在博奕論中有個這樣的故事:
有一對情侶準備去睇一場戲。男方鍾意動作片,而女方就鐘意睇愛情片。
而且呢對情侶相當痴纏,唔願意各自睇各,只要對方唔係一齊睇同一套戲,心情就會好差好差。
假設雙方係冇溝通/共識之下買戲飛,最終會有以下4個情況:
情況1 (女方妥協、男方堅持)- 男女方都買左動作片。男方固然滿足,而女方雖然唔係睇緊自己鍾意套戲,但都算係有得一齊睇,好過冇。(用數字表示男方滿足程度為2,女方為1。)
情況2 (雙方同時堅持)- 男方買左動作片,女方買左愛情片。因為冇得一齊睇,所以雙方心情都好差。(雙方滿足程度皆為0。)
情況3 (雙方同時妥協)- 男方買左愛情片,女方買左動作片。因為冇得一齊睇,所以雙方心情都好差。(雙方滿足程度皆為0。)
情況4 (男方妥協、女方堅持)- 男女方都買左愛情片。女方固然滿足,而男方雖然唔係睇緊自己鍾意套戲,但都算係有得一齊睇,好過冇。(用數字表示女方滿足程度為2,男方為1。)
經濟學証明左呢個故事有三個平衡點(Nash Equilibrium)。
其中兩個基本平衡點 (pure strategy Nash Equilibrium),係情況1同情況4,即女方永遠妥協、男方永遠堅持﹔同埋,男方永遠妥協、女方永遠堅持。因為任何一方擅自打破呢個平衡,都唔會令到自己多左滿足。
例如,女方妥協、男方堅持緊之際,男方突然想轉妥協,就會演變成情況3,對男方而言,佢嘅「滿足程度」會由2跌至0。
第三個平衡點,稱之為混合策略下的平衡 (mixed strategy Nash Equilibrium)。
男方同女方將「隨機」地選擇堅持與否。如果要將自己嘅「滿足程度」最大化,平衡點係,男女都要有三分一機率妥協,三分二機率堅持。
機會率、運氣,看似好兒戲嘅決定,實際上mixed strategy 比起pure strategy更符合現實。原因係,長遠下去,要一方永遠做「蝕底」並無可持續性。
在混合概率之下,蹤便未必每次都達到自己最想要嘅結果,但真正的平衡,正正就介乎於堅持和妥協之間。