長文,準備定too long didn't read
追咗好耐post
失戀、冇fd、缺愛、無安全感、冇責任心等等
發覺都有一個共通點
就係,都係出世喺一個不正常家庭
頭盔
待人,接物,戀愛,交友
以上唔一定得「不正常家庭」,「一個」因素影響
哩度唔討論其他因素住
但無可否認,影響最深最重,一定係家庭關係
[以下可略]
我岩岩好快咁睇咗人類大腦嘅paper
發現大腦係無時無刻都會學習並且建模
從而產生自己嘅一套社交模式
你每次同人接觸同相處,你以為冇乜野改變,其實
你大腦個內側前額葉都會去做心理推演,情緒認知、調控
你大腦個尾狀核都會透過獎勵加工去習得行為帶黎嘅預期效果
你大腦個杏仁核會激活,控制你對其他人嘅感覺
你大腦個旁扣帶回會預測其他人嘅行為
總之,你每次,無論同邊個傾計,接觸,相處
你腦內神經元都會傳遞信息,即係個大腦都會更一更新去學習
所以,你只要接觸到任何人
你大腦都會好自然咁透過佢去學習同建模
從而產生自己嘅一套社交模式
以上為前題
你一出世開始,就學習點樣去同人相處
而同你相處得最多,就係你屋企人
而童年時期,哩種影響更加重要(童年學習速度快)
於是,即使你承唔承認都好
你嘅人際關係方式,唔多唔少都有你父母嘅影子,唔理係跟咗佢個套定作為反面教材都好
你對異性嘅愛好類型,唔多唔少都有你父母嘅影子,唔理係移情定作為反面教材都好
[以上可略]
所以,不正常家庭,對你影響係極之深遠,要識別出黎,然後改變佢。
識別咗先,我舉d最common嘅例子,
但本質上都離唔開:身心傷害、過度忽視、過度控制、非理性溝通同信念,如下
利用情感勒索(我都係為你好;我為你付出幾多)
道德綁架(養到你肥肥白白;仲駁嘴?;我養大你要孝順呀)
心理重創(你係執返黎架炸;冇人要你架)
情感忽視(你病即係你冇顧好自己啦;喊乜野?)
操控(做政府工啦;喂,去買乜乜乜;喂,去煮飯)
干涉(讀哩科啦;返哩份工啦;拍乜野拖?;同埋啲咩人做朋友?)
埋怨(當初點解要生你;好食懶做;懶人多屎尿)
比較(你睇下隔離屋個仔,你睇下你;你睇下人地畀幾多家用,你睇下你)
攻擊(隨手拎起身邊嘅野一野打落黎;一把掌車埋黎,一拳鍾埋黎)
威脅(再係咁唔畀飯你食;再係咁以後唔好返黎)
侮辱(點解養左件垃圾、廢柴、無用嘅人架;你咁蠢架;你咁廢架)
以上,喺同屋企人相處嘅時侯,有冇中過招?
有嘅話,你好大機率會有
無安全感(會唔會冇人要我)
內疚(係我連累屋企人)
自卑(我係垃圾)
自閉(我冇咩價值,識唔到朋友)
軟弱(我咁廢不如乜都唔做)
保守(少做少錯,最好唔錯)
敏感(佢係咪嬲呢,好介意人地點睇我)
低自尊(我生存黎,好似無乜價值)
低自信(我好多野都做唔到)
低EQ(用屋企人對你嘅方式對待朋友同戀人,脾氣差,鬧朋友or戀人,例如你睇下你,咁蠢架,長久落去容易變成回避型人格,簡稱毒舌)
缺乏主見(都係聽朋友、專家話算啦,唔想自己諗)
抑壓情緒(我冇事,真係冇事)
自我貶底(喂,點解你咁廢 by腦內把聲)
對他人缺乏信賴(哩個世界冇人可以信)
咁樣嘅你,朋友唔多、有陣時睇唔起朋友,但有陣時又妒嫉人叻,有陣時人身攻擊,有陣時互相比較;戀愛上成日吵架、會試圖想靠技巧去識女仔,技巧大多係操控型,例如最小興趣原則,即忽冷忽熱;生活上,成日幻想自己第時會名成利就,成日想炫耀自己,但現實上大多希望搵份政府工,安安穩穩過日子,每日玩手機game or 電腦game or 睇youtube,希望買樓,同想有一技之長;用連登時,傾向鬥邊個叻啲,鬥邊個勁啲,話自己幾勁幾勁;思想上,大多自我貶底,成日鬧自己,唔接受自己平凡。
ps.咁其實係咪有啲人唔係咁嘅呢?有冇其他人嘅生活參考下呢?有嘅。同朋友傾計以舒服為主,好少妒嫉,好少人身攻擊,好少互相比較;戀愛上,唔會點吵架、有自己生活然後去識女仔,技巧大多係點樣令雙方都覺得舒服,例如真誠做自己;生活上,踏踏實實咁,跟隨自己嘅自由意志去行事,面對其他人炫耀會祝福同不卑不亢,大多有自己想做嘅事業,接受未來嘅不確定性同風險,每日學習、想去見識更大嘅世界,想去了解每個人嘅人生故事。用連登時,傾向推有用嘅行動post,拉走冇用嘅風向post,面對連登仔批評笑而不語;思想上,大多自我接納,讚自己同鬧自己識平衡,接受自己只係平凡人,但深信每個人獨一無二。
為咗治療創傷,在此就奉上,上、中、下,三策。
上策,對於傷害你嘅人,終身遠離不接見。然後,積極尋找方法,治療家人造成既心靈創傷,個人建議,大量咁睇心理學嘅書、文章、影片。推薦《被討厭的勇氣》。目的係,增加自己認知,知道自己有咩心理問題,從而對症下藥,解決哂佢。例如自卑、低自尊、無自信、缺愛等等。接受唔原諒屋企人嘅自己,專注改變當下嘅自己。
中策,等價交換,對於傷害你嘅人,以其人之道還治其人之身(情感勒索、道德綁架、心理重創、情感忽視、操控、干涉、埋怨、比較、攻擊、威脅、侮辱佢,為求大家公公平平打個和就算),一嘗解仇雪恨、如沐春風嘅感覺。
ps.廢中廢老鍾意道德綁架,你都可以
父慈子孝,父母不慈,則子女不孝
尊老愛幼,你不愛幼,我亦無需尊老
身教言傳,你無身教,我就唔接受你言傳
下策,不作舉動,靜觀其變,小人得志,君子道消。不幸嘅人一生都在治愈童年,如無意外施主不作為,你嘅人生將會被毀,而傷害你嘅人仍然健在。若揀下策,建議丁克,以免遺害下一代,亦要小心抑鬱自殘嘅風險。
最後
建議無需不斷咁去追究原因同問責,當下最緊要,係專注咁去療傷,其他野療哂傷再理性決定。
如果你係長輩,唔識教就學,你有成就有價值又識理性溝通,待晚輩如知心好友又不失距離,佢自然會爭住孝敬你,唔洗道德綁架,互聯網上巨量家庭教育文章,睇,係咁睇,愈多愈好。
如果你係後輩,童年陰影跟一世,若果唔適當治療,就會重蹈覆轍,淪為職場失敗、情場失意、社交失聯、精神失常之人,互聯網上巨量心理學文章,睇,係咁睇,愈多愈好。