊要架,我一陣同你一齊講咪得囉。」秋兒姐姐柔聲道。
...
秋兒姐姐係咁叫我去,好似一啲唔捨得都冇咁既...?
「嗯...」
「熙熙,我覺得唔駛咁擔心既。」秋兒姐姐見我個樣仲係悶悶不樂,於是安慰我:「叔叔唔係唔講道理既,況且佢一講到你踢香港隊果陣總係好開心,可能佢都贊成你踢職業足球呢?」
「嗯...」
...
...
...
秋兒姐姐完全搞錯左我煩惱既原因。
於是之後餐飯我都係繼續悶悶不樂,秋兒姐姐間中都係安慰幾句。
...
然後...我終於忍唔住開口問:「秋兒姐姐...如果我試腳成功既話,我就會長期響日本架喇喎...妳唔會唔捨得我架?」
秋兒姐姐微一愕然,然後用一種理所當然既語氣微笑道:「梗係唔捨得喇,點解咁問?」
「咁點解...妳好似係咁叫我走咁既?」我終於問左出黎。
其實搞左咁耐,最後都要問,咁點解唔一早問?
不過愛情就係咁架喇,對住自己鍾意既對象就係咁,我都唔例外。
對住其他女仔我都唔會緊張,唯獨係秋兒姐姐例外。
尤其是我好多時根本連諗都唔敢諗會同秋兒姐姐響男女關係上有任何發展...
係最近大表姐提醒左我...
唉。
反而係秋兒姐姐聽到啞然失笑道:「唔通...你就係為左咁而煩惱?唔係因為叔叔?」
(待續)