【足球界米高‧佐敦】
NBA專家Leigh Ellis讚譽沙拿媲美米高‧佐敦。
「睇沙拿踢波,就好似睇米高‧佐敦打波一樣,親身欣賞米高‧佐敦打籃球並唔係人人都有機會,但呢件事係永遠記得及珍而重之。對我黎講沙拿就係︰嘩!」
「現場睇沙拿喺場上,佢的確有少少似美斯,並唔係高大威猛嘅球員,但當佢一拎到波,總會希望會發生一啲魔術一般嘅事。」
「去晏菲路球場睇波(利記主場對阿仙奴)前,我有留意埃及嘅比賽,我心諗唔該唔好傷呀,我知道入場係睇利記比賽而唔係集中欣賞沙拿,但既然一場去到,當然想睇到佢落場。」
「佢嘅入球係整體合作而出現,並唔似好似對曼城或屈福特咁憑佢一己之力破關,當時我就諗唔該出一次超必,等我一世都會記住呢一個情景,最終係祖達入咗一球靚波玩謝對手後衛及門將。」
「米高‧佐敦或者退咗休好耐,如果要用一個現役球員去形容,或者係史堤芬‧居里(Steph Curry),居里未必好似勒邦‧占士咁有強健體格,但佢絕對係一個球場魔術師,無人能阻。實在跑得太快,而且聰明,加上總有方法隨時使出新魔法去擊敗對手。呢啲都係沙拿及居里嘅共通點。當你以為佢地已經表現得最好、最屈機時,佢地又會有新招數令人喜出望外。」
「美國及英國運動嘅最大分別係喺美國好多時球迷都係開波後先慢慢入場,入到場又可能會不停用電話;但黎利市睇波,開波前十至十五分鐘球迷已經入晒場準備好欣賞比賽,載歌載舞。球迷就係令球賽氣氛提升,每一場比賽對大家都係充滿意思,並唔係只係星期六無所事事不如入場打發時間咁!足球對英國人就係一切。」
「當球隊贏波,以紐約人為例,麥迪遜公園會係一個妙不可言嘅地方。紐約人今季打咗十幾場波,充份感受到球迷嘅熱情,每一個投籃都係重要嘅投籃,每一球都好似致勝入球嘅喜悅。當紐約人贏波,麥迪遜公園可能係全世界最好嘅睇波地方。」
「(高普與阿迪達發生口角)呢啲情況喺籃球場都會發生,呢啲細節可能足以影響到一場比賽嘅勝負。有時候主場球迷會受到場上嘅事感染而變得更落力打氣。」
「籃球術語係技術犯規,等同足球場上嘅黃牌,累積兩次技術犯規就會被罰離場,有啲時候教練或其他球員會嘗試做一啲動作去令場內火花提升,將氣氛推向高峰,往往都有成效。」
「我最喜歡嘅係發生口角後,高普向主場球迷示意炒起個氣氛,當時利記仲未入波,結果唔使好耐就取得入球。」
「整個體驗係我夢寐以求,天色好黑,天氣好凍又大霧,但我認為呢個係十一月黎到利市睇波嘅最好天氣。」
「去加勒比海會追求陽光與晴朗,但假如黎到英格蘭北部睇波,凍先最有感覺。」
https://theathletic.com/2993171/2021/12/03/it-is-like-seeing-michael-jordan-seeing-salah-and-liverpool-in-the-flesh-for-the-first-time/
#LFC #YNWA #WeAreAnfields12th #A12HKMO #A12OLSC #A12LFC
好想朝聖