我下意識想後退,這才發現自己的背後就是locker,早已退無可退︰
「做、做乜事……」
阿堅站直身體,轉過身來踏前兩步︰
「……你想笑我咋卦?」
我不禁挺直︰
「痴、痴線,我笑你乜嘢呀?」
阿堅冷笑一聲,再踏前一步,雙眼在昏暗中寒光一閃︰
「你仲扮?你份人可唔可以唔好咁假呀?好啊,我都唔想再避。大家有啲咩想講,咪四四六六講清楚佢!你講先!今日嚟搵我,究竟想點?」
突然被阿堅說我虛偽,說我背後笑他,感覺如墜冰窖。
究竟他誤會了什麼?為什麼覺得我想嘲笑他?
我偷望他的神情,只見他態度既決絕又強硬。
他已經說到這份上,如果今天不把話說清楚,只怕日後都無法面對大家。
.
我深深吸了一口氣,儘量冷靜地說︰
「我……我只係……只係最近都見唔到華小姐上網,所以有啲擔心,想知道你哋咩情況。如果你唔想講,唔緊要,當係我太多事。」
沒想到他還是冷笑一聲︰
「點解你覺得我會知?」
「你點會唔知?雖然我唔知你哋最新情況點,但你們之前明明喺埋一齊……」
我的話還沒說完,阿堅突然急步走到我身前︰
「你唔好再扮嘢啦!我唔知!我唔知啊!你明知佢拒絕咗我架!你仲扮乜啫!」
我呆了幾秒︰
「佢……拒絕咗?但我明明……佢係同你拍完拖再分手咋?」
「冇呀!一開頭就拒絕啊!你開心啦!佢由頭到尾都無應承過我啊!你開心啦!佢唔中意我啊!你都係想聽到我咁講啫!我而家講晒畀你聽,咁你開心啦!」
我心中思潮起伏,忍不住反抓他的手臂︰
「點會……你……但係你嗰時明明話……明明話你成功咗?你、你嗰陣已經呃緊我?」
「係啊,我呃你啊!咁點啊?」
我從沒想過阿堅會對我說謊,只能瞪大眼睛,腦子裡空空的找不到言語︰
「你……你……點解……」
多少片段在我腦中如走馬燈重播,我熱血上湧,抓住他的肩膀大喊︰
「點解呀!點解你要呃我呀?如果你唔係咁講……如果唔係你呃我,我根本唔會同Suki復合!」
.
阿堅眼睛一紅,右肩後縮,一拳打在我臉上。我沒猜到他會突然攻擊我,一時站不穩,後退兩步跌坐在地上。
只見他走過來,掀著我衣領把我上半身拉起來︰
「你呢個人,究竟知唔知自己講緊咩啊?!你咁樣,你當Suki係咩?你又當子昕係咩啊?」
我一把推開他,扶著locker櫃站起來︰
「我係對Suki唔住……但我起碼冇呃過你呀!」
阿堅瞪大雙眼︰
「你無呃過我?真係好嘢!咁你都講得出!你應承咗幫我,但又靜靜地送份試卷畀子昕……咁算點呀?唔算呃,係咪應該叫暗算?」
「我……我份禮物,都唔係嗰個意思!」
「唔係嗰個意思可以係咩意思?唔遲唔早,喺正我表白之前送份禮物?你真係好虛偽啊!你根本係早有預謀!你係有心睇我笑話架!你唔好話畀我聽你無諗過,佢會見到你份試卷之後就會拒絕我啊?」
我說不出話來,只是站著喘過不停。
阿堅站在我一米之外,胸膛起伏著,狠狠地盯著我︰
「你知唔知,睇完你份卷之後佢點?佢喊啊!我一同佢講我點諗,叫佢畀次機會我,佢就即刻喊到收唔到聲!佢話都係佢錯!係佢處理得唔好,先令到我哋三個人咁。係佢做得衰,先會三個人都無得再開開心心咁做朋友……佢,佢覺得所有嘢都係自己錯……佢非常,非常之後悔……」
阿堅藏在陰影裡的臉,在斜光的映照下閃出一串光芒。
.
加入催稿大家庭
http://bit.ly/2o9xJHb