麻甩肥
2017-06-05 03:42:37
細細粒好緊張咁拉住肥仔行出房間,佢望住阿琪對自己為止卻步,都十分內
疚。
「對唔住呀....你都跟住肥仔走啦、快啲!」
肥仔仍然未搞得清情況,細細粒握住佢隻手,好凝重咁講:
「快啲...帶埋阿琪走....」
「到底發生咩事?」
細細粒搖頭,似乎冇足夠時間解釋:「冇時間啦,快啲帶阿琪走....」
肥仔仍然躊躇,唔明白到底發生咩事、細細粒會有啲咩危險先會咁樣要佢地走。
佢唔想留低細細粒。
細細粒已經拉住肥仔出門口,肥仔忍唔住問佢:
「點解你唔跟埋我地走?」
細細粒一臉痛苦:「唔得架....」
「我唔知我幾時會變番做佢.....快啲走啦,唔使理我架!」
「有啲咩事、我地遲啲傾....」
阿琪明白肥仔心裡面諗緊啲乜,佢企咗係肥仔旁邊幫細細粒勸說:
「走啦肥仔、做咩呀?一陣...佢變番個八婆就麻煩啦....」
阿琪睇得出依家既細細粒並唔係心理扭曲、變態既細細粒。
要肥仔掉低佢鍾意果個善良既花雯...實在太難。
「走呀!!!」
「如果佢番咗黎、就走唔甩架啦!」
阿琪忍唔住問:「佢係邊個....?」
「....小師妹。」
阿琪聽完之後呆咗一呆:「乜佢唔係....?」
細細粒搖頭:「佢呃你架咋、依家既小師妹....好憎男人、好唔正常....」
「我唔知佢番到黎會做出啲咩事....」
細細粒一手拉住肥仔行出走廊:
「快啲、行樓梯....」
肥仔俾細細粒拉住帶咗入後樓梯,一直都冇太大既反抗。
佢呆望住細細粒,唔知點解....突然間好似講唔到野咁。
「雯......」阿琪走咗幾級樓梯,回頭醒起有件好重要既事需要向佢確認。
「到底....我係咪一定要同肥仔上床.....?」
細細粒雙眼望一望肥仔,向阿琪搖頭。
「好啦、你地快啲走....唔使擔心我!」
細細粒拉住防煙門,作出佢最後既吩咐。
哩個時候,肥仔忍唔住開口:「...風花!!」
細細粒對哩個稱呼有小小意外:「嗯...?」
肥仔諗番起以前只有係遊戲裡面,先夠膽打出黎既對白....
「花雯....」
肥仔望住細細粒雙眼,將佢一直以黎冇機會講既對白....
一字一句咁講出黎:
「花雯,我愛你。」
細細粒終於聽到哩一句說話。
佢帶住一滴淚珠微笑,關上咗防煙門。
XXX
細細粒帶住沉重既心情....行番入去佢既「家」。
佢哩刻最唔想見到既人,就企咗係果間空盪既房間度。
「佢地....走哂。」
哩個高高瘦瘦既男仔,用一把好平和既語氣同細細粒講。
哩一個男仔.....除咗外表高瘦、斯文之外.....
身上面有一陣好難形容既氣牆。
果一種....對世界既憎恨同厭惡。
好難想像....小師妹竟然會變成一個咁既男人。
「吓、發生咩事?佢地點有可能走得到出去??」
「唔知。」
小師妹望住細細粒,隻眼冇離開過:
「你頭先....去咗邊?」
「我.....」
細細粒既聲線開始顫動:「頭先....出咗去掉垃圾。」
小師妹仍然好冷靜。
佢試著....要求自己冷靜。
但佢失敗咗。
「點解你要咁做?」
細細粒皺一皺眉頭:「你講緊咩?」
「點解....你會背叛我?」
「背叛?我點可能...背叛你?」
細細粒背心一涼,佢開始驚。
「氹我離開,然後放走哂肥仔佢地.....」
「你講果個復仇計劃呢?」
細細粒望到....小師妹努力偽裝既鎮定開始振盪。
佢故作從容咁向小師妹解釋:「所有野,我自有把握......你唔洗擔心。」
「....唔洗擔心?」
小師妹....忽然間大笑:「....有把握??」
「你有把握溝番肥仔係咪....?」
細細粒全身震咗一下:「你...講咩呀?」
「你呃我...」
「全天下既男人.......」
「冇一個係好人.....」
「包括你。」
小師妹拎起腳邊果支鐵通,慢慢行近細細粒...
「我、我唔係佢.....」
細細粒好驚。
佢未見過小師妹會咁樣.....
佢本來就已經極之神經質;哩個時候....佢好肯定好嬲。
「我唔係佢呀、你冷靜小小.......」
小師妹一手扯住細細粒既頭髮,靠向佢無辜既臉孔大喝:「你講大話!!」
「跟本就冇可能咁輕易換人、一直都係你.....」
「你想呃我....」
「所有野都係你既奸計....」
「你就係你、跟本冇其他人.....」
細細粒好痛苦地搖頭:「你冷靜啲...唔好、痛!」
「點解??」
「點解要放走佢地??」
細細粒閉眼,咬住牙關。
好痛苦....但佢願意承受。
所有野....都係佢既錯。
「你係咪....唔愛我啦?」
小師妹忽然心灰意冷、將細細粒推咗落地....
「我....只係你既道具?」
「唔係...」
「我只係........」
「一件你用黎測試變性功能既實驗品?」
小師妹仲好清楚記得....細細粒肌膚上既溫度。
佢仲好記得,細細粒當初對佢既承諾。
「點解....?」
「唔通、我就比唔上果個肥仔咩?」
「唔係..!」
小師妹高舉鐵通,充滿絕望咁宣告:
「我以為....我活著既意義只係得你一個。」
鐵通,毫不留情地揮向細細粒。