呢排好多帽post 我都係其中一個
自己由三月開始比舊公司炒 親人去世 女朋友都走埋 都仲企係到打呢篇野 想同咁多位戴左帽既巴打講聲加油 千奇唔好做傻事 講返正題先 有點長 希望你地會有心睇
交待小小背景先
同女朋友拍左五年幾,差唔多五年半 佢細我一年 大家都出左黎做野 我算係文員仔 佢係網誌編輯
我同佢都係由公開試一路拍拖拍到依加 一路都經歷左好多好多野 由一齊溫書 一齊出黎做野
事源係咁既 3月中同佢去左日本玩 差唔多玩左成星期有多先返香港 返到香港之後隔左一個星期約出黎食飯 食完車到佢返屋企樓下既時候 冇啦啦係部車到同我講分手 開初無為意 覺得可能都係工作壓力大 想自己有返私人空間
因為佢係做傳媒個行 類似編輯小編既工作 日日趕影片趕文趕稿 咁佢話冷靜下先 我都覺好,冇問題。點知隔左幾日有位好朋友8到料同我講佢係公司有第二個,仲要唔止上人地屋企一次。當時個心個腦白晒,成個人軟晒咁坐左係地下。冇眼淚 冇靈魂。
我唔夠膽相信一個五年黎陪我行過風雨既人會咁樣去對我。亦唔夠膽去諗。因為去日本仲正正常常我幫佢洗衫晾衫摺衫 買野仲比埋張卡佢碌 一切太突然 我冇即刻去踢爆佢 隔左3日之後我打電話比佢 同佢講 我知道晒所有野 佢仲要同我講佢無 不停咁講佢無佢無佢無
真係火都黎埋 到我講條仔住邊佢先肯認 (住黃大仙既狗公如果你睇到 我係話緊你 你自己仲要有女朋友 檢討下)同我講對唔住話欠我一世。當日踢爆佢佢就上左黎我屋企 攬住我係咁講對我唔住 我開初個人真係冇靈魂冇眼淚 到後尾我諗起好多好多回憶 都係當住佢面大喊左一場。成個人好似痴左線咁
就好似五年入面我地一齊領養兩隻貓貓 去好多地方旅行 好努力儲錢 為既只係我地既將來 什至我收工後儲返埋第二份pt 去搵多d 但換黎既係咩野?
之後四月大家拖拖拉拉 我係變左極度冇自信 亦都極度自卑 佢唔覆我一陣機 我就已經覺得佢去偷食。呢段時間好辛苦 瘦左好多 成星期冇食野 食完就嘔
到依加五月 我都已經慢慢咁放低佢 期間好多朋友都屌我 無數個晚上夜晚都會出黎陪我 每一晚都要飲四五罐啤酒先訓得舒服d 屋企人都好擔心自己 我自同自己講就當五年時間係學費 去認識咩係水性陽花 咩係女人
或者比多少少時間自己 諗通個一刻唔需要耐 可能只需一秒鐘 自己一個可以多左時間做自己野
咁多位巴打 共勉之