11年前喺舊登寫過一篇《我和鬼妹的親密關係》,早幾年得閒自己翻睇,覺得有好多地方真係寫得好幼稚,仲有中、後段有好多嘢都漏咗,再加上呢幾年有一啲意料之外嘅進展,一直都好想重新寫過。咁啱喺叻一個印度分享post度發覺原來仲有人記得,所以終於扚起心肝去將成件事去重寫。
礙於工作問題(而家份工無以前嗰份咁空閒),我唔可能好似11年前咁喺1星期內完咗成個故事佢。不過我承諾只要有人睇,我就一定唔會爛尾。而且成個故事嘅結局都會喺呢度 post出黎唔會開pateron要課金。
有個好少少嘅消息係我而家寫嘅每粒字都係用電話輸入法打嘅,起碼唔係11年前用手寫版,肯定會快好好好多。(真心覺得嗰陣自己真係好有耐性)
我會盡力keep住閒日一日出2-3篇(星期六、日就無喇),而家暫時有大約1星期貨仔。
(到時要減慢嘅話,我會出聲)
同11年前一樣,有問題、意見隨便提出,我答到一定答。不過唔好問圖啦,我唔會貼。
我今次會將之前寫過嘅部份全部重新寫過,但為咗之前睇過嘅人(好感謝你今次都支持我)唔會悶,今次會加返一堆上次skip咗嘅部份。內容方面,會保持甜度,但唔會太多。文中仲會有大量地點(尤其係食肆)、品牌等等,但真心並唔係宣傳,只係真係嗰陣去咗嗰度。
如果打算轉載、出書,請通知聲,唔好就咁拎咗去當自己嘢黎吸水。最後最後最後,真係多謝大家支持
事不宜遲,開波: