【公子會】《病港ＩＩ》（４６）

「怕你哋餓親，就食個開胃前菜先。」簡單噓寒問暖後，艾匡舉手示意第一道菜上檯。

星宇收到指示後，馬上到廚房拿出開胃菜色。

期間，穿白襪子的貴華持持續續向側伸出半個身子，遠眺彼端的父母和女皇，想要讓他們注意到自己。

「請注意腳。」星宇捧著精緻的料理，給每個人來一份：「開胃涼盤，瓜梨果蝦……用上西瓜、鳳梨、奇異果同凍蝦，串成一排。」

碟子上三款水果被切成圓形一小塊，果肉分別黃、紅、綠的疊成一排，最上層放凍蝦，最後以竹籤貫穿固定好，極富層次感。

「請慢用。」星宇躬身、退場。

貴華拿起竹籤，直接一口吃掉。

「嗯……雖然唔飽肚，但酸酸甜甜，都幾過癮。」貴華閉著眼睛，心裡評價。

「各位，可以享用。」女皇此時才宣佈。

貴華猛地張開眼睛：「噫……」他忘記了要等待女皇開始進食，他才可以跟著進食，但沒所謂了，現在都沒有人留意他。

簡單一口吃過後，星宇前來收起碟子，艾匡繼續跟兩人交談。

「喺病港生活咗咁耐，對兩位嚟講，有咩係最重要？」

「女皇，好多人以為我哋在意金錢，其實並唔係。」貴德瞧了自己兒子一眼，說出自己所重視的：「其實，我哋最重視都係個仔，我哋單純怕佢會俾太多人呃，佢心性太善良。」

林夫人補充：「而且我哋一直望貴華佢會有一番作為，所以收到女皇你來信，話嚟緊會揀選國會嘅議長……我哋都好關心。」

「放心，其實我覺得你哋個仔好合適。」艾匡欣然一笑，但稍為猶豫：「但係……都有其他潛在嘅候選人。」

艾匡沒有跟到劇本，直接說出以羊皮紙交換職位，而是想獲得更多。

「係？」兩夫妻深入聆聽。

「有一個貴族，名我唔方便講，但佢幫手出錢修繕咗成個皇室花園。」艾匡雙手托住下巴，空說假話：「另一個貴族都好好心，送咗幾十箱水果俾皇室，所以我決定咗，就算佢哋做唔到議長，都會俾上議院議員職位佢哋……」

