以為PHD係PIZZA HUT DELIVERY 嘅簡稱。
差唔多十年前,禮拜六屋企人想食PIZZA,咁啱嗰排收到PIZZA HUT DELIVERY啲宣傳單張有埋優惠券,咁我走去附近商場間PHD(間鋪專做外賣)到買,到左同個COUNTER靚姐姐落單,咁我一路講,姐姐個表情都帶點疑惑,最後我攞埋張單張出黎擺上枱,同姐姐講仲有想用埋呢張優惠券。
姐姐低頭望真啲,然後同我講呢度係PHD,我嗯咗一聲,有啲奇怪佢做咩無啦啦講埋啲阿媽係女人嘅嘢,姐姐見我無反應先繼續講呢張係PIZZA HUT DELIVERY嘅,我地係兩間唔同公司。
哦,係呀。我語氣好淡定咁講,同時好自然地收番張宣傳單張,折起擺番落褲袋。但我內心係不斷OHSHITOHSHITOHSHIT......,我塊面開始有啲紅,死啦唔知後面有無人添,好尷尬嘅同時亦都好想笑,但唔可以笑,我當時心諗要ACT NORMAL 淡化件事,不過我個嘴角難以自控,不斷向上又畀我扯番落黎。我隱蔽地深呼吸一下,強迫自己望住姐姐問咗一句,咁你呢到有無差唔多嘅套餐?話剛出口,我已經想兜巴星自己,咪講好咗要淡化佢,做咩又提番起! 姐姐指住枱面嘅MENU講你可以睇下邊款想要。
咁我好快趣揀番啲類近嘅,諗住快啲搞掂快啲走,點知打開銀包一望,OHNO唔夠錢,我再次強迫自己望住姐姐講唔好意思,我帶唔夠錢,請問可唔可以用EPS?姐姐話唔好意思,我地唔收EPS㗎。咁附近有無櫃員機?樓上有。哦好,唔該。
姐姐好好人由頭到尾都無笑我,只係我覺得佢望我嘅眼神有種「關懷弱智,不要歧視」。撳錢嗰陣我有諗過不如走啦唔買啦,我唔敢面對姐姐,我尷到連耳仔都已經紅埋,但唔得呀,屋企人仲等緊我買PIZZA 番去。行番埋去,我已經唔太敢有眼神交流,嗱嗱臨落單界錢。呢間啲PIZZA係即做,我記得起碼等咗大半個鐘,等待期間十分煎熬,腦入面不斷回想頭先嘅事,我想快啲走呀!