Momay Momay Chan
今日,全城為理文集氣嘅日子,能否創造香港足球嘅歷史?
大家又有冇發現,理文及拿薩夫會徽,都係以龍型物體為主?拿薩夫,別稱就係龍隊,所以呢一場對決都係兩條龍嘅對決,雙龍大戰。
如果理文成功過咗呢一關,咁就會同巴林嘅慕哈瑞克或香港球迷應該熟悉嘅科威特競技爭奪冠軍。
拿薩夫陣中有幾名烏茲別克現役國腳,都係比較後生,其中最為後生,19歲嘅小將Khusayin Norchaev,係拿薩夫前線最危險嘅人物,喺亞協盃暫時排射手第一,入咗六球,其中有三球係上一仗對莫亨巴根時射入,而佢喺烏茲別克超級聯賽都入咗十球,加埋亞協盃及烏兹別克盃,今年為球隊射入20球,係非常危險嘅人物。
而同大部分有參加亞協盃嘅球隊唔同,拿薩夫只係註冊咗兩位外援,一位係中場Marko Stanojevic,另一位係前鋒Andrija Kaludjerovic,兩位都係來自塞爾維亞,前者近年同樣喺中亞地區揾食,踢過幾隊哈薩克球隊,後者外流經驗更為豐富,去過好多國家踢波,包括中國、泰國同印度,雖然二人年紀最大,不過唔好睇少佢哋嘅能力, Marko Stanojevic為前線提供咗唔少支援,Andrija Kaludjerovic雖然入球唔多,但都為Khusayin Norchaev提供掩護。
拿薩夫係一隊比較年輕嘅球隊,全隊只有兩位外援球員超過30歲,有18位球員係25歲以下,體能方面同埋活力係佢哋嘅殺手鐧,我相信有部分小將,之後會衝出烏茲別克,Khusayin Norchaev都因為喺今年表現省鏡,所以入選咗近排嘅烏茲別克大國腳,對住馬來西亞嘅比賽有一球進帳,究竟理文會為佢繼續刷入球數字,定係令佢唔可以再為拿薩夫增添紀錄呢?
今晚睇下咪知囉,大家唔使好似圖中右手邊嗰班撚樣咁樣,喺到嗌有冇link,如此大戰,到時到候自然會有得睇。