兩夫妻對視一眼，當下聽出女皇的意思，但似乎不想付出金錢去捐贈皇室，而提出一些垃圾計劃。

「其實我哋都諗緊個商業區減免租金計劃，皇室人員可以有八折……女皇本人嘅話更加可以一蚊形式租用。」說到錢，貴德不知廉恥地說。

「減免租金唔關皇室事，我哋唔會落民間開舖頭。」艾匡微笑。

「或者可以大搞一個皇室拍賣會？」林夫人建議。

艾匡假笑一聲：「哈，皇室都無嘢需要拍賣。」

艾匡彈響手指，示意星宇送下一道菜來。

要掘出守財奴的口袋，果然毫不容易。

下一道菜是四季蔬菜湯，星宇送來的空檔間，兩夫妻都搜索枯腸，苦思怎樣付出最少，卻能獲得最大回報，最重要是不會影響自己的現金流。

「用上時令新鮮蔬菜做嘅濃湯。」星宇簡單介紹。

艾匡細嚐一口菜湯：「味道令我好懷念住喺皇宮嘅日子。」

貴德點點頭：「嗯，係皇室傳統嘅菜湯，真係好好味。」

「如果有人願意出錢重建皇宮，我一定會緊記佢愛國嘅情操，擔任國會議長嘅人……忠誠艾寶琳係首要嘅特質。」艾匡已放下條件。

貴德謹慎細思：「嗯，女皇都講得有道理，議長的確需要由一個愛國者擔任，我個仔貴華正好有依種特質。」

「我無偏袒，但無論基層百姓，但係上流社會，佢都好得人歡心。」林夫人對兒子自然稱讚有加。

「愛唔愛國……」艾匡微微抬頭，欲言又止：「我習慣對方用行動去證明。」

貴德和林夫人兩夫婦一陣沉默，視線轉望那位喝菜湯都會熱到自己舌頭的兒子。

其實兩老很清楚，全倖存區的人都因為錢財，經常欺騙、巴結、依附他，民間中更有「水中魚」稱號，二十多歲還是一事無成，想著要創一番事業出來。

但所謂創業難，守業更難。

不想讓辛苦賺來的半個艾寶琳敗在兒子手上，只好安插一些職位予他，但上等的工作兒子毫無真實才幹，考不上一官半職，下等的工作又被他厭棄。

因此，國會議長一職對貴家而言，真的十分重要。

為了家業不被敗光，也為了望子成龍，國會議長一職兩夫妻志在必得，於是決定豁出去了。

「女皇，我就坦白咁講……我真係好鐘意艾寶琳。」貴德放下湯匙，滿臉堆笑：「我好願意用行動證明我愛國嘅行為。」

「我絕對支持認同我老公。」林夫人兩手緊握。

「皇宮嘅重建費用，就交俾我哋。」貴德自然有計算過，如果兒子真能把職權運用自如，大約五年內可以回本了。

此外，能夠跟女皇確立信任關係，這些都是無法計算的數字，都是值得的。

「咁就好。」艾匡抿嘴一笑，示意星宇送下道菜。

下一道菜，是主菜了，以一個大碟子裝著。

餐蓋一開那煙燻的香味立即湧出，是烤雞全隻！

烤雞的氣味，讓老遠的貴華都吞吞口水。

「兩隻雞腿，分俾貴德先生同林夫人。」艾匡指示。

「係。」負責給烤雞斬件的星宇，給兩人切了雞隻最好部位。

兩人雖為貴族，但肉類好一段時間停了供應，加上平時不怎麼願意花錢在吃方面，所以嫩滑的雞腿一擺上碟子前，貴德就忍不住要大咬一口。

「啊，任命國會議長之前，我仲有件事煩惱。」貴德咬下肉汁豐富的雞腿前，艾匡忘了有件事要說。

「唔？」貴德兩隻眼移向女皇。

「羊皮紙，依個先係重點。」

「呃……」貴德嚇得鬆掉口中的雞腿。

艾匡臉孔湊前，盯著貴德：「你會交出嚟嫁可？」

也不需裝傻，貴德當下的表情反映出一切。

貴德不得不答應：「會，當然會，畢竟呢啲都係愛國嘅表現。」

「慢慢食。」艾匡讓他繼續吃雞腿。

貴華等了好一會，都未分到雞肉。

待女皇和父母分食過後，只剩下一個雞頭給貴華他。

主菜都吃完後，只餘下甜品──蘋果批。

之後談的，都是比較輕鬆的事情。

總括來說，艾匡賺到張羊皮紙，貴家賺到國會議長一職。

雙方額外收益都各有不同，艾匡得到皇宮的重建費用，貴家則得到女皇的信任。

是一場傳統的上流宴席，大家各有得益。

已補昨日文

love mat b

艾匡越黎越似反派 分分鐘仲衰過艾康
對付影子精英要以毒攻毒

不如唔好叫艾匡 改名叫做艾倫算啦

松木村係唔係立左flag？

水中魚

咁就變反派
聰明返d啫

有文祝福

艾主席

頂會爛尾

其實我覺得幾好睇
因為身份嘅轉變帶來嘅責任 點樣改變一個人
舊嘅價值觀同新嘅責任互相衝突
但始終要做落去嘅掙扎

我雖然唔太鐘意艾匡依家呢條線，但係的確好似你講咁，艾匡做左女王之後要顧慮嘅嘢多左好多，開始明點解要做一啲同自己諗嘅嘢相反，但係一定要做嘅事。不過艾匡唔聽清楚黃伯講嘢就殺左佢真係搞唔掂

艾匡識玩 俾貴華做議長
兩三下就可以跟返自己劇本

艾匡討厭係因為佢嘅轉變好寫實，唔似雲梨 M 滿天嗰啲英雄為理念為人民犧牲咁崇高。但現實中其實艾匡呢類人先係常見 ，一開始單純為理念出發，以推翻暴君之名起義。 到坐上皇位先發覺治國唔簡單，而一直以來嘅心腹原來另有圖謀，嗰種孤立無援嘅恐懼情緒令佢不斷做錯決定。每每係鑄成大錯先識得後悔，同埋佢自己其實都唔知自己想點，好多野都係人哋叫佢去做。感覺佢性格係偏情緒主導，而佢係好需要人幫佢理性分析，如果唔係就成日吳卓羲咁做衝動撚。

吳卓羲

果個位唔知點講好，首先艾匡問果句： 「如果女王依加喺你面前你會點做」已經好傻仔啦，正常人估到d嘢，所以黃伯係好大機會會郁佢。 果個位見到人地拎住刀行去自己後面真心會驚，人地劈你嘅機會應該大於同你傾計，所以艾匡殺人都可以算正常嘅。但係問題就係佢殺人果陣又咁正常，點解之前又問得出果句傻仔嘢

每日一推

推下