到底咩係GK？
可以睇咗以上條Link先
亦都有人概括有版權嘅叫雕像；
無版權嘅叫GK。
到底邊啲先有版權？
其實有好多工作室都有開訂同搵廠整GK賣。
大部分都無版權，質素就要視乎工作室。
有版權既唔算多，因為就算同一套漫畫版權都有細分，同埋要不斷續約，而且價錢不非。
最底會有一啲版權工作室介紹。
我亦都聽過好多師兄話GK不外如是，原來佢地係睇完信和用膠盒包裝既大膠「GK」，其實個啲完全唔係GK，最多叫「假景品」。
不過而家現時點同信和多左啲公仔機，SHOW返啲真GK出黎，相信有見過既師兄都會睇得出有名既工作室同真既GK真係靚到一個點。
當你想訂某款，但又心大心細，可以黎問下大家意見。（不過請上圖）
當你買左新款，除左自己開箱開心（或者不幸中伏好嬲），可以黎分享一下。
另外希望大家尊重下知識產權。
我聽好多人講版權雕對佢黎講無咩特別，
「有版權」唔係吸引之處，仲要賣咁貴。
老實講有版權最主要就涉及金錢，
閣下唔買唔係問題。
但請尊重有版權嘅工作室同
堅持買版權嘅收藏家。
而且咁多工作室百花齊放，有好有唔好，
好就有良性競爭；唔好就侵犯緊版權，
同埋好易中伏或者呃錢。
有啲工作室官圖無限好，大貨係篤屎。
所以最好問下/做下research先買。
無版權嘅工作室睇熱潮，
早排咁多鬼滅大熱，三日唔埋兩日就有一間開訂，
好多新入坑玩家以景品角度睇，
當然覺得好正，但講緊炒價三四千蚊嘅話，
已經可以買隻質素再高好多嘅款，
甚至乎買到有版權嘅雕。
當然你話有錢有愛，啲錢係你嘅，
你鍾意點洗我都阻止唔到。
但乜野都搶乜野都炒，只會令工作室愈出愈垃圾。
—
以下會有啲簡單Q&A，歡迎有問題再問，
未必識答，但識答一定答。
1）講左咁耐，邊啲工作室有版權？
日漫就主要Tsume、開天、RYU、UA、鐵風箏、集美、Oc
美漫就主要Prime 1，XM，Sideshow
等等
2）邊到可以買到/訂到？
現貨就要問下代理，有時某啲款會有少量現貨
或者上Facebook d 二手Group徵。
由於涉及版權，灰色地帶，唔會有鋪頭明碼實價擺現貨賣（海關有機會搞）
有錯請指出。
-
訂嘅話請搵比較出名嘅代理，近排聽唔少騙案，唔好貪平個少少。
我自己搵龍珠gk toys同專業gk訂開，
香港gk都係比較大嘅代理。
其餘代理你可以照留言問有無人訂過，
不過我就唔會再覆，萬一不幸中伏幫你唔到
淘寶最好搵啲大店，XXHome，X智，猴X，萌布X等。
另外如果想係gk zone hk或者gk zone訂野之前做少少資料搜集再決定訂唔訂。
3）訂 / 轉單 嘅流程係點？
訂：搵間信得過嘅代理，
比訂金代理>等工作室整>準備出貨>補款>速遞到付
-
轉單：同賣家傾好價錢，最好開個WhatsApp group，代理+買賣家，講明轉單，
到時準備出貨>補款>速遞到付
4）土地問題，啲盒掉唔掉好？
隻雕唔係好貴，或收藏價值高嘅話，啡盒就唔建議留（衞生問題）；彩盒就最好留，除非你肯定自己唔會搬屋/唔會賣/唔會移民，或者好瀟灑平賣都無所謂，否則無盒你要將隻野帶離屋企都幾困難。
但有啲盒成個洗衣機咁大，所以我自己就租倉擺盒，全部都有留盒。
5）買返黎爛左點算？
新買嘅就算無位拆出黎擺，都最好拆開檢查下（除非一心轉賣，有人追求全新未拆），
發現有損，即刻通知代理同工作室講，通常售後都會寄返補件比你，由於香港寄返廠唔平，佢未必要你寄返爛件比佢。
-
二手買嘅照問下代理，太耐無得售後就只能夠課金搵手藝人/上色師傅修復。
唔想課金就自己買啲混合膠痴下，最緊要過到自己個關。
6）閒閒地都一二千，大舊啲就三四千，
我買返十零廿隻景品唔好？
當然閣下有自己嘅選擇權，我只能夠以過來人嘅經驗同你講，
當你開始買雕像，會發現完全唔同層次，
慢慢覺得景品買黎只會阻掟。
我間唔中都會買返一兩隻景品，
但對景品嘅需求愈黎愈細，
只會諗留返啲錢買雕或者點樣可以擺多幾隻。
當然閣下有錢有位嘅話，WHY NOT BOTH？
7）咩係翻模？
有啲工作室專做翻模
例如古羅、Tf toys、鼠先生
即係將啲有版權/炒起左既款，照炒照做多批黎賣，但價錢平一半甚至1/3。
簡單黎講即係A貨。質素就見人見智，但有啲的確幾可亂真
有啲人會睇唔起翻模；有啲人會認為自己收藏無乜所謂。
即係你想買隻撈，但又覺得貴，最後買隻A貨。
有無問題就視乎你自己價值觀。
但香港地gk市場已經算細，翻模嘅二手市場仲細。
—
小弟youtube：
https://www.youtube.com/channel/UCVz3fxx3BaJ6NBuSYNIWV8Q
（歡迎留言比意見、改善，盡量插得細力啲
）MEWE 玩具Group：
http://mewe.com/join/toysharing
（為左篩選某類人
請答啱三條問題先可以入Group）
