陪咗我屋企16年嘅狗狗今朝走咗

係我由讀一年級開學無耐係屋企出世，陪到我今年22歲已經足足16年。

由細細隻百厭活潑養到而家聽教聽話，由瘦擘擘養到好似隻豬仔咁。

呢16年嚟都好乖，縱使平時好少帶佢出街，每次一拎起條狗帶就會進入一個抗奮嘅狀態，但係佢永遠唔會失控，只要我哋行得遠少少就會急急腳就跟返上哂嚟。仲記得細過有一次去船河，每隻狗仔上到岸都會埋堆一齊玩，唯獨係得佢見到我嫲嫲一個人走到旁邊嘅石灘上行就跑過去跟住我嫲嫲寸步不離。

咁多年嚟我都已經習慣咗有佢嘅存在，每次返到屋企佢總係第一個出嚟迎接我，不論時間幾晚都好。我每朝早瞓醒嘅第一件事就係出廳搵佢，會鬧下佢，佢亦好似識聽識回應返我咁發出一啲聲音，而我每次都會笑住咁問佢係咪講粗口鬧我。

每次嫲嫲去咗打麻雀你都會坐係我房門口等嫲嫲返嚟，每次嫲嫲坐係梳化睇電視睇到幾點，佢都會坐係旁邊等嫲嫲熄電視先跟坐入房，縱使幾佢幾攰，坐係到釣晒魚都好，就連嫲嫲有時半夜扎醒出廳坐係到睇電視，只要比佢知道都會即刻跟埋出廳。佢就係咁乖咁冤氣

最近呢兩年見佢胃口真係差咗唔少，但都只係覺得佢佬咗唔夠牙先會係咁，見到佢開始瘦，我哋開始幫佢將啲狗糧揼碎啲，同埋剪碎佢最鍾意食嘅雞胸撈埋一齊比佢食，直至到最近兩個月開始連狗糧都唔食，我就講笑咁話佢係咪到咁老先嚟學人減肥。雖然係咁講，但望到佢咁瘦落去個心真係好痛。

我成日都會問佢：「肥妹，你估你有幾多歲命？」
「你起碼有18歲命啦，係無牙食嘢難啲啫，你個樣都精神咁精靈，仲識得講粗口鬧我，我個仔未出世你都唔準走呀知唔知道。」但我真係估唔到會嚟得咁突然

早兩日嫲嫲話你突然之間會瞓係到抽筋，打關斗，我都係呃自己同自己講抽筋好小事啫，但其實自己心中有數，我話要帶佢睇醫生，我幾個姑姐姑媽都話狗老咗係咁，應該差唔多，唔好嘥呢啲錢，比多啲時間陪佢仲好。但試問我又點忍心睇住佢不明不白咁由得佢痛苦。

接住嚟幾日我都更加關注佢情況，發現佢抖氣比平時更加用力好似有嘢頂住咁，但起碼仲趴到喺度瞓覺，直接到琴日開始連趴係到瞓都做唔到，由11點鐘開始坐係嫲嫲房門口一路坐一路抖大氣，我實咗唔忍心望坐佢咁辛苦，我唯有抱佢嚟我房到陪佢傾偈，幫佢按摩，直至到四點幾嗰陣佢突然企咗起身，然後打橫瞓咗係到抽筋，仲失禁，嗰刻我真係好驚，猛咁叫佢起身，唔好嚇我，過咗幾秒之後佢亦都即刻起返身。我即刻換衫拎狗帶同佢去去睇醫生，佢知道去街一如既往咁興奮。嗰陣我仲覺得佢仲有咁嘅精神應該唔會有大問題，但原來一切都係我嘅奢想。

去到醫院做完晒所有檢查，醫生同我講報告嗰陣話佢嘅情況已經唔樂觀，因為佢個心臟漲大，而導致個肺都有事，成個肺幾乎都係積水，換句話講其實佢個肺功能得返唔夠幾成，佢就算係氧氣箱嘅血氧含量都唔達標準係一件好嚴重嘅事，醫生話接下嚟得兩條路可以揀。
一，係入醫院大攪，但其實以佢嘅年紀做呢樣嘢風險其實好大，其實費用唔平，同埋最主要過程佢一樣會痛苦。二，就係比佢安安樂樂咁走。當時我聽到呢到已經崩潰咁大喊，我話同比佢見多嫲嫲一面，可唔可以換返屋企先，醫生話無問題，但唔建議咁做，因為佢嘅情況真係好差，話我哋係屋企見到嘅情況其實係因為佢個心揼唔到血而暈低，佢隨時都會因為咁而走，而且佢咁樣走會仲辛苦。所以希望佢可以舒舒服服。

