麻甩肥
2017-05-30 01:46:09
「食哂你地,我就忘記佢....」
哩一句係佢語調最正常,但內容最唔正常既一句。
乜自虐....就可以忘記到愛情啦咩?
所以,佢係咪用緊我啲麥樂雞黎介手?
我望住我啲麥樂雞.....俾佢一舊一舊咁食。
好快,麥樂雞就俾佢食哂。
我好想問口罩妹,到底食完之後有冇忘記到佢口中既果個「佢」。
但我唔敢。
即使係一個身受情傷,極為脆弱既一個女仔,我都唔敢去搭話。
我只係默默咁望住佢....
口罩只係掩飾到佢既外表,但佢既內心...我相信依然激動。
但的而且確,食哂啲麥樂雞既佢,變得比較理智,比較鎮定。
我...冇講過任何野。
佢企咗起身,行開咗。
粒聲都唔出....係我視線範圍度消失。
我冇追問佢到底算點....其至連轉頭望佢走遠既動作都唔敢做。
我驚...哩個女仔覺得我係一個計較既人。
或者,我既使命已經完結。
口罩妹係以我作為渠道,得到咗充份既宣泄....
佢得到咗滿足。
佢有動力繼續係哩個光怪陸離既社會上過活。
而我.....只能嘆出一口氣。
注定一世服兵役。
「唉....」
我將剩低既薯格擺落口。
一邊食,我一邊諗......
到底,我幾時可以拍拖?
真真正正咁拍拖。
我要初戀呀.............
明明頭先大好機會擺係你面前,點解唔好好把握?
定其實不妨FF一下,明明頭先個女仔睇中咗你,走過黎又暗示自己單身又明示
自己傷心,點解唔主動少少問人拎電話?
仆街!偽君子!!
「唉..........」
我Dup低頭嘆氣,完全冇預計過自己可以咁失敗.....
「食咗你啲麥樂雞啫,唔使咁灰呀嘛?」
我抬頭望住同我講哩句說話既佢。
口罩妹托咗個堆到密密麻麻既餐盤番黎,佢臉上面仍然帶住兩道淚痕。
似乎,又喊過咁...
我望住餐盤上面,果三盒十八件既麥樂雞.....
................
洗唔洗呀?
佢放低咗餐盤,將佢推到我面前。
細細聲咁講:
「幫我....」
「忘記佢。」
我望住果堆檸檬香草醬山,望一望哩個口罩妹。
「感情哩家野.....都係靠自己啦好嘛?」
「哦...八婆!!你係啲雞度落藥!?」