脱毒只需4步
1.執返正自己外表
基本嘅剪指甲、剃鬚、洗頭應該唔會做唔到卦?
每日用洗面奶洗面,出街噴古龍水,有機會俾錢修下眉,唔駛好多錢同時間
髮型都好重要,研究下咩髮型啱自己,問下人意見
衣著就睇下啲model/明星點著,唔會夠佢哋型,但一定好過著頹T短褲波鞋出街,起碼洗走陣毒味先
2.上少啲連登(尤其感情台)
眾所周知,感情台不嬲係毒撚集中地。喺呢度,毒撚思想係主流
咩港女係雞、矮仔/窮L/樣衰溝唔到女等等
睇得多個人會充滿負能量,甘於接受自己失敗,放棄自己,個人更加冇自信
冇身高/冇家底/冇樣係會有劣勢,但未至於令你溝唔到女。
自己諗下街上面有女嘅男人係咪個個米八以上、住豪宅、金城武樣。
3.學習同人溝通
毒撚現實通常怕醜。現實唔敢同異性傾嘅話,試下網上識人,練下對答,起碼會了解異性心理,知道點講嘢可以延續話題 /會俾人感覺好啲
初頭會柒,但人哋唔識你,唔駛怕柒,呢個唔啱傾可以搵第二個。你嘅social skills慢慢會有所進步
現實唔好群咁多毒撚fd,只會令你更加毒
試下搵機會多啲撩人傾計,搭lift同鄰居吹兩句,行路見到唔趕時間嘅熟人都傾下計
慢慢你個人會有自信咗,更加敢於表達自己
或者join下興趣班/大學soc/住hall,識多啲人,擴闊社交圈子,唔係壞事
4.接觸多啲嘢
多數人都對吃喝玩樂有興趣,了解下有咩好西食、最近有咩戲睇,或者留意下hit嘅歌手/組合,咁樣同人吹水嗰陣起碼有嘢講
另外要學多啲嘢,運動又好,外語又好,投資又好,咩都好,經驗多咗、見識多咗話題就多咗,可以同多啲人搭嗲,份人冇咁悶。
去下旅行、睇書、睇有用嘅YouTuber都幫到手
做到呢四樣嘢,已經算係正常人,冇人會再當你毒撚