最後我打咗電話比嫲嫲，叫咗佢過嚟比肥妹見埋最後我哋最後一面，醫生比咗間房我哋陪佢傾偈同埋送佢最後一程，嗰陣我淨係可以攬住同佢講：
「你好乖，你16年嚟都好乖，我哋唔係唔要你，係唔想你咁辛苦，知道你瞓唔到覺，而家想幫你安安樂樂咁瞓一覺，以後唔洗等嫲嫲打牌打到咁夜先有得瞓，唔洗再比我鬧你，要識得路返屋企，下一世投胎唔好做狗，要搵住好人家，如果你想返嚟都得㗎，第時你見到姐姐胎BB你記得捐入去，我會知道係你㗎，對唔住，每次帶你出街都會帶你返屋企，但今次唔記，你要記住我哋唔係唔要你呀知唔知道，肥妹真係好乖，你要記得返屋企，我愛你」

到最後醫生同佢打針嗰陣我真係唔忍心睇，我走咗出去，而過程完咗我嫲嫲同返我講話佢走得好舒服，個樣都好開心。

返到屋企完全係無辦法習慣無咗佢，以後唔會再有佢出嚟應門，唔會再有佢嘅吠聲，瞓醒唔會再有佢比我鬧比我攬…..

Sorry for 1999

too long didn't...skip

食左佢
等佢同你融為一體
個心都好過d

rip

auntie 隻狗狗都啱啱走咗，15 歲

佢地彩虹橋到可以相遇了

r.i.p

take care
你已經盡左力
佢亦健康快樂過左佢一生
多謝你 同你屋企人
因為你地都係好主人
希望呢種傷痛慢慢能夠成為你地幫助其他貓狗既動力
好多貓狗都需要家庭
我知道唔一樣永遠唔可能代替
但盡力就好

RIP

Take care
佢同其他狗仔喺彩虹橋會玩得好開心🌈

Rip 睇到好sad

RIP

又一疫苗副作用 橙

加油啊，我自己都有養狗今年先得3歲，但我有陣時睇到你哋po出嚟嘅文，我都會喺度諗，如果佢走咗點算呢？真係唔敢想像。
但你要比心機move on啊，我諗佢都想見到一個開心嘅你，你成日唔開心，佢一定會好擔心㗎！

我以前果隻十歲走 又係好傷心

養寵物必經之路, 睇開d, 佢跟左個好主人16年都好好福氣, 出面好多狗都無咁好彩

你應該為自己照顧到佢最好而感到高興

早幾個月屋企狗狗15歲走咗
嗰幾日返到公司喊到收唔到聲
你個故同我8成似 睇完又諗返起
火化嗰日都係會好心痛
祝佢地一路好走....

圖？？

加油呀我狗狗都係上年年中走左 當時佢12歲 同你狗狗一樣 都係心臟漲大肺積水 佢係係我面前走架 亦都算不幸中之大幸 我當時係佢身邊

你狗狗臨走前可以見到哂你地 佢都好放心上彩虹橋🌈雖然日子真係好難捱 我到家陣睇親佢啲相都會喊 仲好唔捨得佢 但慢慢傷心會變少 留低落黎既係咁耐以黎同佢相處既快樂

樓豬take care想喊就喊哂出黎 俾自己抒發哂啲情緒出黎 唔駛擔心狗狗 佢好快樂咁係天上面生活緊 佢會一直睇住你架

佢會好感謝你，佢依一生過得好開心，有處好人家
有時唔好話自己養，見到鄰居有隻狗，幾年前仲係好生猛，見主人跑嚟跑去。近一年已經唔行得，冇聽過佢吠，見親佢都只係趴喺度，自己個心都有啲哽著哽著

分享我個故仔
我之前隻狗都係心臟病, 發現果陣已經係末期, 有肺積水, 訓左幾日氧氣箱好番小小, 當時醫生都問我, 吊命定係打針, 我問佢有幾耐, 佢話落重藥可以有2個月, 我就好自私咁決定燒銀紙吊命, 要佢陪我
一日食3次藥, 每次有6-7粒, 食左幾個月佢都重係好正常咁生活, 係有後期變左腹水, 會頂住佢個肚訓唔到覺, 由兩星期番去驗血, 抽腹水, 變到10日抽一次, 7日, 5日.... 抽極都追唔到佢腹水既進度, 如是者我照顧左佢1年幾佢先走, 我燒晒自己所有積蓄, 燒左十幾廿萬... 醫生就話係奇蹟, 係度多謝麥花臣陳醫生, 一直以黎咁照顧我隻狗, 去到後期我開始冇錢講笑咁問佢抽腹水有冇套票可以收平D, 佢二話不說打折比我
好記得佢走之前果晚, 佢無啦啦陪我睇波(凌晨點幾兩點, 佢平時好早訓), 睇足成場都係我大脾上面, 死頂唔肯訓... 之後睇完我抱佢上床訓覺, 起身就發現佢凍晒...
佢走左咁耐, 我去到而加都重好自責, 點解我咁自私格硬要佢陪我, 佢每次抽腹水, 得抽完幾日左右係正常, 之後就扒唔到係度訓, 去抽前一日甚至打側訓都辛苦, 坐係度釣魚...

佢會聽到的

節哀順變
我都驚我衰妹有日走左

生離死別

16歲都唔易 有過回憶就足夠
嫲嫲都唔易受 扮下平靜咁解
趁有機會去攬多啲嫲嫲互相取暖
珍惜眼前人