Momay Momay Chan
香港.真U23就快要踢U23亞洲盃外圍賽,重新抽籤之下,我哋就見到日本隊同埋柬埔寨隊,比賽會喺日本嘅J-VILLAGE進行,大家都公佈咗名單,柬埔寨方面,有十幾位係U21球員,不過有部分已經係入選過大國腳,全部都係喺柬埔寨聯賽踢波。
當中有幾位不足18歲嘅球員,較受矚目嘅係中前場球員Leng Nora,今年17歲,曾經喺之前嘅世界盃外圍賽對伊拉克出過場,雖然年紀輕輕,但佢嘅速度及技術,都係喺同齡球員入面比較出眾,今次係Leng Nora第一次入選U23國家隊。
Leng Nora喺金邊出世,身上有加納人血統,係柬埔寨足球界入面,第一位身上有非洲球員血統嘅球員,今季為Prey Veng上陣十幾次,有一個入球,除咗血統之外,佢嘅能力都好值得關注,只係前線仲有Sieng Chanthea呢啲比較多經驗嘅球員,佢未必會係國家隊必然正選。
Nora喺柬埔寨聯賽及世界盃外圍賽嘅表現,令我聯想到啱啱開始去香港搵食嘅安基斯,但身體方面,就同好多高棉球員一樣,比較瘦削。
今次香港隊,最大嘅目標,當然係出線,不過大家都知道日本隊係好難踢,而且仲係作客,所以對日本,都係希望香港隊盡自己能力,而柬埔寨,相信香港球員同埋球迷,都希望可以喺佢哋身上攞到三分。
呢一隊柬埔寨U23,冇咩公開比賽可以參考,但喺柬埔寨聯賽以及之前嘅世界盃外圍賽當中觀察,部分球員,技術唔錯,身體方面就爭啲,喺呢一方面香港就稍為佔優,其他就好難講。
其實柬埔寨,應該都係香港心態相同,希望喺香港身上盡量攞分,不過有一樣嘢,會係對柬埔寨球員有好大影響,就係天氣,雖然到時廣野町嘅天氣都未至於非常寒冷,但會同柬埔寨有一定温差。
柬埔寨部分地方,有時都會受到冷空氣影響,氣溫下降到20度或者以下,北部及東北部會比較“凍”,但呢一種天氣狀況暫時都仲未殺落柬埔寨。